Mittarfiliortiternermi 2020-miilli siuttuusup Greenland Airportsimit soraarnini nalunaarutigaa.
Jens Lauridsen Ilulissani mittarfissuassap atoqqaartinneqareernerata kingorna soraassasoq suliffeqarfik tusagassiuutitigut nalunaarummi paasissutissiivoq.
Jens Lauridsen tassunga atatillugu ima oqarpoq:
- Kalaallit Nunaanni nutaanik mittarfiliornissamik suliaqarnermut siuttuuneq misigisassaavoq asseqanngilluinnartoq nuannaarutigisorujussuuaralu, oqarpoq nangipporlu:
- Oqaatigilluaannarlugu qaqqat qaarsullu aallarniutigaagut, ullumilu Nuummi Qaqortumilu nutaaliaasunik mittarfeqalerpugut – aammalu Ilulissani Mittarfiup ingerlanneqarnera aamma aallartingajalerparput. Tamanna sulisut pikkorissut suleqatigisartakkallu, annertuumik nersortariaqartut, annertoorujussuarmik suliaqarnerisa inerneraa, Jens Lauridsen oqarpoq. Taanna 2020-mi oktobarip qaammataani sulilerpoq.
Soraarnermi kingorna ikiuuteqqaassasoq
Greenland Airports nutaamik pisortaanissarsiortussanngorpoq. Jens Lauridsenili soraarnermi kingorna ikiuunnissamut piareersimassaaq.
Siulersuisuni siulittaasup Jens Wittrup Willumsenip pisortaaneq soraartoq nersualaarpaa:
- Jens Lauridsen Kalaallit Nunaata oqaluttuarisaanerani attaveqaasersuutinut suliassat annersaata, pisariunersaata anguniagaqarfiulluarnerpaartaasalu piviusunngortinnissaannut qitiulluinnartumik inissisimasimavoq.
- Kunngeqarfimmi nutaanik mittarfiliorneq imminermini qaqutigoortuuvoq. Tassunga ilanngukkaanni suliassat issittumi pissutsit atuutsillugit, peqatigisaanillu sivisuumik, suliarineqarsimasut, anigorniagassat annertussusaat paasineqarsinnaavoq, siulersuisuni siulittaasoq oqarpoq.
Nuummi, Qaqortumi Ilulissanilu mittarfiliornerit Kalaallit Nunaata oqaluttuarisaanerani sanaartornerni annerpaapput. Suliniutit arlaleriarlutik isornartorsiorneqartarput. Nuummi mittarfissuup atulerneraniilli isumannaallisaanermut tunngasortai annertuumik ajornartorsiutaallutik.
