Paaqqinnittarfiit tatineqartut pillugit akerliussutsimik takutitsineq:- Maanna iliuuseqartoqarnissaa piumasaraarput

Meeqqanut aneerussiviit sialuup ataani siumut utimullu ajattarlugit nusuttarlugillu uteqattaartinneqarput. 

Meeqqat apusinerni ukiuuneranit kiserngorutilersuni pinnguarput, Evannguaq Cortzenilu inuppassuit akerliussutsimik takutitsisut saavanni oqalugiarluni aallartilluni. 

- Meeqqanut meeqqerivinnilu sulisunut atugassarititaasut naammagilerpavut. Sulisunut ulluinnarni sulinermi annanniarnissaq pingaarnerpaanngorsimavoq. Ukiorpassuarni taamaassimavoq, maannalu iliuuseqartoqarnissaa piumasaraarput, Evannguaq Cortzen højtalerikkut nipigippallaanngitsukkut taama aallartippoq.

Peqataasut amerlaqaat oqariartuutigineqartorlu paatsuugassaanngilaq. Nunami maani perorsaasut atugaat ajorluinnartut pitsanngorsarneqartariaqarput. Aqagu pinnani, ukiup affaa qaangiuppat pinnani maannakkorpiarli pisariaqarpoq.

Evannguaq Cortzen paaqqinnittarfimmi Nukariinni angajoqqaat marluk peqatigalugit akerliussutsimik takutitsinissamut suliniuteqartuuvoq. Paaqqinnittarfimmi sulisorineqartussanit 29-usunit 16-inik amigaateqartoq, Sermitsiami sapaatip akunnerani kingullermi allaaserineqarmat, tamannalu iliuuseqarusulernermut pissutaanerpaasoq, Evannguaq Cortzen oqarpoq.

Politikerit akisussaasullu pissutsit allanngortinniarlugit iliuuseqartariaqarput. 

Sulisut amigaataagaangata meeqqat eqqugaasartut

Akerliussutsimik takutitsinermut peqataasut ilagaat Rasmus Isaksen, taanna perorsaasunngorniarluni ilinniartuuvoq.

Nuup illoqarfiata qeqqani Amisut saavanni inuppassuit akornanni ilinniaqatinilu akerliussutsimik takutitseqataapput.

Ilinniakkaminnik naammassinnikkunik suliassartik aamma meeqqanik sullissinissartik qilanaaralugit maaniipput, aammali atugassarititaasut pitsaasuunissaat kissaatigigamikku.

Sulisussaaleqisoqartorujussuusoq nalunngilaa, tamannalu nammineq ilinniarnerminut atatillugu ulluunerani paaqqinnittarfinnut assigiinngitsunut pulaartarnermini misigisareerpaa.

Pingaarnertulli meeqqat pillugit maaniippoq.

- Atugassarititaasut pitsaanerusariaqartut isumaqarpunga akissarsiallu qaffanneqartariaqarlutik. Meeqqat pineqarput. Akissarsiat qaffanneqarpata ulluunerani paaqqinnittarfinni sulerusuttut amerlanerulissasut upperilluinnarpara. Qinersisoqaraangat assaat kissalaartut amigaataanerat tamatigut oqallisigineqartarpoq – uagullu pineqarpugut. Pitsaanerusunik atugassaqartitaasariaqarpugut, Rasmus Isaksen oqarpoq.

Rasmus Isaksenimit meterinik qulinik ungasissuseqarluni Panik Kleemann nikorfavoq. Meeqqamut ulluunerani paaqqinnittarfimmiittartumut anaanaavoq, perorsaasullu qanoq tatineqartiginerat ulluinnarni malugisinnaasarpaa.

- Sulisussaaleqinerujussuaq sivisuumik iliuuseqarfigineqartanngimmat maaniippunga, oqarpoq.

Akerliussutsimik takutitsisut allagartarsuarnit nipinillu Nuummi silaannarmut nillertumut akuleruttunit avatangerneqarsimapput. Taassuma eqqaaniittut angajoqqaat allat ilisarsillutik anngaapput, ulluuneranilu paaqqinnittarfinni ulluinnarni inuunermit misigisartakkatik oqallisigalugit.

Panik Kleemannip meeraaqqerivimmiittumut anaanaasutut nammineq misigisimavaa, sulisut aalajaatsut piffissami sivikitsuinnarmi sulisorineqartartut. Ullut ilaanni meeqqani meeraaqqerivimmukaammagu sulisoqanngilaq, tamatumunnga taarsiullugu meeqqerivimmukaakkamiuk tassani ataasiinnarmik sulisoqarpoq.

- Angajoqqaatut toqqissisimananngilaq. Sulisullu taama atugassaqartitaallutik sulisarnerat nersortariaqarluni, oqarpoq.

