- Aasiannut alianartorujussuuvoq

- Aasiannut alianartorujussuuvoq.

Aasianni Hotel SØMA-mi pisortaq Lisbeth Hansen, Aasiaat suliffissuit annersaata Polar Raajat tunisassiorfiata ukioq manna matuneqaratarsinnaanera pillugu Sermitsiamut oqarpoq.

Illoqarfiup Qeqertarsuup Tunuaniittup suliffissuani sulisut 116-it soraarsitaasinnaanissaat inuussutissarsiortut ernummatigaat.

Akunnittarfiup pisortaa Lisbeth Hansen Sulisitsisuni siulersuisuni ilaasortaavoq.

Suliffissuaq matuneqaratarsinnaasutut nalunaarutigineqartoq Aasiannut aamma Kommune Qeqertallip sinneranut kingunerluuteqangaarsinnaasoq taanna isumaqarpoq.

Siulittuutigaa suliffeqarfiit niuertarfiillu arlallit toqqaannanngitsumik eqqugaajumaartut, ilaatigut Hotel SØMA.

- Suliffissuup matunissaa illoqarfimmut Aasiannut alianarpoq. Taama isumaqarpunga. Illoqarfiup taama politikerinit sumiginnarneqarnera takullugu alianaqaaq.

- Kommune Qeqertalik nuna tamakkerlugu politikkikkut maannakkorpiaq sammineqarpianngilaq.

- Illoqarfiit mittarfittaartortut, Nuuk, Ilulissat aamma Qaqortoq politikkikkut sammineqarput. Illoqarfik suliffissuaqarfiusoq Aasiaat soqutigineqanngilaq, Lisbeth Hansen isumaqarpoq.

Naalakkersuisut suliassaq ingerlateqqikkaat

Aalisarnermut naalakkersuisup Peter Borgip aaqqiissutissarsiornissamik suliassaq Polar Seafoodimut Royal Greenlandimullu suliassiissutigippagu, tamanna illoqarfimmut Aasiannut ajornartorsiutaannaanngilaq. Tunisassiorfik matuppat kommunip sinnera aamma eqqugaasssaaq.

- Kommunillu akileraarutitigut isertitaqarpiarunnaarnerat illoqarfinnut nunaqarfinnullu kommunimiittunut aningaasaliinernut aamma sunniuteqassaaq.

- Akunnittarfimmi pisortatut illoqarfimmiutullu tamanna isumakuluutigaara, taanna oqarpoq.

Lisbeth Hansenip isumaa naapertorlugu Aasianni raajaleriffik aalisakkerivillu annaanneqassappat politikkikkut aaqqiisoqartariaqarpoq.

- Maluginiarparali ilaatigut aalisarnermut naalakkersuisup Peter Borgip oqarsimaneratut Namminersorlutik Oqartussat allamik aaqqiissutissaqanngitsut, taanna oqarpoq.

Sermitsiap allaaserisaa naapertorlugu naalakkersuisup taamatut oqarnermigut maannakkut Namminersorlutik Oqartussanit aningaasalersorneqartussamik annaassiniarnermik Aasianni innuttaasunut eqqissisaataasinnaasumik pilersaaruteqannginnerarluni ersersippaa.

- Tamanna inuussutissarsiortuusugut ernummatigaarput. Aasianni raajaleriffk aalisakkerivillu matuneqarpat tamanna kingunerlutsitsingaatsiassaaq.

- Soorlu siusinnerusukkut oqaatigereeriga, Aasiaat kisimi eqqorneqassanngilaq, suliffissuarli illoqarfimmiittoq Polar Raajat 116-inik sulisulik matuneqarpat kommunimi inuussutissarsiorneq eqqorneqassaaq.

- Aammattaaq aalisakkerivik matuppat aalisartut raajaat aalisakkallu sumut tunisassavaat? Aalisartut Aasianniikkunnaarpata sulippassuit tammassapput. Tunisassiorfeqanngippat sooq Aasianni aalisartuusoqartariaqarpa, Lisbeth Hansen oqarpoq.

Tunisassiorfimmi sulisut SØMA-p akunnittarfiani aamma caféani nerisassanik unnuiffissanillu kiffartuunneqartartut taanna oqaluttuarpoq. Aammali aalisariutini allani inuttat Aasiannut tikinnerminni nerisassanik unnuiffissanillu pisariaqartitsisut kiffartuunneqartarput.

Hotel SØMA matuneqarnissaminut ulorianartorsiunngitsoq

Lisbeth Hansenip isumaqarnera naapertorlugu matuneqariaannaanngillat.

- Soorunami suliffissuaq matuppat kaaviiaartitatsinnut tamanna sunniuteqangaarsinnaavoq. Tamanna pinngitsoortissinnaanngilarput, Aasiannimi suliffeqarfiit suliffissuarmik kiffartuussisut aamma kiffartuuttarpagut, Lisbeth Hansen oqarpoq.

Aasianni Hotel SØMA 55-inik initaqarpoq. Akunnittarfik Kalaallit Nunaata sinnerani akunnittarfiit assigalugit unnuiffigineqartarpoq. Aasakkut unnuisut amerlasarlutillu ukiup sinnerani ikinnerusarput.

- Akunnittarfik ukiuni kingullerni arfineq-marlunni ataavartumik iluarsartuupparput, kingullermik caféerput 2024-mi iluarsartuupparput. Igaffitsinnik annertuumik iluarsartuineq ungasinngitsukkut naammassissavarput.

- Illoqarfiup ineriartornissaa kissaatigigatsigu aningaasaliingaatsiarpugut, taamaalillutalu akunnittarfiup unnuisartunut nutaanut maannakkullu tikeraartunut kajungernarnerulernissaa anguniarparput, Lisbeth Hansen oqaluttuarpoq.

Pisortaq: - Aasiaat nuannerluinnarpoq

Taakku ukiut arfineq-marluk matuma siorna uinilu Svendborgimiit Aasiannut nuupput.

- Aasiaat nuannaraara. Tassani angerlarsimaffeqarlutalu inuuvugut. Tikilluaqquneqarluarpugut, tikikkattalu najugaqartunit tigulluarneqarpugut. Inuit ilisarisimalerneri inuiaqatigiinnullu ilanngunneq nuanneqaaq.

- Illoqarfimmi peqatigiiffinnut ilaasortaasinnaagatta, attaveqarlualerluta inuillu amerlasuut ilisarisimaleratsigit iluatsitseqaagut. Suliffipput aqqutigalugu Kalaallit Nunaat angalaffigisinnaallugulu nunatsitut misigisinnaavarput. Maani najugaqarnerput nuannareqaarput, Lisbeth Hansen oqarpoq.