Nipilersorneq Laura Lennert Jensenimut inissisimaffimmik tunisisuuvoq - maanna ingerlateqqikkusuppaat

Laura Lennert Jensenip ilinniarnertuunngorniarfimmi klassiani matematikkertitsisup klassi matematikkimi kinngussaaqqasoq qatsuppaa.

Atuaqatigiit tunniussassatik qaqutigut piffissaq eqqorlugu tunniuttarpaat. Atuaqatigiit nipilersornermik ingerlataqaramik matematikki kisiat samminagu aamma allanik sammisaqarput.

Ilinniartulli matematikki pingaaruteqartoq paasisariaqarpaat. Ikittuinnaammi nipilersornermi eqqumiitsuliornermilu siunissaqarsinnaasut matematikkimik ilinniartitsisup oqaatigaa.

Atuaqatigiit tamarmik ingeniørinngunngillat.

- Ullumikkut marluulluta nipilersornerup silarsuaani ataqatigiissaarisutut sulisarpugut, ataaseq - Andachan - nipilersortartuusoq alla nipilersortartuullunilu filmiliortartuuvoq, marlullu isiginnaartitsisartutut ilinniarsimapput, Laura Lennert Jensen oqaluttuarpoq.

- Aamma soorunami allat nipilersorneq pingaarnertut aningaasarsiutiginngikkaluarlugu suli nipilersortarput.

Laura Lennert Jensen, taanna/taakku-mik taaguuteqartoq, Nuummi Saqqarliini najugaqarfimmini inimi nikorfavoq.

Inip teqeqquaniipput pattagiaq, ukulele guitarilu. Atuakkanut ilisiviup ataatungaaniipput oqaluttartup nuutai assigiinngitsut. Elvisimit Nat King Colemut. Sumékkut nuusiaat saarliuvoq. Nuutit Laura Lennert Jensenip aanaminit pissarsiarai.

- Oqaluttartoq amigaatigiinnarpara, taanna oqarpoq.

Laura Lennert Jensen Sermitsiamit naapillugu ullut marluinnaat matuma siorna qaammatini marlunni Sisimiuneereerluni uteqqammerpoq. Tassani inunngorlunilu peroriartorpoq – qaammatillu kingulliit marluk Arctic Sounds Festivalimi, ukiut tamaasa illoqarfimmi ingerlanneqartartumi, suleqataasimavoq.

- Festivalimi misigissutsikkut paatsiveerusimaartarpunga, taanna oqarpoq snusiisivinilu ammukkamiuk puussiaaqqat qaqortut ilaat siggumi ataanut ilivaa.

- Sinippiarneq ajorpugut. Festivalertitsinermilu inunnut 100-nut assigiinngitsutigut ikiuuttarama allanut nukissaqanngilanga, taanna oqarpoq.

Laura Lennert Jensenip sooq suliffik taama uippakajaarnartigisoq toqqarsimaneraa arnaata ilaannikkut aperisarpaa.

Tamannali imminut akilersinnaavoq.

- Sinnakilluni Angu Motzfeldt ukiuni 20-ni erinarsuusiaminik tusarnaartitsisimanngitsoq ukioq mannali festivalimi peqataasoq tusaallugu alianaangaarmat nikuiinnarluni qianarpoq.

Eqqumiitsoqatigiit

Laura Lennert Jensen pattagissap nalaanut ingikkami appisimaalaarpoq.

- Nipilersugaq una tassaavoq Dusting the Piano,” pattaffiilu assamminik pujoralaajarpai.

Taava Niels Lan Dokyp (nipilersortartoq pattattartartorlu danskeq) erinniaa appippaa.

Laura Lennert Jensenip arnaata Sisimiuni nipilersornermik ilinniarfimmi nipilersornermut ilinnialernissaanut pinngitsaalisimavaa.

- Inuit allat takusariaqarpatit, Laura Lennert Jensenip arnaa oqarpoq.

Taamani Laura Lennert Jensen 13-14-inik ukioqarpoq, ikinnguterpassuaqanngilarlu. Inuusuttuaraanermini nukkanilu taekwondortarput – illoqarfimmi Sisimiuni inuit amerlanerit arsartarlutillu assammik arsaattartut akornanni timersuut nalinginnaanngitsoq.

- Aamma piffissap ilaani assammik arsartarnikuuvunga, uannulli naleqqutinngilaq, taanna oqarpoq.

Laura Lennert Jensen allanik sammisaqarusunneruvoq. Atuakkanik atuarneq nuannaraa — ingammik takorluugassiat - unnuullu ataatsip ingerlanerani Harry Potterimik atuakkat pingajuat sisamaallu tiguartilluinnarluni atuarpai.

Ikinngutinilu qarasaasiamik nuannarisaqarnerusoq pinnguaammik Dungeons & Dragons-imut assingusumik pinnguarput. Unammiffissaq nammineerlutik titartarpaat - nunap assinga angisooq, taamaalillutillu inuttat assigiinngitsut pinnguarisarpaat.

