Inatsisartunut kommunalbestyrelsinullu ilaasortat arlallit Folketingimi issiavissaqarusulersimapput.
Naalakkersuisunut ilaasortat marluk, Anna Wangenheim (D) aamma Naaja H. Nathanielsen (IA), saniatigut Inatsisartunut ilaasortat tallimat kommunalbestyrelsimullu ilaasortaq ataaseq Folketingimut qinigassanngortipput.
Ukuuppullu - taamungaannaq tulleriaallugit:
Bentiaraq Ottosen, A - Inatsisartunut ilaasortaq
Nivi Rosing, IA - Inatsisartunut ilaasortaq
Pipaluk Lynge, IA - Inatsisartunut ilaasortaq
Doris J. Jakobsen, S - Kommuneqarfik Sermersuumi kommunalbestyrelsimut ilaasortaq
Napaartoq Isak Petrussen, D - Inatsisartunut ilaasortaq
Juno Berthelsen, N - Inatsisartunut ilaasortaq
Sulinngiffeqarumallutik qinnuteqarniartut
Sermitsiap Inatsisartunut ilaasortat marluk kommunalbestyrelsimullu ilaasortaq ataaseq Folketingimut qinigaassagunik politikkikkut qanoq suliniuteqarniarnersut paaserusullugu oqaloqatigai.
Pipaluk Lynge (IA) folketingimut qinigaassaguni Inatsisartuni ilaasortaajunnaarniarluni oqarpoq.
Tamat naalakkersueqataanerat tunngavigalugu allanngueqataarusunneq Folketingimut qinigassanngortinnissamik aalajangernermini tunngavigaa. Pipaluk Lyngemut politikki eqqarsaataaginnanngilaq, Danmarkimili inatsisartuni sulinermi iluaqutaasumik tapersersuisinnaalluni nammineq qularutiginngilaa.
- Nunami tamat naalakkersueqataaffigisaanni inuuvugut, politikerillu politikeriupput. Folketingi aqqutigalugu tunniussaqarsinnaallunga isumaqaruma taava tassunga qinigassanngortissaanga, taanna Sermitsiamut oqarpoq.
Pipaluk Lynge Kalaallit Nunaanni politikerit marloqiusamik qinigaaffeqarnerat pillugu oqallinnerup kingunerisaanik qinigaaffimmi sinaakkutissat pingaarnersiuiffigineqarnissaannik ujartuivoq. Oqallinneq amerlanertigut, tassa qinikkat tunuliaqutaat oqaluttarfimmi sulinermi atugassarititaasut eqqarsaatiginagu sammineqaraangata, eqqunngitsumut sammisartoq taassuma tikkuarpaa. Lynge naapertorlugu politikkikkut sulinerup namminersortullu inuussutissarsiornerup oqimaaqatigiissaarinissaat misissorneqarnerusariaqarput.
- Inatsisartuni ilaasortat amerlasuut Inatsisartunut ilaasortaanerup saniatigut ulloq naallugu sulisarnerat uanga nammineq ajornartorsiutitut isigaara. Tamanna imminnut assortuulluinnartutut isigaara. Tamannalu tamat naalakkersueqatanerat tunngavigalugu qinigassanngortinnissamut pisinnaatitaaffitsinnik apeqqusiinnginnerulluni sammineqarnerusariaqartoq isumaqarpunga, taanna itisiliivoq.
Qinersisartut aalajangiisussaasut
Marloqiusamik qinigaaffeqassanersoq qinersisartut namminneq aalajangissavaat. Bentiaraq Ottosen, Inatsisartunut ilaasortaq folketingimilu qinigassanngortittoq erseqqissaavoq.
Inatsisartuni Folketingimilu ataatsikkut ilaasortaasinnaanermut apeqqut taanna nammineq aalajangigaanngilaq, tamalli naalakkersueqataanerannik tatiginninneruvoq. Taassuma Kalaallit Nunaata sapinngisamik patajaatsumik sinniisoqarnissaata qulakkeernissaa pingaarnertut ukkataralugu naqissuserpaa.
- Qinersisartut tamanna aalajangiiffigissavaat. Folketingimut qinigaaguma qinersisartunit tatigineqarsimanerma ataqqinissaa pingaaruteqarpoq. Kalaallit Nunaat Folketingimi nukittuumik ersarissumillu oqaaseqarsinnaasumik, soqutigisavut pillugit suliniuteqarluartumik, pisariaqartitsisoq aamma isumaqarpunga.
Suli nalornisoq
Doris Jakobsen Jensen Kommuneqarfik Sermersuumi kommunalbestyrelsimut ilaasortaareeraluarluni Folketingimut qinigassanngortippoq.
Doris Jakobsen Jensen Folketingimi, Inatsisartuni kommunalbestyrelsinilu sulinermik misilittagaqarluartuullunilu ukiuni arlalinni naalakkersuisuusimavoq. 2011-miit 2015-imut Folketingimut ilaasortaanermini illersornissamut tunngasut nunanullu allanut politikki sammisimavai.
Kommunalbestyrelsimut ilaasortaanermiit Folketingimut ilaasortanngornissaq politikkimi atorfiit taakku marluk assigiinngilluinnartuummata ungasiginarsinnaavoq.
Doris Jakobsen Jensenip illersornissamut isumaqatigiissut nutaaq inissinneqarpat Kalaallit Nunaat peqataatikkusuppaa. Maanna isumaqatigiissut 1951-imeersoq – kalaallit peqataatinnagit - Danmarkip USA-llu akornanni atsiorneqarsimasoq taassuma tikkuarpaa. Taamaammat Kalaallit Nunaat aamma toqqaannartumik atsioqataalersinnaaniassammat isumaqatigiissut nutarterneqartariaqartoq isumaqarpoq. Taassuma oqarnera naapertorlugu nunap isumannaallisaaneranut illersorneqarneranullu aalajangiinerni Kalaallit Nunaata sunniuteqarsinnaanissaa qulakkeerneqarnissaa siunertarineqarpoq.
- Illersornissaq pillugu isumaqatigiissut 1951-imeersoq Kalaallit Nunaat ilanngunnagu Danmarkip USA-llu akornanniinnaq atuummat illersornissaq pillugu isumaqatigiissummik pilersitsisoqarnissaa pingaarnerpaatippara. Taamaammat illersornissaq pillugu isumaqatigiissut nutartertariaqaripput, Kalaallit Nunaallu atsioqataasariaqartoq isumaqarpunga, Doris Jakobsen Jensen oqarpoq.
Folketingimut qinigaassaguni Kommuneqarfik Sermersuumi kommunalbestyrelsimi sulinngiffeqarnissani suli nalornissutigaa.
- Folketingimut qinigaassaguma kommunalbestyrelsimut ilaasortaaneq qanoq piniarnerlugu suli naluara.
