Nittartakkatigut ajoqusersuisoqarnera pissutigalugu Doris J. Jensen aamma Aka Hansen Facebookimi oqallinnermut peqataasinnaanngillat. Nassuiarneqarsinnaanngitsumik pisoqarnera pillugu Sermitsiap taakku marluk oqaloqatigai.
Aka Hansenip Doris J. Jensenillu tamanna misiginikuunngisaannarlugu oqarput, ilaatigut videot allagartallu qineqqusaarnermi periusissiamik pingaarnersaannut ilaasut annaavaat, tamannalu qinersisartunik oqaloqateqarnissamut periarfissaannik killiliilluni.
“Qineqqusaarnermi akissutissaqarsinnaannginneq artornartuuvoq.” Aka Hansen ima oqarpoq.
Allakkat nassiussinnaanngitsut
Doris J. Jensenip allatami ilarpassui iluatsinngitsutut nalunaarutigineqartartut aamma maluginiarpaa. Kalaallit Nunaanni ullumikkut attaveqaqatigiinnerit amerlanersaat Facebook aqqutigalugu ingerlanneqartartut, oqarpoq.
- Unammillernarpoq, aamma Siumup qinigassanngortitai eqqugaanerat pasitsannartoqarpoq. Uagut eqqorneqarnerput eqqarsaatinik pilersitsipput, Doris Jakobsen Jensen oqarpoq.
Aka Hansenip ajornartorsiutit qarasaasiami ajoquteqarnermit, qarasaasiap nammineerluni taamaalinera imaluunniit toqqaannartumik eqqorneqarneraluni nalunaa. Namminiilivinnissamilli inuillu pisinnaatitaaffiinik illersuisut eqqugaanerpaasut isumaqarpoq. Facebookimut oqartussanullu attaveqarpoq akineqaranili. Facebook naapertorlugu aatsaat marsip 24-ani nal. 11.44 nalinginnaasumik oqaaseqarsinnaalissaaq.
- Qineqqusaarneq sivikitsuararsuuvoq illoqarfinnullu tamanut angalanissamut periarfissaqanngilagut. Facebook atorlugu sinerissami qinersisartut tamaasa angusinnaannginnatsigit killiliivoq, Aka Hansen oqarpoq.
Qineqqusaarnini allanngortittariaqaraa
Aka Hansenip qineqqusaarnini piffissap sivikitsup iluani allanngortittariaqarpaa.
- Attaveqaatikka allat suli atorsinnaavakka, videolialli ilanngutereersimasakka tamaasa annaavakka — aamma allanit ingerlateqqinneqarnikut tamarmik peerneqarput. Maanna qanoq iliussanerlunga nalornissutigeqaara, sapinngisarali tamaat inuit anguniarpakka, oqarpoq
Doris J. Jensenip suna pissutaanersoq oqaatigiumanngilaa, erseqqissarpaali avataaneersut sunniiniarnerat ajornartorsiutaasartoq ilisimaneqartoq.
- Nalunngilarput nunat allat nunani allani politikkimut sunniiniartartut, aamma IT-mi piginnaasaqarluartunik nunatsinni sulisussaqarpugut. Taamaakkaluartoq ilisimanngilara suminngaanniit atortorissaarutitigut saassunneqarneq pinersoq.
Doris J. Jensen Facebookip marsip 18-ianiit 2026-imiit allataqaqqissinnaanersoq nalunaarutigisimagaa oqaroq — sulili taamaaliorsinnaanngilaq.
KNR naapertorlugu Naleqqap folketingimut qinigassanngortitaa Najannguaq Hegelund aamma Facebookimi quppernerminini ajornartorsiutigaa.
