Kommune Kujallermi meeqqat inuillu innarluutillit pillugit sullissineq aaqqiagiinngissutaavoq.
Naalakkersuisut 2024-mi novembarimi kommunip susassaqarfimmik aqutsinera unitsippaat, suliassaqarfimmilu tassani Naalakkersuisuit kisimik aalajangiisuusarnerat kommunip nittartakkamini maanna erseqqissaatigaa.
Kommuni naapertorlugu innuttaasut ilaasa meeqqanut, inuusuttunut inunnut innarluutilinnut tunngasuni sullissinerit isumakuluutigaat:
- Maalaaruteqartoqarnera aammattaaq innuttaaqatit eqqorneqartut toqqissisimananngitsumik nuanniilliornartumillu inissisimanerat paasilluarsinnaavagut. Taamaattorli Kommune Kujalleq novembarimi 2024-miit suliassaqarfinnut taakkunannga akisussaaffiiagaanikuunera uagutsinnut pingaaruteqarpoq erseqqissumik oqaatiginissaa uagutsinnut erseqqissumik oqaatiginissaa pingaaruteqarpoq, kommune allappoq.
- Naalakkersuisut tamakkiisumik aalajangiisartuupput
Naalakkersuisut susassaqarfimmi aalajangiisuusarnerat kommunip erseqqissaatigaa:
"Suliassaqarfiit taakkua ullumikkut Naalakkersuisut akisussaaffigaat. Tamanna isumaqarpoq Naalakkersuisut, Meeqqanut, Inuusuttunut Ilaqutariinnullu Naalakkersuisoqarfik, Nunamut Nunaminermullu Naalakkersuisoqarfik kiisalu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik suliassaqarfinnut taakkunannga tamanut tunngasunut tamakkiisumik aalajangiisartussaasut."
"Kommune Kujalleq suliassat suliarineqartarnerinut qanorlu aalajangiisoqartarneranut sunniuteqanngilaq."
Borgmesterip Malene Vahl Rasmussenip isumaginnittoqarfimmi suliassat ilaasa iperarallarneqarneranni siunertaasut anguneqarsimaleriarpata suliassaqarfiup piaarnerpaamik utertinneqarnissaata Kommune Kujallermut pingaaruteqarluinnarnera oqaatigaa.
"Tamanna anguniarlugu aaqqissugaasumik suleqatigiinneq allaqqunneqarsinnaanngilluinnartutut isigaara. Suliassaqarfiup iperarallarneqarsimasup ingerlanerani tamarmi kommune peqataatinneqartariaqarpoq," borgmesteri allappoq, nangipporlu:
"Kommune Kujalliup suliassaqarfimmik ullormiit ullormut tigusinissaa naleqquttuunanilu ajornassaaq."
Pisortaaneq sakkortuumik isornartorsiuisoq
Suliaq tamanna Kommune Kujallermi pisortaanerup Randi Vestergaard Evaldsenip Naalakkersuisut suliamik iperarallarneqarsimasumik iliuuseqarfiginninnerat sakkortuumik marsimi isornartorsiormagu sammineqaqqilerpoq.
Suliassamik isumaginninneq aaqqissugaanngitsumik ingerlanera, uppernarsaasiortoqarneq ajornera amigartumillu ataqatigiissaarisoqarnera pisortaanersup isornartorsiorpaa. Taamaattoqarneralu innuttaasut akornanni toqqissimannginneramik naammaginninnginnermillu pilersitsilluni.
Naalakkersuisoq Nivi Olsen (D) pisortaaneq akerlilerlugu aaqqissuussaanermik pilersitsisoqarsimasoq suliassaqarfimmilu iperarallarneqarsimasumik aaqqissuussisoqarsimasoq oqarpoq.
Nivi Olsenip suliaq pillugu kommuni siunnerfilimmik oqaloqatigiumallugu aamma oqarpoq. Taamatut kaammattuineq Malene Vahl Rasmussenip qujaruppaa.
