Naaja H. Nathanielsen qinersinermi ajugaalluni Folketingimilu Kalaallit Nunaat sinnerlugu ilaasortanngorpoq. Taamaalilluni inuussutissarsiornermut, aatsitassanut, nukissiutinut, inatsisit atuutsinneqarnerannut naligiissitaanermullu naalakkersuisuujunnaarluni.
Sooruna Folketingi pingaaruteqarnerusoq?
- Suliat taakku marluk pingaaruteqarput, kisianni ukiuni tulliuttuni Kalaallit Nunaat sinnerlugu Folketingimi sulinissaq nunarsuullu sinneranut oqaaseqartartuunissaq pingaaruteqarpoq.
- Tamanna qilanaareqaara, qularinngilluinnarparalu Mútep naalakkersuisussatut tulluartumik uannut taartaasinnaasumik nassaarsinnaajumaartoq.
Tulliullugu sussavit?
- Makillunga susoqarsimanersoq paasilluaqqaarniarsarissavara, oqarpoq.
Naaja H. Nathanielsen 1953-inik qinerneqarluni taaguunneqarnerpaat pingajuattut inissippoq, IA-li partiini qinerneqarnerpaammat Folketingimut ilaasortanngorpoq.
Qarsoq Høegh-Dam Naleqqameersoq ilaasortanngortup aapparaa, taannalu 4615-inik taaneqarluni amerlanerpaanik qinerneqarpoq.
