Kommune Kujalleq 2023-mi 2024-milu qaammatini qulini akileraarutinik A-nik piffissaq eqqorlugu akiliisimanngimmat qaammatinilu pingasuni akiliisimanngimmat 6,1 million koruuninik akiligassitsinneqassasoq unnerluussisussaatitaasoq akileraartarnermut aqutsisoqarfik sinnerlugu oqarpoq.
Taamaammat suliaq Kalaallit Nunaanni Eqqartuussivimmi marlunngornermi suliarineqassaaq.
Kommunep annertuumik mianersuaalliorsimasutut unnerluunneqartoq pinngitsuunerarpoq.
Qaammatit tamaasa piffissaq eqqorlugu akiliisarsimanatik nassuerutigaat, eqqartuussivimmili „piaarinnginnerarlutillu annertuumik mianersuaalliorsimannginnerarput“. Kommunip illersuisua eqqartuussivimmi taama oqarpoq.
Ilisimannittut arlallit ullup-qeqqa sioqqullugu eqqartuussivimmi nassuiaapput. Siulleq tassaavoq Arne Ørbæk Skifte Andersen, Kommune Kujallermi aningaasaqarnermut pisortatut/kommunaldirektørip tulliatut 2024-mi februaarip aallaqqaataani atorfinitsinneqartoq. Taanna kommunip aningaasaqarneranut akisussaavoq.
Taanna 2024-mi marsip naalernerani poorski sioqqullugu tamatuminnga maluginiagaqarsimavoq.
- Akiligassaqartoqarsinnaasoq ullualuit tamatuma siorna akileraartarnermut pisortaqarfimmit oqarfigineqarnikkut paasitinneqarpunga, taanna oqarpoq.
Siunnersortimit avataaneersumit taamatut paasitinneqarpoq, taannalu tamatuminnga misissueqqullugu qinnuigaa.
Suli aningaasatigut unammillernartoqartoq
Arne Ørbæk Skifte Andersen atorfinitsinneqarmat kommunip aningaasaqarnera qanoq issimanersoq unnerluussisussaatitaasoq aperivoq.
- Kommunimi suli sulilernanga 2021-mut aamma 2022-mut naatsorsuutit tunniunneqarsimanngisut nalunngilara, tamatumali saniatigut aningaasaqarneq pillugu ilisimasaqarpallaanngilanga.
Aningaasanut aaqqissuussineq nutaaq 2021-mi atuutilersinneqarmat kommunip tamanna ajornakusoortissimagaa taanna nassuiaavoq.
Taava kommunip aningaasaqarnera ullumikkut qanoq innersoq unnerluussisup aperaa.
- Kommuni aningaasaqarnikkut suli unammillernartoqarpoq. Akileraarutinut akiligassanut kinguaattoornerit pissutaaqataapput. Akiitsutit akilerniarlugit aningaaserivimmi taarsigassarsisariaqarsimavugut. Akiitsoq tamarmi akilerneqanngippat aningaasaqarneq taamaaginnartussaasoq naatsorsuutigaara, Arne Ørbæk Skifte Andersen oqarpoq.
Kommuni 2025-mi februaarimi akileraartarnermut aqutsisoqarfimmut akiitsoqarunnaarsimasoq taanna nassuiaavoq. Aningaaserivimmulli taarsigassarsiat suli akilersorneqarput.
Akiligassaqartoqarnera Akileraartarnermut Aqutsisoqarfiup nalugaa
Tamatuma kingorna Kommune Kujallermi illersuisup ilisimannittoq apeqqutinik arlalinnik aperaa.
Matumani Akileraartarnermut aqutsisoqarfimmut akiitsoqarnerlutik paasiniarlugu Sullissivimmut isernissartik ajornakusoortissimagaat, aamma ajornaatsuinnaanatillu paasiuminaassimasut Arne Ørbæk Skifte Andersen nassuiaavoq.
- Isertoqarsinnaappat akiitsoqarnersoq akiitsoqannginnersorluunniit ingerlaannaq takuneqarsinnaava, illersuisoq aperivoq.
- Uanga isumanni naamik, Arne Ørbæk Skifte Andersen oqarpoq.
Kommune Kujalleq kommunip akileraarutitigut akiitsoqarnera pillugu nammineerluni akileraartarnermut aqutsisoqarfimmut attaveqarsimasoq taanna nassuiaavoq. Akileraartarnermut Aqutsisoqarfimmiit eqqaasitsissummik tigusaqartoqarsimanersoq eqqaamanngilaa.
