Nuuk siullermeertumik ukioq naallugu Kalaallit Nunaanni silaannakkut angallannermi qitiutinneqarmat ukiup siulia silaannakkut angallannermut tunngatillugu immikkut ittuuvoq.
Ukioq Air Greenlandimut aamma unammillernarpoq. Ingerlatseqatigiiffiup ataatsimeersuarnissaanut atatillugu angusaqarluarsimaneq ataasinngornermi ullaap tungaani nalilersorneqarlunilu siunissamut qiviarfiuvoq.
- 2026 qiviaraangatsigu maniguulluta mianersorlutalu isumalluartumik isiginnittaaseqarluta qiviartarparput, siulersuisuni siulittaasoq Malik Hegelund Olsen oqarpoq.
– Ingerlatsiviup aalajaannerulernissaa, aningaasaqarnikkut angusaqarluarnerunissaa piginnaasanillu atuilluarnerulernissaq taamatuttaarlu Qaqortumi Ilulissanilu mittarfiit nutaat ammarnerisigut kiisalu A320neo-mut Unaamut, 2027-mi Københavnimiit toqqaannartumik Ilulissanut timmisartuussisalimmut aningaasaliinikkut aaqqissuusseqqinnermut naleqqussarnissarput naatsorsuutigaarput.
Siorna silarluttarnera Nuummilu mittarfimmi unammillernartoqarnera pissutigalugit timmisartuussinerit ajornartorsiorput, tamannalu ukiup amigartoorfiunissaanut ilimasutsitsivoq.
Sila ukiup affaani kingullermi pitsaanerulerpoq, tamannalu 3,3 million koruuninik sinneqartoorfiulaarpoq.
– Aallartinnerlioraluarluta tulliani ajugaavugut, pisortaaneq Jacob Nitter Sørensen sulorarnermit assersuusiorluni Naalakkersuisut siulittaasuannut Jens-Frederik Nielsenimut (D) oqarpoq.
Arnaq alla siulersuisunut ilaasortanngortoq
Jens-Frederik Nielsen Air Greenlandip Namminersorlutik Oqartussanit pigineqarneranut politikkikkut akisussaasuugami siulersuisunut ilaasortanngortussamik toqqaavoq.
Najaaraq Christiansen, Ini A/S-imi aningaasaqarnermut pisortaasoq, allaffissornermi aningaasaqarnermilu qaffasissumik ilinniagaqartoq, ilaasortanngorpoq. Taanna ataatsimeersuarnermi peqataasinnaasimanngilaq.
Najaaraq Christiansenip Bodil Marie Damgaard, ukiuni qulini siulersuisuni ilaasortaareerluni tunuartoq, kingoraarpaa. Taanna 2020-miit 2024-mut siulittaasuuvoq, ingerlalluarnerminilu Air Greenlandimit politikkikkullu nersualaarneqangaarluni.
- ingerlatseqatigiiffiup ineriartortinnissaanut, sulisunut inuiaqatigiinnullu akisussaanermut tunngatillugu ukkatarinninnerput pillugu iliuuseqarlutit suliniuteqarninnut qujanaq, Jens-Frederik Nielsen oqarpoq.
Jens-Frederik Nielsenip Air Greenlandip isorliunerusuni qulimiguulimmik assartuinerup pingaaruteqarnera aamma erseqqissarpaa.
Naak annikitsumik sinneqartooruteqartoqaraluartoq angusaq Air Greenlandimut naammaginanngilaq. 2025-mi 65-75 millionit koruuninik sinneqartooruteqarnissaq naatsorsuutigineqarsimagaluarpoq.
Air Greenlandip pisortaanera naapertorlugu aningaasaliinerit ingerlatiinnarnissaat akiitsullu ukiuni kingullerni timmisartut nutarterneqarnerannut atatillugu annertusiartuinnarsimasut akilerneqarnissaat eqqarsaatigalugit ukiumut 80-100 millionit koruuninik sinneqartooruteqarnissaq kissaatigineqarpoq.
2026-mi sinneqartoorutissat 60-70 millionit koruuniunissaat naatsorsuutigineqarpoq.
