Nuup illoqarfiata ilaani Nuussuarmi nakuusertoqartoq politiit sisamanngornermi unnukkut nal. 21.18 nalunaarfigineqarput.
Politiit sumiiffimmut ornigukkamik angut inooqatiminut nakuusersimasutut tigusarineqarsimasoq politiiniit Aqqalu Petersen oqarpoq.
Angut pasineqartoq tigummigallarneqarnissaa siunertaralugu eqqartuussivimmut tallimanngornermi sassartinneqassagunarpoq.
Arnaq nakuuserfigineqartoq ulorianartumik ajoqusersimanngitsoq pigaartut pisortaat aamma oqarpoq.
Sisamanngornermi unnukkut kingusinnerulaartukkut nal. 21.37 nakuusertoqarneranik nalunaarummik allamik, tamatumuuna Aasianni, politiit nalunaarfigineqarput.
Nukappiaqqat marluk 15-it inorlugit ukiullit akornanni nakuusertoqarpoq. Isumagittoqarfik angajoqqaajusullu suliamut akuliutsinneqarput, pigaartut pisortaat oqarpoq.
Mobiilit tillinneqartut
Maniitsumi pisiniarfimmut aalajangersimasumik tillinniartoqarsimasoq pigaartut pisortaat aamma oqarpoq.
Tillinniartoqarsimasoq nalunaaqutaq 02.54 nalunaarutigineqarpoq, tillinniallu ataatsip amerlanerusulluunniit mobiilit iPhonet Samsungillu tillissimavaat.
- Inuit mobiilinik pisinermut uppernarsaatitaqanngitsunik tuniniaasoqarneranik pasitsaassisut politiinut saaffiginneqqullugit kajumissaarneqarput, pigaartut pisortaat oqarpoq.
Tillinniartoqarnera sukkasuumik siunertaqartumillu pisimasoq oqarpoq, politiillu suliaq misissuiffigalugu.
Umiatsiaq sikumi nikeriarsinnaajunnaartoq - namminerli anillaalluni
Politiit sisamanngornermi unnukkut nalunaaqutaq 18.26 pisumik allamik kalerrinneqarput, annaassiniarnerlu aallartinneqarluni.
Oqartussaasulli iliuuseqartinnagit pisoq nammineq iluatsissimalluni.
Angutit marluk Aasiaat eqqaani umiatsiaaqqamik sikumi nikeriarsinnaajunnaartut nalunaarutigineqarput.
Kalaallit Nunaanni Politiit Issittumi Sakkutooqarfik angutit taakku marluk ikiorneqarnissaat pillugu suleqatigiumallugu attaveqarfigaat, oqartussalli iliuuseqarnissaat sioqqullugu angutit taakku marluk namminneq anillaassimasut nalunaarutigineqarpoq.
