Inuit Ataqatigiit Folketingimut qinigassanngortitatik tallimanngornermi ualikkut saqqummiuppaat.
Partiip qinigassanngortitai Aaja Chemnitzimut, 2015-imiilli partiimit pingasoriarluni Folketingimut qinigaasumut, tulliullutik ilaasortanngussapput.
Inatsisartuni nunanut allanut tunngasunut sillimaniarnermullu ataatsimiititaliami siulittaasoq Pipaluk Lynge Inuit Ataqatigiit sinnerlugit qinigassanngortittut ilagaat.
- Folketingimut ilaasortanngortussaq annertuumik akisussaaffeqalissaaq. USA-mit tatineqarneq suli uninngilaq, taamaattumik allanngueqataasinnaallunga suliarlu kivissinnaallugu isumaqarpunga, Pipaluk Lynge oqarpoq.
Pipaluk Lynge arlaleriarluni malunnaateqarsimavoq. Kingullermik USA-mut aaqqiagiinnginnermut atatillugu, tassani Folketingimi nunanut allanut tunngasunut ataatsimiititaliaq Inatsisartunilu ataatsimiititaliaq ataatsikkut ilisimatinneqartaqqullugit piumasaraa.
Nivi Rosing aamma qinigassanngortippoq. Taanna maanna Inatsisartuni aamma ilaasortaavoq.
Inatsisartuni ilaasortaajunnaarniartut
Nivi Rosing aamma Pipaluk Lynge Folketingimut qinigaassagunik Inatsisartunit tunuarniarlutik oqarput:
- Inatsisartut sulinerat ulloq naallugu suliffittut isigaara, ukioq kaajallallugu sulivugut, sulinngiffeqanngingajattarluta. Aamma Folketingimi taamaappoq, taamaammat marlunnik atuuffeqarsinnaanngilanga, Pipaluk Lynge oqarpoq.
Nivi Rosing aamma taama isumaqarpoq:
- Inatsisartut Folketingilu ulloq naallugu suliffittut isigaakka, taamaattumik qinigaassaguma sulinngiffeqassaanga, oqarpoq.
Lund Rosingilu aamma sassartut
Kalistat Lund Aqqalukkuluk Fontainilu aamma qinigassanngortipput.
Qinigaaffik qaangiuttoq oqaluttuarisaanermut ilannguttoq partiip siulittaasuata Múte B. Egedep oqaatigaa. Tassami nunarsuup sinnera Issittumut malinnaavoq.
- Periarfissat maanna takkuttut atorluarutsigit Kalaallit Nunaata iluaqutigissavaa.
- Naalagaaffeqatigiinni tullertut inissisimassanngilagut, tamatta naligiissaagut, Múte B. Egede peqqinnissamut tunngatillugu naligiimmik inissisimarusuttoq oqarpoq.
Qinigassat allat sapaatip-akunnerata tulliani aamma saqqummiunneqassasut partiip siulittaasuata oqaatigaa.
(nutarterpoq)
