Nunatsinni kommunit sisamaasut eqqagassalerineq pillugu ingerlatseqatigiiffiutaanni, ESANI A/S-imi pisortaq, Frank Rasmussen, ingerlatseqatigiiffimmi pisortaajunnaartoq, taarserlugulu ingerlatseqatigiiffimmi siulersuisuni siulittaasuusimasoq, Nicolai Odgaard Jensen, pisortanngortinneqartoq, Sermitsiap marlunngornermi allaaseraa.
Taama aalajangerneq ingerlatseqatigiiffiup siulittaasuata, Søren Sohn Krog Pedersen-ip, maanna nassuiaateqarfigalugu qisuariarfigaa. Nuummi Sisimiumilu ikuallaaviit nutaaliaasut, nunap sinnerani ilaanit eqqakkanik aamma ikuallaaffiusartussat, sanaartorneqareerlutik ingerlanneqarneri aallartisarneqarput. Taamaattumik ingerlatseqatigiiffiup sanaartorneq qimallugu ulluinnarni ingerlatsineq ukkatarisussanngoraa, siulittaasoq nassuiaavoq.
- Suliaq tamanna naammassineqarpoq, sanaartukkat tamarmik naammassineqarput atorneqalerlutillu. Taamaalilluni ESANI A/S ingerlatsinermik suliaqalissaaq, ilaatigut niuernikkut aningaasatigullu naleqqussaanerit pitsanngorsaanerillu sammineqangaatsiassapput.
- Taamaattumik siulersuisut ingerlatseqatigiiffiup maannamut aqutsisui oqaloqatigereerlugit isumaqatigiillugillu aalajangerput ESANI A/S-ip nutaamik allatut piginnaasaqartumik pisortartaarnissaa naleqquttuusoq, Søren Sohn Krog Pedersen oqarpoq.
ESANI A/S kommuninit ukuninnga pigineqarpoq: Kommune Kujalleq, Kommuneqarfik Sermersooq, Qeqqata Kommunia aamma Kommune Qeqertalik.
