Anne Nivíka Grødem Visit Greenlandimi ukiuni pingasuni siuttuuvoq. Taanna maanna allamik misileerusulersimasoq Visit Greenlandip siulersuisuini siulittaasoq Anette Lings tusagassiuutitigut nalunaarummi ilisimatitsivoq.
Siulersuisut pisortassamik nutaamik "piffissaq ungasinnerusoq eqqarsaatigalugu aammalu piujuartumik ingerlanneqarnissaa siunertaralugu“ ujaasisussanngorput, nutaamillu nassaarnissap tungaanut Linda Kleist piffissami ikaarsaariarfiusumi pisortaagallartutut atuutissaaq. Taanna Visit Greenlandimi Tikitassanut ineriartortitsinermi umiarsuarnillu takornariartaatinik angallatsinermi maanna pisortaavoq.
Anne Nivíka Grødem nersualaarneqartoq
Siulersuisut Anne Nivíka Grødem sulisimaneranut qutsavigaat, taassuma ”suliffeqarfiup ineriartorneranut aammalu takornariaqarnerup ineriartornerata ilutigalugu Visit Greenlandip maanna inissisimavianut nunatsinni aammalu nunat tamalaani sunniuteqangaatsiarnikuuneranut" qujaffigineqarluni.
- Anne Nivíka nunatsinni ataatsimoortitsinikkut siuttuunermini, nunatta kinaassussaanut nukittorsaaqataanikuuvoq aammalu ataatsimoorluta aqqutissatsinnik ersarisumik pilersitseqataanikuulluni. Allanngoriartorneq annertuumi Anne Nivíka maligassiuinikuuvoq, ataatsimoortitsinikkut aammalu suliffeqarfimmi ataqatigiissaarilluni, maannalu ingerlatsinermi toqqammaviusumik kivitseqataanikuulluni, siulersuisut nersualaarerpalullutik allapput.
Anne Nivíka Grødem ukiut tallimat matuma siorna siulersuisuni siulittaasup tulliatut aallartippoq 2022-milu pisortanngorluni.
Pisortaagallartussaq
Linda Kleist, piffissami ikaarsaariarfiusumi pisortaagallartussaq Visit Greenlandimi ukiuni pingasuni sulinikuuvoq takornarialerinermilu aqutsisutut ilinniagaqartoq, paasissutissiissutigineqarpoq.
- Siornatigullu sumiiffinni takornariaqarfiusuni ineriartortitsinermi aqutsisutut aamma sulinikuulluni. Pisortaagallarnerminilu suliffeqarfiup suliassaqarfii, aammalu suliat aallartisarneqareersut siuariartornissaat qulakkeernissai suliniutigissavai, pisortassamik nassarnissap tungaanut, tusagassiuutitigut nalunaarummi naggasiutigineqarpoq.