- Nuanneqaaq, Laura Lennert Jensen eqqaamasalersaarpoq.

Taakkuali illoqarfimmili mikisuni Sisimiuni ilaminnit allaanerulluinnarput.

Qanga meeqqanit allanit allaanerusutut misigilernerit eqqaamaviuk?

- 1996-imi juunip sisamaanni, illarluni oqarpoq.

Laura Lennert Jensen ulloq taanna inunngorpoq.

Nipilersornermik ilinniarfimmi aallartinneq Laura Lennert Jensenip inuuneranik allannguivoq. Aallaqqaammut erinarsoqatigiinnut ilannguppoq, kingorna guitarertalerpoq - ukiullu tulliani sapaatip-akunneranut nalunaaquttap-akunneri 13-it nipilersortarfimmi atortarpai.

Atuarfimmi inersimasut piumassuseqarluartut Laura Lennert Jensenip akisussaaffeqarnerulernissaanut illoqarfimmilu kulturilerinermi peqataanerulernissaanut sunniuteqarsimasut saniatigut ikinngutiginerpaasami ilai nipilersornermik ilinniarfimmi naapippai.

- Eqqumiitsoqatigiippugut. Tamannali akuersaarneqarpoq.

Taanna ilinniarnertuunngorniarami nipilersornermik sammisaqarnissani toqqarpaa. Angajoqqaavi ilaqutariillu amerlanersaat ilinniartitsisuupput, Laura Lennert Jensenillu ilinniarnertuunngorniarfimmi nipilersornermik tuluttullu ilinniartitsisutut sulilernissani aamma takorloorsimavaa. Taannali Aarhusimi nipilersornermik ilisimatusarnissamut qinnuteqarami ilisimatusalersinnaanissamut misilitsinnermi angusinngilaq.

- Taava sorusunnerlunga eqqarsaatigeqqissaartussanngorpara.

Anneruniarnermit ilisimatusarnermi imminut ikiornermut

Laura Lennert Jensen Kalaallit Nunaanni inuusuttut nipilersornermik piginnaasaqartut praktikkernissaannut peqataanissaminut 2016-imi periarfissaqalerpoq. Taanna taaneqarpoq MUMG (Musikuddannelsespraktik for Unge Musiktalenter i Grønland), tassalu Kalaallit Nunaanni inuusuttunut nipilersornermik piginnaasalinnut praktikkerneq. Tassani Laura Lennert Jensen nipilersortartullu ilinniarusuttut allat sisamat tallimalluunniit Danmarkiliarlutik qaammatialuit ingerlaneranni nipilersornermik ilinniakkat assigiinngitsut misilippaat.

Laura Lennert Jensenip nipilersorneq nuannaraa - Danmarkimili nipilersortartut atugaat nuannarinngilaat.

- Unammillerpalaarpoq. Qanoq pikkoritsigineq takutittariaqarlugu misigisimavunga - tamannalu nuannarisimanngisaannarpara.

Taarsiullugu - nalaatsornerinnakkut - Laura Lennert Jensen antropologimi ukiup tulliani ilisimatusalertussanngorpoq.

- Pisimasinnaasuni tamani pitsaanerpaavoq. Uannut naleqquteqqissaarpoq

Antropologii tassaavoq inuit, taakkua pissusii kulturiilu pillugit ilisimatusarneq. Laura Lennert Jensenip Aarhusimi bachelorinngorniarluni ilisimatusarnini 'imminut ikiorluni ilisimatusarnertut' taavaa.

- Isumaliutersuutit misissueqqissaarnerillu iluaqutigalugit siornatigut ilisimanngisakka paasilerpakka. Inuiaqatigiit uanga aamma inooqataaffigisakka ilikkagaqarfigeqaakka, taanna oqarpoq.

Ilisimatusarnermini nunat kulturillu allat pillugit atuakkani imminut kalaallu inuiaqatigiit paasisaqarfiginissaannut iluaqutigai. Indiap Tuluit Nunaannut attaveqarnera Tanzaniamiluunniit rap-imik kulturi pineqaraluarpat apeqqutaatinnagu.

2020-mi semesterimi ataatsimi ilinniaqatigiit amerlanersaat paarlaasseqatigiipput, tassanilu Laura Lennert Jensen Nuummiissalluni aalajangerpoq. Bacheloritut naammassigami illoqarfiit pingaarnersaanniiginnarsimavoq. Laura Lennert Jensenimmi ikinngutai amerlanerit piffissami tassani Sisimiuniit allamut nuussimapput.

Taanna kulturi inuiaqatigiilerinerlu pillugit kandidatinngorniarluni ilisimatusalerpoq - Laura Lennert Jensenilli inaarutaasumik allaaserisaq allagartartaassutissani tunniutinngisaannarpaa.