- Akileraartarnermut aqutsisoqarfiup attaveqannginnitsinni akiitsoqartoqarnersoq ilisimasimanngikkaa isumaqarpunga, Arne Ørbæk Skifte Andersen oqarpoq.
Siunnersuisartumik avataaneersumik atorfinitsitsineq
Kommune Kujallermi pisortaaniusimasoq Tine Pars ilisimannittutut tulliulluni killisiorneqarpoq. Taanna 2021-mi aggustimiit 2025-mi aasakkut isumaqatigiissut naapertorlugu atorfeqarunnaarnissani tikillugu kommunimi pisortaaniusimavoq.
Kommunip aningaasaqarnera pillugu paasissutissat tamarmik ukiorpassuarni aningaasaqarnermut pisortamit Kim Rosendahlimit pissarsiarineqartartut taanna oqaluttuarpoq.
Tine Pars aningaasaqarnermut tunngasunut atortorissaarut ajornartorsiutaasoq isumaqarami siunnersortimik atorfinitsitsisimalluni oqaluttuarpoq. Kommunip aningaasaqarnikkut ajornartorsiornera taama annertutigisoq tamatuma kingorna aatsaat maluginialersimavaa.
Taamaammat kommunip akileraartarnermut aqutsisoqarfimmut akiitsui qanoq amerlatigisut paasigamigit aamma tupaallassimaqaaq.
Tine Parsip akiitsoqartoqarnera sooq namminneq akileraartarnermut aqutsisoqarfimmut nalunaarutigissagitsik eqqarsaatigisimavaa.
Kim Rosendahlip Akileraartarnermullu Aqutsisoqarfimmi pisortap Qaqortumi 2022-mi ataatsimeeqatigiinnerat oqaluttuaraa, taannalu inussiarnisaarluni pulaarnertut oqaatigaa. Tassani akileraarutinut A-nut akiligassaqartoq akileraartarnermut aqutsisoqarfiup pisortaata oqaatigaa.
Ataatsimiinnerup kingorna akileraarutinut akiitsut pillugit Kim Rosendahlimit paasisaqaqqinngilaq.
Karsi imaqanngitsoq
Ilisimannittutut killisiorneqartoq tulliuttoq tassaavoq Kim Rosendahl, Qaqortup kommuniani kommunillu kattunnerisa kingorna Kommune Kujallermi ukiut 20-t sinnerlugit aningaasaqarnermut pisortaasimasoq. Taanna 2024-mi juulimi soraarninngorpoq.
Taanna aningaasaqarnermut atortorissaarut nutaaq ajornartorsiutaasoq ilisimannittut allat assigalugit oqaluttuarpoq. Taamaammat pisut ilaat paasinngitsoorsimavai.
Kommuni siunnersortimik 2023-mi atorfinitsitsisimavoq. Siunnersorti 2023-mi novembarimi Kim Rosendahlip allaffianut iserluni akileraartarnermut aqutsisoqarfimmi ernianut 3 million koruuninik akiitsoqartut ilisimaneraa aperaa.
- Ernianut akileraarutinullu akiligassaqartugut taamani aatsaat paasivara, taanna oqarpoq.
Kim Rosendahlip 2023 sioqqullugu ukioq ataaseq marlulluunniit sioqqullugit akileraartarnermut aqutsisoqarfik attaveqarfigisimallugu oqaluttuarpoq. Ataatsimiinneq kommunip aningaasakilliorneranut tunngavoq. Ataatsimiinnermi tassani suut oqaluuserineqarsimanersut eqqaamannginnerarpaa.
Tine Parsip 2022-mi akileraarutinik A-nik akiliisoqarsimannginnera pillugu ataatsimiinnermut nassuiaatigisaa oqaluuserineqarsimanersoq aperineqarpoq. Eqqaamasinnaaneraa aperineqarpoq.
- Naamik. Unneqqarillunga oqassaguma naagga, eqqaamanngilara. Tine Pars suli atorfinitsinnagu ataatsimiinneq eqqaamavaa.
Kim Rosendahlip 2023-mi ajornartorsiut novembarimi maluginiareeraalu sooq kommunip akileraarutit piffissaq eqqorlugu akilersimanngikkai unnerluussisup apeqqutigaa.
Taamanikkut aningaasaateqanngilaq. Karsi imaqanngilaq.
2023-mi novembarip kingorna akileraarutinik A-nik akiliisimanngitsusi Kommune Kujallermi ilisimaneqarpa?
