- Siunissarput taxani isumaqatiginninniutaasinnaanngilaq. Aamma pisiarineqarsinnaanngilaq. Pissusilersuutaasoq akuerinngilluinnarpara, Naalakkersuisut Siulittaasuat, Jens Frederik Nielsen (D), amerikamiup Nuummi aqqusinermi naapitaminik aningaasanik pissarsititserusunnera pillugu taama qisuariarpoq.
Sermitsiap angut amerikaminngaanneersuunerartoq Nuummi atsiornernik katerserusuttoq pingasunngornermi oqaluttuaraa.
Angut amerikamiu Nuummi naapitani Kalaallit Nunaata USA-mut ilanngunneqarnissaannik akuersaartut atsiortikkusukkai takunnittuusut oqaluttuarput. Atsioreernerullu kingorna 200.000 dollarinik atsiortoq aningaasannakkumaartoq ilisimatitsisarsimasoq Sermitsiap tusarfii oqaluttuarput.
Naalakkersuisut: Tuniniagaanngilaq
Tamanna Naalakkersuisut Siulittaasuata pissusissamisoortutut isiginngilaa.
- Kalaallit Nunaat tuniniagaanngilaq. Tamanna oqaatigisariaqanngikkaluarpoq. Ajoraluartumilli taama pisariaqarpasippoq. Inuk allamioq Nunarput nunamut allamut ataanut inissinneqarnissaa pillugu Nunatsinni atsiornernik katersivoq, aningaasanik tunniussiniarluni.
- Inuiaat taamatut pineqartussaanngillat. Taamatullu nunamut pinnittoqartussaanngilaq. Inuiaqatigiiuvugut tamat oqartussaaqataanerat aallaavigalugu aqutsiffiusoq, Jens Frederik Nielsen Facebookkimi quppernermi allappoq.
Pissuseq akuerinngikkaa
Naalakkersuisut Siulittaasuata amerikamiup Nuummi pissusilersuutaa akuerinngilaa. Taanna ataqqinninnermik takutitsivigineqarnissamik naatsorsuuteqarpoq:
- Pissusilersuutaasoq akuerinngilluinnarpara. Aamma naatsorsuutigaara nunat tamalaaniit ataqqinninnermik takutitsisoqassasoq, nunammi tamavimmik taamatut pineqarnissartik piumasaqaatigaat, Naalakkersuisut Siulittaasuat allappoq.
