Nunatsinni politikkikkut tallimanngormat pisoqangaatsiarpoq. Folketingimut qineqqusaartussat allattorsimaffiisa tunniunneqarnerisa nalaanni Siumup naalakkersuisoqatigiinnit anilluni nalunaarutigaa.
Siumup naalakkersuisoqatigiinniikkunnaarneratigut Demokraatit, Inuit Ataqatigiit Atassullu suleqatigiinni kingulerupput.
Naalakkersuisunut ilaasortat marluk naalakkersuisutut sulinngiffeqaratik Folketingimut qineqqusaarnerat Atassutip aallaqqaammulli isornartorsiorpaa. Piffissallu ilaani ilumut naalakkersuisoqatigiinniiginnassanerlutik apeqqusiipput.
Atassut naalakkersuisoqatigiinniiginnassanersoq isummerfigissallugu partiip siulersuisui tallimanngormat kingusissukkut ataatsimiipput.
- Ataatsimiippugut. Taakkua suli oqaloqatigissaginga piumasarigamikku. Taamaammat suli oqaloqatigeqqilaassuara qanoq suleqatigiinneq ingerlasinnaanersoq, imaluunniit ingerlaannassanersoq, Aqqalu C. Jerimiassen Sermitsiamut ataasinngornermi ullaakkut taama oqarpoq.
Oqaloqatigiissutitik isertuukkai
Atassutip siulittaasuata oqarnera malillugu Naalakkersuisut Siulittaasuallu suli oqaloqatigiipput. Tassa imaappoq, Atassut ilumut naalakkersuisoqatigiinniiginnassanersoq suli aalajangiiffigineqanngilaq.
- Maannakkuugallartoq suli erseqqissumik akissutissaqanngilanga.
- Naalakkersuisut siulittaasuat ippassaq (sapaammi aaqq.) oqaluuppara. Siulersuisut uterfigeqqilaartussaavakka ullumi. Neriuppunga aqagu suna tamarmi akissutissarsineqarumaartoq. Kisianni neriorsuutigisinnaanngilara, Aqqalu C. Jerimiassen oqarpoq .
Sunaana oqaloqatigiissutigigissi?
- Akornatsinni maannakkumuugallartoq pigigallassavarput, silammut anillatsinnginnissaa kissaatigigallarpara, Atassutip siulittaasua taama naggasiivoq.