- Oqarsinnaavunga karsi imaqanngitsoq.
Apeqqut paasiuminartuummat akisariaqaraa eqqartuussisoq akuliulluni oqarpoq.
- Aap. Oqarsinnaavunga aap. Aningaasaateqanngilagut, taamaammat akiitsutsinnik annikillisaajumalluta akiligassat naafferartumik akilernissaannut isumaqatigiissuteqarpunga.
Kingusinnerusukkulli erniat pillugit akiitsuusut oqaatigaa. Akileraarutit 2023-mi novembarip kingorna piffissaq eqqortoq akilerneqartartut oqaatigaa.
Akileraartarnermut Aqutsisoqarfimmi piginnaasakinneq
Ilisimannittutut killisiorneqartoq tulliuttoq tassaavoq kukkunersiuisoq 2023-mi ukiamiit 2025-mi apriilimut Kommune Kujallermi siunnersortitut namminersortutut sulisimasoq.
Kommunip aningaasaqarneranik nakkutilliisussatut atorfinitsinneqarpoq, kommunilu piffissaq eqqorlugu akileraarutinik akiliisarsimanngitsoq 2024-p ingerlanerani paasivaa, tamannalu kingorna taakkununnga ilisimatitsissutigaa.
- Kommunip tamanna eqqumaffiginngikkaa taakkualu isumaqarnerattut aningaasat akilerneqareersimasutut isigigaat isumaqarpunga, ilisimannittoq oqarpoq. Nalunaarutini kommunimit tupaallaatigineqartoq taanna oqaluttuarpoq.
Akileraartarnermut Aqutsisoqarfik akiligassat pillugit malittareqqiineq ajortoq taanna oqaluttuarpoq.
- Utaqqiinnarlutik allasismasut upperiinnartarpaat, tamannalu kukkuneruvoq, malittareqqiiniarlutik iliuuseqarneq ajorput, taamaalillutik akiitsulinnut akileeqqusineq ajorput.
Kommuni akileraarutinik akiliinnginnerminni akileraartarnermut aqutsisoqarfik attaveqarfigisimanngitsuugunikku akiligassinneqassanngikkaluartoq taanna isumaqarpoq.
Kommune Kujalliup akiliisimannginnini ilisimasimaneraa unnerluussisussaatitaasoq aperivoq.
Kim Rosendahlip kommunimilu akissarsianut pisortap aningaasat taakkua akilerneqarsimasut qularinngilluinnarsimagaat taanna oqaluttuarpoq. Kim Rosendahlip akileraarutinik akiliisimannginnerat ilisimasariaqaraluaraa taanna isumaqarpoq.
Nalaatsornerinnakkut akiligassiineq
Akileraartarnermut Aqutsisoqarfimmi atorfilik tulliulluni ilisimannittutut killisiorneqarpoq. Taanna kommuninut akiligassiissutinik suliaqaqataavoq.
Akiligassiinerit amerlanertigut akileraarutinik nakkutilliinermut atatillugu imaluunniit piffissaq eqqorlugu akileraarsimanngitsumik paasitinneqaraanni tunniunneqartartut taanna oqaluttuarpoq.
Akileraartarnermut aqutsisoqarfimmi piffissaq eqqorlugu akiliisimanngitsunik nalunaarsuisartoqanngitsoq ilisimannittoq oqarpoq.
Taamaammat piffissaq eqqorlugu akiliisimanngitsorpassuit tamarmik akiligassinneqarneq ajorput.
Kikkut akiligassinneqartarnerat nalaatsornerinnaanersoq Illersuisoq aperimmat ilisimannittoq angerpoq.
Taamaalilluni suliami ilisimannittut tamarmik killisiorneqarput. Eqqartuussineq ullup-qeqqata kingorna nanginneqarpoq, tassanilu illersuisut unnerluussisullu uppernarsaatit saqqummiutissavaat.
Abonnementer
Sermitsiaq.gl – Nittartagaq
- Sermitsiaq.gl-imi allaaserisat tamakkiisumik atuarsinnaalissavatit
- Qaammammut kr. 59.00
- Ukiumut kr. 650.00
Sermitsiaq - E-aviisi
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
AG - Atuagagdliutit E-aviisi
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-mi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
Sermitsiaq.AG+
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik iserfigisinnaalissavatit
- Arnanut e-magasinatut atuarsinnaalissavat
- Nutserisoq.gl atorsinnaanngussavat
- Soqutiginnikkuit abonnement@sermitsiaq.gl-imut allagaqarsinnaavutit
Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.
