Amerikamiu niuertoq Drew Horn Kalaallit Nunaanni suliniutini arlalinni, ilaatigut Kangerlussuarmi qarasaasianik atortorissaarutinik atortulersuinermik erngup nukinganik nukissiorfiliornissamik pilersaaruteqarluni peqataavoq.
Drew Hornip pilersaarutai, ilaatigut Donald Trumpip præsidentiunerani siullermi USA-p nukissiornermut naalakkersuisoqarfiani siunnersortaasimanera pissutigalugu, soqutigineqarluarput.
Drew Hornip pisortani atorfini namminersorlunilu niuernermi soqutigisani akuleriissillugit atorsimanerarlugit inatsisitigut isumaqatiginninniarnermigut 59.000 dollarinik, tassa danskit aningaasanngorlugit 380.000 koruuninik, akiliisimasoq danskit tusagassiorfiat Berlingske ataasinngornermi allappoq.
Isumaqatigiissut USA-mi inatsisinik atortitsinermut ministereqarfiup juulimi 2025-mi tusagassiuutinut nalunaarummi siornatigut tusagassiuutini saqqummiunneqarsimanngitsumi eqqaavaa.
Horn: Unammillertit eqqunngitsumik unnerluutiginnipput
Horn suliamik aalajangersimasumik ingerlatsiviup namminersortup aningaasaqarnikkut soqutigisaanik sunniuteqartumik 2021-mi januaarimi suliaqarsimasoq, tamatumalu saniatigut naalagaaffimmut tunngasuni soraarninngortussaaguni siunnersortitut akissarsiaqartutut sulilernissaminut isumaqatigiissuteqarnissaminik isumaqatigiinniartoq Inatsisinik atortitsinermut ministereqarfik allappoq.
Drew Hornip akiligassineqarnissani akuerigaa isumaqatigiissutip ilaanut ilaavoq, tamannali pisuussutiginngisaannaraa, Drew Hornittaarlu akisussaaffimmik tigusisimanngitsoq erseqqissarneqarpoq.
Drew Hornip pisuutinneqarani isumaqatigiissuteqarsimalluni Berlingskemut oqaatigaa:
- Unammillertima soqutigisat akerleriissutaannut tunngatillugu maleruagassat unioqqutinnerarlugit eqqunngitsumik unnerluutiginiaraluaraannga Isumaqarpunga, Drew Horn Berlingskemut oqarpoq.
