Folketingimut ilaasortaq Aaja Chemnitz senatori Lisa Murkowski peqatigalugu Nobelip eqqissinermut nersornaasiuttagaanut ataqqisaaqqasumut innersuunneqarluni Facebookimi allappoq.
- Ukiut qulit sinnerlugit peqatigiilluta Issittumi siumukarnissaq sorsuutiginikuuarput – maannalu aamma Issittumi eqqissineq.
- Maannalu ikinngutigalu senatori Alaskameersoq Lisa Murkowski Nobel-ip Eqqissineq pillugu Nersornaasiuttagaanut innersuunneqarpugut, politikkeri allappoq.
Issittumi periarfissat pitsaasut eqqisseqatigiinnermik tunngavillit anguniarlugit sulineq pillugu Eqqissineq pillugu Nersornaammut innersuunneqarneq ataqqinaataasoq angingaartoq aamma allappoq:
- Norgimi Inatsisartuni – Stortingimi - suleqartitsinnut Lars Heltbrekkemut eqqarsaatigimmatigut qujanaq, Aaja Chemnitz allappoq.
Lars Heltbrekkenip politikerit taakku marluk nersornaammut ataqqisaasumut innersuussimallugit KNR-imut uppernarsarpaa. USA-p Danmarkip Kalaallillu Nunaata akornanni pisut ajorsigaluttuinnannginnissaannut taakku marluullutik pingaarutilimmik inissisimanerannut innersuunneqarnerat ilaatigut pissuteqartoq taanna KNR-imut oqarpoq.
Lisa Murkowskip Aaja Chemnitzillu Amerikamiut kongressimi ilaasortat Københavnimut Nuummullu aallartitat tikeraarnerannut sulissutiginikuuaat.
Nobelip nersornaasiuttagaanut innersuunneqarnissamut piumasaqaateqartoq taakku nittartagaanni atuarneqarsinnaavoq. Naalagaaffinni namminersortuni inatsisartuni ilaasortat nersornaammut innersuussisinnaanerat ilaatigut allaqqavoq.
