Mette Arqe-Hammeken: - Naluttarfiit qulisat pisariaqartippavut

Naalakkersuisut naluttarfinnik airdome atorlugu qulisanik Ittoqqortoormiini, Tasiilami avannaanilu sumiiffinni assigiinngitsuni sananissaminnut pilersaaruteqarnersut Mette Arqe-Hammeken Naleraq sinnerlugu Inatsisartuni ilaasortatut §-37 naapertorlugu apeqquteqarpoq.

Nivi Olsenimilli Demokraatiniit meeqqanut, inuusuttunut, ilaqutariinnut, nunamut namminermut, ilinniartitaanermut, kultureqarnermut, timersornermut ilageeqarnermullu naalakkersuisumit akissummi allassimavoq Naalakkersuisut maannakkut taamaattunik sananissaminnut pilersaaruteqanngitsut.

Akit ilisimaneqanngitsoq

Naluttarfinnik airdome atorlugu qulisat assigiiaartumik angissuseqartut sananeqarneq ajormata sanaartornermi aningaasartuutit aalajangersimasut assigiissaartullu pigineqanngitsut Nivi Olsen allappoq.

- Sanaartukkat init qulisat pullattakkat tamarmik immikkut suleriaatsimi suliniutitut pilersaarummi aalajangersimasumik pisariaqartitsineq malillugu ilusilersorneqartarput, sumiiffimmilu pineqartumi siunertamut, najukkami teknikikkullu piumasarineqartunut naleqqussarneqartarlutik.

- Sanaartortitsinermi aningaasartuutit katinnerat arlalinnit pissuteqartumik sunnerneqartarpoq, matumani ilanngullugit pilersaarutitut suliniutip ilusilernera aamma annertussutsip uuttuutai, atortunik oqorsarneqarnissamut pissaassusaata qaffasissusianik toqqaaneq, toqqavilersornissamut piumasaqaatit, najukkami silap pissusia kiisalu teknikkikkut atortulersuutit annertussusaat, taakku tamarmik ukioq kaajallallugu aalajaatsumik ingerlatsinerup qulakkeernissaanut pisariaqarmata, Nivi Olsen oqarpoq.

Pissutsit soorlu sanaartorfigiuminarsaaneq, assartuussinerit, sanasut, isorliunerusuni pisinnaasaat atortut sulisussallu akii naammassineranut akianut pingaaruteqarsinnaapput, Naalakkersuisoq oqarpoq.

Misilittakkat amigaataasut

Naalakkersuisut naluttarfiliornermik imaluunniit airdome atorlugu sananermik misilittagaqanngitsut Nivi Olsenip aamma oqaatigaa, taamaattumillu misilittakkat suliniutilluunniit assingusut akiinik missingersuusiornermi atorneqarsinnaasut pigineqanngimmata.

- Avannaani, Ittoqqortoormiini Tasiilamilu inimik qulisamik pullattakkamik naluttarfiup pilersinnissaanut nalinginnaasumik imaluunniit assigiissaakkamik akigititap oqaatiginnissaa ajornarpoq.

- Suliniutit pilersaarutit taakkualu tunngaviat tamarmik immikkut namminerisaminnik naliliiffigineqarnissamik piumasaqaateqarput, inissiiffimmi pineqartumi pissutsinut piviusunut neqeroorusiortarnissamik ersersitsisumik.

- Akinik missiliuummik naatsorsuinneq qulaani allassimasut naapertorlugit sanaartornissamut periarfissarititaasut ersarissarnissaanik piumasaqaateqarpoq, oqarpoq, suliariumannittussarsiornermilu neqeroornikkut saqqummissasoq ilanngullugu paasissutissiissutigalugu.

Siullermiilinngitsoq

Airdomenut aningaasaliisoqarnissaanik siullermeertumik kissaateqartoqanngilaq. Kalaallit Arsaattartut Kattuffiat nunatsinni airdomenut aningaasaliisoqassasoq siorna siunnersuuteqarpoq. KAK naapertorlugu arsaattarfiit pioreersut airdome atorlugu qulineqarsinnaapput, taamaaliornikkullu Kalaallit Nunaanni arsaannikkut siuariartoqarsinnaavoq. Qanoq kissaateqartoqarnersoq apeqqutaatillugu airdome 20 aamma 50 millionit koruunit akornanni akeqarsinnaavoq.

Siunertaavoq naluttarfiit atuarfinnit pisortaqarfinnillu atorneqarsinnaanissaat, airdomelli kommunip pilersaarutaani taaneqanngillat.

Naammaginngikkaa

Kommuneqarfik Sermersooq Ittoqqortpprmiini silami naluttarfimmik 2019-imi pilersitsivoq, aasaaneranilu innuttaasunit atorluarneqartarluni. Mette Arqe-Hammekenilli taanna ukioq kaajallallugu atorneqarsinnaaqqullugu airdome atorlugu qallerneqassasoq takorusuppaa.

- Naalakkersuisunit akissut naammaginngilara. Isuma taamaatiinnarneqarsinnaanngilaq Naalakkersuisut taamaattunut misilittagaqannginnerat peqqutigiinnarlugu.

- Inatsisartuni gruppitsinni tamanna oqaluuserissavarput ukiup ingerlanerani Inatsisartuni oqaluuserineqarnissaa siunertaralugu, Mette Arqe-Hammeken Ittoqqortoormiini najugaqartoq oqarpoq.

Naluttarfiit qallikkat isorliunerusuni sanaartorneqartariaqartut isumaqarpoq, pingaartikkamiuk meeqqat siusissukkut nalunnermik ilinniarnissaat, taamatuttaaq isumaqarluni taakku pinaveersaartitsinermi atorneqarsinnaasut.