Nunarsuaq tamakkerlugu ineriartorneq: Takornariat ajornartorsiutaaleruttorput

Takornariartitsisartut nunanit allaneersut qamuteralannik angalasarnerat Avannaata Kommuniani borgmesterip Lars Erik Gabrielsenip isornartorsiorpaa, taakkualu qamuteralaat atorlugit takornarianik naammattumik ilinniartitsinngitsut isumaqarpoq.

- Nunaqavissuusugut tamanik allannguinissaq pillugu nipituuliuuteqarpugut. Ingerlatseqatigiiffissuit allamiunit pigineqartut qamuteralannik inunnut qamuteralassimanngisaannartunut attartortitsisarput, qanorlu iliortariaqarnersut nakkutigineqaatillu ilitsersorneqanngillat – aamma qimussertunut tunngatillugu, borgmesteri Facebookimi allappoq.

Takornariat qamuteralallutik angalasut

Lars Erik Gabrielsenip takornariartitsisartut nunanit allaneersut takornariatut taavai, takornariallu namminneq takornariartitsisutut pissusilersussanngitsut inerniliivoq.

Facebookimi gruppimi „Kalaallit Nunaanni takornariartitsinerup tunuliaqutaa“-ni taamatut oqariartuuteqarpoq, tassani Nivé Heilmann Diskobay-Toursimeersoq Akinnerup eqqaani qamuteralannik ajutoortoqartarsimanera pissutigalugu oqallitsitsivoq.

- Akinnarmi takornariaqartillugu qamuteralaallu angalaartaleraangata uagutsinnut qimussertunut takornariallu navianartorsiortikkaangata aliasuutigisarpara – annilaangatigisarpara.

- Kikkut tamarmik isumannaatsuunissaat kissaatigaara, suliffeqarfiillu qamuteralannik angalatitsisartut isumannaallisaaneq pillugu paasissutissanik misissuiumaartut qamuteralannermullu piginnaanerit ilinniarumaaraat neriuppunga, Nivé Heilmann oqarpoq.

Nunani tamalaani nalinginnaasoq

Lars Erik Gabrielsenip Nivé Heilmannillu ilanngutassiaminni oqallinneq Kalaallit Nunaanni kisimi atuunngitsoq Norgemilu Tromsømi aamma atugaasorujussuaq eqqartorpaat, naak nunanit allaneersut apummi qaqqanilu biilersinnaanerat oqallisigineqaraluartoq.

Takornariat takkussuuttut illoqarfimmiunut „anersaarulunnartuusut“ Tromsømi kommunalbestyrelsimut ilaasortaq Erlend Svardal Bøe, Høyre-meersoq, Norgemi aviisimi VG-mi allappoq.

Takornariartitsinerup siuariartornissaa siornatigut tapersersortupilussuusimagaluarlugu maanna allatut isiginnittaaseqalersimavoq. Takornariaqarneq suliffissaqalersitsillunilu aningaasarsiutaagaluartoq pilliutit annertuallaalersimapput.

Takornariaqarneq illoqarfimmiunut ajornartorsiortitsivoq — timmisartoqarfiit ulikkaarput, pinngortitami sumi tamaani annat takussaapput, akunnittarfiit akisupput, Tromsøllu qeqqani pisiniarfiit nalinginnaasut eqqaassutissanik tuniniaavinngorsimapput. Allamiulli biilinik attartortakkanik biilertut Erland Svardal Bøep uumigai.

- Norgep avannaani ukiukkut taartumi, quasaqisumi apuserneranilu biilerneq uagutsinnut maani najugalinnut imaannaanngilaq. Inuit misilittagaqanngitsut ajutuukulapput - ilai ajutuungaatsiartarlutik.

Inuunermik navianartorsiortitsisut

– Taamaakkaluartoq takornariat ukiukkut biilinik attartorsinnaapput. Tamannalu inuunermik navianartorsiortitsivoq. Biilertut aqqusernup qeqqani arsarnerit takuniarlugit unittariaqalersut nammineq misigisimavara. Aqquserngit quasattut, qaqqat apummik ulikkaarsimasut nittaalartullu takornarianit sungiusimaneqanngillat.

- Taamaammat Tromsømi takornariat biilimik attartortinnatik quasartumi apummik ingerlasinnaanermut pikkorissartariaqarput, politikeri oqarpoq, nunamilu tamarmi politikkerit iliuuseqarnissaat utaqqiumanagu.

Søe konservativetut politikkeriuvoq akileraarutinut akerliusuulluni, aaqqiissutissarli ataasiinnaq takusinnaavaa: Takornariat akileraaruserneqarnerulernissaat – taamaanngippat aappaagu katinnissara taamaatiinnartariaqassavara, Tromsømi Norgep sinneranit tikeraakkannut akunnittarfinni inissaqanngitsoq, sioorasaarivoq.