Folketingimut qinersineq marlunngornermi ingerlallualeruttorpoq, qinersissartulli qineqqusaarneq qanoq isumaqarfigaat?
Sermitsiap qinersisartut marluk, assigiinngitsunik pingaartitsisut, naapippai.
Pitsi Jakobsen, qinersisartoq.
Ullumi folketinngimut qinersisoqarpoq, suut naleqartitatit pingaartillugit qinersissavit?
- Uanga pingaartitara inuiaqatigiit atugaat pingaartinneruakka, taava kisianni uanga malinnaalaarninni tamanna maluginngitsuulaarpara, alla pinnginnamikku nunatta tatineqarnera. Kisianni parteeqannginnama innuttaasunut pisariaqartitat aallaavigalugit qinersissamaarpunga, isumalluarnartumut.
Qineqqusaarneq malinnaaffigivallaarsimanagu oqarputit.
- Periarfissaqaraangama malinnaasarpunga, kisianni isornartorsiuinerujussuaq atorpallaarneqaleraangat qamittarakku. Inuiaqatigiit pisariaqartitaannik anguniagalinnik tusaavallaannginnama, taakkua tusaarusunnerugaluarakkit. Ullutsinni inuuniarneq oqimaareertigisoq, sunalu tamarmi akitsoriartortoq, tamakkuluunniit tikinneqangaanngitsut malugigakku pikkunaalliulaarpunga.
Ullumikkut folketinngimut qinersineq pingaaruteqartigiva?
- Pingaaruteqarpoq inuiaqatigiinnut kalaallinut, soorlu uagut pilluta sullittussaagamik, anguniakkagut atukkavullu pillugit, taava neriuuteqarlunga qinersissaanga. Kisianni oqarnavianngilanga kina, partiimik aaliangersimasumik uanga aamma qinersineq ajorama.
Aqqaluk Christensen, qinersisartoq:
Naleqartitatit suut pingaartillugit qinersivit?
- Tassa nunatsinnut qineqqusaartut sunniuteqarluarsinnaappata pingaartillugu qinersiartorpunga.
Qineqqusaartut malinnaaffigisimassavatit, qanoq isumaqarfigivigit?
- Ajunngeqaat, qanoq oqassuunga, erseqqilluarput. Taavalu ukua nuimanerit kisimik takussaaneruneri taanna apeqqusernalaarput, immaqa tamakkernerusinnaanerugaluarput takusagut, kisianni ajunngillat, ajunngeqaat.
Ullumi folketinngimut qinersiviuvoq, qanoq pingaaruteqartigiva qinersineq?
- Tassa pingaaruteqartorujussuuvoq nunatsinni tatisimaneqaleruttorfiup nalaaniikkatta, taakkulu nunarput pillugu sulisussaammata tamat oqartussaaqataanerisa aqqani qinersivugut.