Laura Lennert Jensenimi tassanngaannaq allarpassuarnik ulapputeqalerpoq. MIO-mi sulinini, taamanikkut ilisimatusartutut ikiortaanini, aammali Nuummi eqqumiitsuliornermik, kulturimik isiginnaartitsinermillu suliaqartunut ilanngukkiartuaarsimanini ulapputigai.

Ilaatigut nipilersoqatigiit Zika 2023-mi EP-mik saqqummersitseqatigai. Ukiup tulliani Birte Olsen – ilinniarnertuunngorniaramili kiisalu Sisimiuni peroriartoramili nalunngisani – peqatigalugu podcastertik ‘Homoholdet’ aallartippaat.

Podcasti maannakkut 44.000-it missaannit tusarnaarneqarsimavoq.

Suliniutillu nutaat takkussuutiinnavipput. Laura Lennert Jensen Arctic Sounds Festivalimi ukiuni pingasuni sulisussatut siorna isumaqatigiissuteqarpoq.

Ukiut qulingajaat matuma siornali festivalimi aaqqissuussinermut kajumissutsiminik ikiuuttarsimavoq.

- Festivalimi sulisussamik ataatsimik ukiuni pingasuni piffissami tamakkiisumi sulisumik atorfinitsitsinissamut aningaasaliisoqarpoq. Uangalu atorfinitsinneqarpunga.

Kikkut tamarmik ikinngummik pisariaqartitsipput

Sisimiuni festivali sapaatip-akunneri arlallit matuma siorna pisortatigoortumik naammassigaluarluni suli ingerlanneqarpoq.

Laura Lennert Jensen suliassanut taakkununnga pingaarutilittut inissisimavoq — maannalu naatsorsuutit suliarineqarput.

- Ukiuni qulini kingullerni upernaaq taama atortarpara, aamma taamattuarumaarpoq, taanna oqarpoq.

Laura Lennert Jensenilli Arctic Sounds kisiat isumaginngilaa. Aammali kalaallit nipilersortartut arlallit ataqatigiissaarisuuffigalugillu pilersaarusiortartuuffigigamigit ulapputeqaqqingajalerpoq.

- Taamaammat malinnaaniarnissaq pingaaruteqarpoq, taanna oqarpoq.

Laura Lennert Jensenip qaqutikkut taamaaliortarami qanittukkut Naja P. Aarhusimi SPOT-festivalimi tusarnaartitseqatigissavaa.

Laura Lennert Jensen qangali taamaaliornikuulluni nammineq oqarnermisut “nipilersortuinnaalluni” peqataalerpoq.

- Aallaraangama angalatitsisutut assigisaanilluunniit suliaqartarpunga. Taamaammat arlaata suut tamaasa isumagisimagai tupinnarpoq, taanna oqarpoq.

- Nipilersuutikka nassarlugit timmisartoqarfimmukaannartussaavunga. Tamatuma misigisarnera qaqutigoorpoq.

Laura Lennert Jensen appisimaaqqaarami Sisimiuni scenemi namminneq sanaqataaffigisaminni appisimaarpoq.

- Sisimiuni neqeroorfigineqartuaannanngilagut. Nammineq iliuuseqartariaqartarpugut. Taamaammat nipilersortartuugatta aamma qullilerineq, nipilerineq piareersarnermilu suliassat allat pikkoriffigilerpagut, taanna oqaluttuarpoq.

Laura Lennert Jensen siullerpaamik teknikkimi, nipilerinermik ataqatigiissaarinermillu suliaqarnani appisimaaqqaarami Katuami Nuummiittumi appisimaarpoq.

Nalinginnaasumik nipilersortartunut tapersersuisutut piffissarujussuaq atortarpaa. Taannaasarpoq ullorsiutinik, e-mailinik tusarnaartitsinermilu qanoq iliortoqartariaqarneranik nakkutilliisuusartoq.

Laura Lennert Jensenip tamanna suliat tamakku nuannarai.

- Kikkut tamarmik ikinngummik pisariaqartitsipput, uangalu taannaajumaarpunga. Tassaniikkaangama imminut iluarinerpaasarpunga. Erinarsortoorusunngilanga allatulluunniit siuttoorusunngilanga. Uanga taamaattuunngilanga, taanna oqarpoq.

Kalaallit Nunaanni nipilersortartut siunissaat eqqarsaatigalugu Laura Lennert Jensen assigiinngitsunik takorluugaqarpoq. Nunaqavissut nipilersornermik ilinniarfissaannik aamma avammut niuernermut allaffeqarfik, kalaallit nipilersuutaasa nunarsuarmi tamarmi nittarsaannissaannut iluaqutaasinnaasoq.

- Nipilersorneq eqqumiitsuliat inunnik ataasiussuseqalersitsisarnerpaat ilagaat, Laura Lennert Jensen oqarpoq.

- Kalaallit nipilersugaat nuannarineqareeraluartut nunani allani aamma nuannarineqarnerulerumaartut neriuppunga – ingerlallualeruttortugullu isumaqarpunga.