Paniup sulisussaaleqineq meeqqami ineriartorneranut qanoq sunniuteqartartoq aamma maluginiarpaa.

- Assersuutigalugu meeqqat silagikkaluaraangalluunniit aneertinneqartanngillat, sulisussaaleqinerlu pissutigalugu sammisassaqartitsivallaarneq ajorlutik, oqarpoq. 

Evannguaq Cortzenip akerliussutsimik takutitsisut Katuap tungaanut ingerlaqqinneranni siulersorpai. Meeqqat kulturip illorsuata saavani tasiminertani pissigarput, inuppassuillu tamaani nipaallutik utaqqillutik.

Katuamit, maajip aallaqqaataata nalliuttorsiutigineqarfianit, politikeri ataaseq siulliulluni anillappoq, taavalu alla, naggataatigullu politikerit partiinit tamaneersut nikorfallutik akerliussutsimik takutitsisut pakatsisimasut oqariartuutaat tusarnaarpaat.

Sulisut ikinnerpaaffeqartarnissaannik siunnersuut

Kommuneqarfik Sermersuumi borgmesteri Avaaraq Olsen siulliulluni oqaaseqarpoq.

Taassuma oqaatigaa, ajornartorsiut ajoraluartumik ukiorpassuarni ajornartorsiutaasimasoq, namminermi tamanna misigisimavaa, siornatigummi meeqqani suliartoqatigisariaqartarsimagamiuk.

- Isumaqatigaassi. Isumaqarpunga iliuuseqartoqarnerusariaqartoq. Kommunimit, angajoqqaanit sulisunillu. Oqaloqatigiissaagut ataatsimoorlutalu aaqqiissutissanik tikkuussilluta, borgmesteri oqarpoq. Naak iliuuseqartoqarnissaanik pisariaqartitsisoqarnera erseqqissaraluaraa, sulili ulluunerani paaqqinnittarfinni ajornartorsiutit aaqqinneqarnissaannut qanoq iliuuseqartoqassanersoq ersarissinngilaq.

Meeqqanut, inuusuttunut, inatsisinillu atuutsitsinermut naligiissitaanermullu naalakkersuisup Mariane Paviasen Jensenip pissutsit ilungersunartut aamma paasilluarsinnaavai.

Upernaakkut ataatsimiinnermi siunnersuutigineqartoq, tassa paaqqinnittarfinni tamani inimi ataatsimi minnerpaamik sisamanik sulisoqartarnissaanik siunnersuut tikkuarpaa.

- Siunnersuut tamanna Naalakkersuisunit tapersersorlugulu akueraarput. Naak suliassaqarfik kommunip akisussaaffigigaluaraa uagullu Naalakkersuisut toqqaannartumik akuliussinnaanngikkaluarluta, kommunimik suleqateqarnissamut ammavugut. Meeqqammi atugarissaarnissaat tamatta akisussaaffigaarput, oqarpoq. Tamanna amerlanngitsunit ersaartaanneqarpoq.

Maannakkut iliuuseqartoqarnissaa kissaatigaat

Oqalugiartunit arlalinnit Nunatta siunissai pillugit iliuuseqartariaqarnerup pingaaruteqassusia sammineqarpoq. Meerartaraavummi, oqartoqarpoq.

Angajoqqaat perorsaasullu politikerit oqalugiaataat tusarnaaqqissaarpaat, kisianni aamma isikkui allamik oqaluttuarput — akerliussutsimik takutitsisut ilaata ima nilliaffigaa: Naammaleqaaq.

Allagartarsuit sialussiutillu akornanni perorsaasut ukiorpassuarnik misilittagaqarluartut sanileriillutik nikorfapput. Assaat ukiuni qulikkuutaanni kivitsisarsimasut, tuppallersaasarsimasut illoqarfimmilu meeqqanut sammisaqartitsisarsimasut maanna akerliussutsimik takutitsipput. Eqqissisimasoqarpoq, pineqartorli ilungersunarluni.

Evannguaq Cortzenip ulloq naammassillugu iliuuseqartoqarnissaanik piumasaqaateqarpoq.

- Erseqqissumik oqariartuuteqarniarluta maaniippugut. Perorsaasut meeqqatsinnik isumassuisut pitsaanerusumik atugassaqartitaalissasut piumasaraarput. Upernaakkut ataatsimiinneq naatinnagu aaqqiissutissanik erseqqissunik ajornartorsiummik aaqqiissutissanik siunnersuuteqartoqassasoq piumasaraarput, oqarpoq.

Katuap silataani inueruppoq allagartarsuillu siallersumi poortorneqarlutik. Politikerit Katuamut uterput. Perorsaasut aqagu ulluinnarni ulapaarfiusumi ataqatigiissaariniaqqissapput.