Immikkut ilisimasallit spiralilersuisimaneq pillugu nalunaarusiaat pissangalluni utaqqineqarpoq. Spiralilersuisimaneq inuiannik toqoraanerunersoq taakku ilaatigut inernilertussaavaat.
Naalakkersuisut immikkut ilisimasalinnit nalunaarusianik assigiinngitsunik marlunnik tigusaqarsimasut maanna paasinarsivoq, suleqatigiit aaqqiagiinngissuteqarsimanerat tamatunnga peqqutaavoq
Immikkut ilisimasallit aaqqiagiinngissuteqarnertik pissutigalugu ataatsimut nalunaarusiornatik immikkut nalunaarusiornissartik aalajangersimagaat, taannalu Naalakkersuisunit akuerineqarsimasoq, Naalakkersuisut tusagassiuutitigut nalunaarummi ilisimatitsipput.
Ilaasortat marluk suleqatigiinnit anillutik namminneq qallunaatut nalunaarusiortut
Immikkut ilisimasallit sisamaasut ilaat marluk suleqatigiinnermiit aniniarlutik aalajangersimallutik 2025-mi decembarimi aamma 2026-mi januaarimi nalunaarutigaat.
"Ilaasortat akornanni suliatigut aaqqiagiinngissuteqarneq, ilaatigullu nunat tamalaat akornanni politikkitigut inissisimanermut ernumassuteqarneq patsisaavoq. Ilaasortat taakku marluk immikkut ilisimasaqarlutik suleqatigiinnit tunuartut immikkut tapersiissuteqarnissaminnik neqerooruteqarmata, tamanna akuerineqarpoq." Naalakkersuisut allapput, nangillutillu:
"Kingorna immikkut ilisimasaqarlutik suleqatigiit nalunaarusiartik tuluttut allassimasoq tunniuppaat, immikkullu ilisimasaqarlutik suleqatigiinnit ilaasortaasimasut taakkua marluk nalunaarusiaminnik qallunaatut allassimasumik tunniussillutik."
Nalunaarusiat misissoqqissaarneqassasut - saqqummersinneqarnissaat kinguartinneqarpoq
Naalakkersuisoq Naaja H. Nathanielsen (IA) "nalunaarusiaq" tiguneqarsimasoq februaarip aallartinnerani nalunaarutigaa, maanna marluusut tassa paasinarsivoq. Aamma nalunaarusiap tuluttuumiit nutserneqareerpat saqqummersinneqarnissaa naatsorsuutigineqartoq, suliallu sapaatit-akunneri arfinillit missiliorlugit suliarineqassasoq taamani nalunaarutigaa.
Sapaatit-akunneri arfinillit taakku qaangiutereerput, innuttaasulli nalunaarusiat imarisaat pillugit utaqqeqqittariaqarput.
Naaja H. Nathanielsenimi nalunaarusiat taakku marluk misissoqqissaarneqartariaqartut aalajangerpoq:
"Suliatigut aaqqiagiinngissuteqarneq patsisaalluni aalajangerneqarpoq, periutsit aamma suliat naliliiffigineqarlutik nalunaarusiat marluutillugit ilisimatuunit allanit naliliiffigineqassasut. Nalunaarutit apeqqusersorneqarnissaat Naalakkersuisut kissaatiginngimmassuk, tassunga patsisaavoq," tusagassiuutitigut nalunaarummi allaqqavoq.
Nalunaarusiat siusinnerpaamik maajimi saqqummiunneqassasut maanna naatsorsuutigineqarpoq, soorlu ataani pilersaarummi takuneqarsinnaasoq:
Politikkikkut soqutigisat pissutaannginnerarai
Naalakkersuisup nalunaarusiat nunami politikkikkut pissutsit eqqarsaatigalugit - tassa Danmarkip Kalaallit Nunaatalu avissaartuunnerunissaat pinngitsoortinniarlugu - kinguartinneqarnera ilumuunnginnerarpaa:
- Oqaluttuarisaanitsinni
kapitalimik nuanninngitsumik ersarissaanissamut suliatigut tapersiissuteqarneq
pineqarpoq. Suliaq manna politikkikkut saqitsaannermi
atorneqartariaqanngikkaluarpoq. Taamaattoqassappat suliap ilungersunassusianut
ataqqinninnginnerussaaq, oqarpoq.
Immikkut ilisimasallit sisamat aaqqiagiinngissuteqartut ataatsimut maanna nalunaaruteqarput, taakkualu nalunaarusiamik tunniussisinnaatitaanertik qujamasuutigaat:
"Naalakkersuisut nalunaarutit marluutillugit tiguniarmatigit, ilisimatuunullu allanut naliliiffigitinniarlugit aalajangersimammata nuannaarutigaarput."
"Eqqortuunera akisussaaffigalugu suliamik tunniussinissarput uagutsinni pingaarnerpaavoq. Tamanut saqqummiussisinnaanissarput, kingornalu apeqqutinik akinissarput qilanaaraarput," Dalee Sambo Dorough, Miriam Cullen, Jonas Christoffersen aamma Jensine Nedergaard ataatsimoorussamik oqaaseqarput.
