Misissueqqissaarneq nutaaq meeqqat inuusuttullu angerlarsimaffiup avataanut inissinneqartartut kiisalu suliniummut aningaasartuutit attuumasut pillugit qulaajaaffiuvoq.
Misissueqqissaarneq Deloittep Naalakkersuisunut suliaraa, tassanilu ilaatigut 2024-mi kisitsisit tunngavigalugit pissutsit qanoq innerannik qulaajaaneq suliarineqarpoq.
Kalaallit Nunaanni innuttaasut 0 23-illu akornanni ukiullit 5 procentingajaat 2024-mi angerlarsimaffiup avataanut inissinneqaqqasut, Deloittep naatsorsuinerata inerneraa, tassani ukioq tamaat ukiulluunniit ilaani.
Taakku meeqqanik inuusuttunillu 935-nik naleqarput. Danmarkimi taakku 1 procentit missaanniittut, misissueqqissaarnermi allassimavoq.
Ilisimasanik eqqortunik pilersitsinissaq ajornakusoorlunilu piffissartornarsimasoq, taamatullu aamma “inissiisarnermut immikkoortumi paasissutissat tutsuiginarnerusut suliniarnerup nukittorsarnissaanut alloriarneq siulliusoq pingaaruteqartorlu”, Deloittep erseqqissaatigaa.
Aningaasartuutit annertusiartortut
Kisitsit imminerminni 2020-p kingorna 6 procentinik annertuseriarput, aningaasartuutillu 2018-p kingorna annertuumik qaffariarput:
- 2018-mit 2024-mut inissiisarnermut immikkoortumi aningaasartuutit 50 procentit missarpiaannik qaffattut, Deloitte allappoq.
Koruuninngorlugu 2024-mi 687 mio. kr-t atorneqarput, Deloittelu naapertorlugu taakku nunami tunisassiat pilersinneqartut tamarmiusut 3 procentingajaannik – imaluunniit 0-nit 23-nut ukiulimmut 38.500 kr-t missaannik naleqarput.
- Tamanna Danmarkimi sulissuteqarfigineqartunut innuttaasumut ataatsimut agguarlugu marloriaammit annertunerupput; tamatumani Danmarkimi pinaveersaartitsinermut aningaasartuutilluunniit ilanngukkaluaraanni, nalunaarusiami allassimavoq.
Misissueqqissaarneq naapertorlugu ulloq unnuarlu angerlarsimaffinnut imminut pigisunut aningaasartuutit 2018-mit 2024-mut aningaasartuutit qaffariarnerannut patsisaapput.
- Piffissami tassani ulloq unnuarlu angerlarsimaffinnut imminnut pigisunut aningaasartuutit 80 procentit sinnerlugit qaffariarput. 2021-p kingorna ilaqutarsianut aningaasartuutit aalaakkaasuukannerput, annikitsumillu appariartorlutik, Deloitte allappoq, taakkulu ilaqutarsiat ulloq unnuarlu angerlarsimaffinnut inissiinernit akikinnerujussuunerat erseqqissaatigaat.
Kaammattuut ilaqutarsianngornissaq pilerinarsarneqarli
Misissueqqissaarneq politikerinut amerlasuunik kaammattuuteqarpoq, ilaatigullu nunatsinni ilaqutarsiat atugaasa pitsaanerulersinnissaat taamaattuunerullu pilerinarnerulernissaa.
Ilaatigummi tamanna inisseeriaasiuvoq akikinneq, Deloittellu misissuinera malillugu meeqqat ilaqutarsianut inissinneqartut atugarissaarnerusarnerat tikkuarneqarpoq.
Ilaqutarsiat atugaat arlalitsigut pitsanngorsaavigineqarsinnaapput, assersuutigalugu aningaasatigut ajunngitsorsianik annertuliinikkut kiisalu ilaqutarsiat annertunerusumik ilinniartinneqartalernerisigut, taamaalilluni meerarsiat ajornartorsiutinik nassataannik passussilluarsinnaalerulersillugit.
Misissueqqissaarnermissaaq ilaqutarsiat inissianik naleqquttunik pissarsisinnaanerat taaneqarpoq, tamatuma ilaqutariit meeqqamik ataatsimik arlalinnilluunniit annertusineqarnissaat pisinnaanngortissammagu.
Immikkoortumik misissueqqissarneq tamarmiusoq Naalakkersuisut nittartakkakkut qupperneranni atuarneqarsinnaavoq.
