Arctic Winter Gamesimi nerrivimmi arsaararnermi pingasunngornermi ajugaanniutivinnerit isiginnaarlugit marloqiusaasutut misigisimanissaq ajornaqaaq.
Kuultinnanniunnerni sisamani tamani bronzennanniunnermilu ataatsimi kalaallit unammeqataapput. Ajugaanniutivinnernilu marlunni allaat Kalaallit Nunaat Kalaallit Nunaannut unammivoq.
Taamaalilluni kuultinik sisamanik, sølvinnik marlunnik bronzemillu ataatsimik ujaminnattoqarpoq.
Tamannalu sungiusaasup Jan Bernerip naammagisimaarluinnarpaa.
- Kuultinnatassani sisamani sisamat pissarsiarineqarput, tamannalu nuannerpoq. Nammineerlunga marluunissaat ilimagisimagaluarpara, marlulli allat pissarsiarigatsigit nuanneqaaq, taanna oqarpoq.
Nukappiaqqat niviarsiaqqallu 15-it inorlugit ukiullit unamminerminni periaatsiminnik sungiusarsimassusiannik nersualaarpai.
Kalaallit ingerlalluartut
2023-mi AWG-eertoqarnerani assingusumik pisoqarsimavoq, tassani Erfalasorput arlaleriarluni ujaminnattarfimmi takussaavoq. Kalaallit nerrivimmi arsaarartartut 2024-mi peqataasimanngillat, ukioq mannali tamaviaarlutik uterput.
Taamaammat timersoqatigiit allat malinnaanissaat ajornakusoorsinnaavoq.
- Iligiinni tamani pikkorissunik unammisartoqarpoq, amerlasuulli suli ilikkagassaqarput. Unammisartakkatsinnulli naligipajaakkatsinnut ajugaasarpugut, Jan Berner oqarpoq.
Nerrivimmi arsaararnermi iligiiaarluni ataasinngornermi pissartanngorniuttoqarmat Kalaallit Nunaat pingasunik kuultinnallunilu ataaseq sølvinnappoq.
Kisianni nerrivimmi arsaarartartut ikittuinnaat kalaallinut unammillersinnaappata, taava AWG-mi peqataaneq taakkununnga naammattumik unammillernartuussava?
- Siullermik angerlarsimaffimminni sungiusarnermik ingerlatitseqqinnissamut isumassarsisinneqarumaartut eqqarsarpunga, Jan Berner oqarpoq unammisartullu pikkorinnerulernissaminnut isumassarsisinneqarnissaat neriuutigaa.
Sisamanngornermi tallimanngornermilu unammisoqaqqissaasoq
Uiloq Dahl pingasunngornermi kuultinnattut ilagaat. Niviarsiaqqat 18-init inorlugit ukiullit unammimmata timersortartoqatini Uiloq-Amaliannguaq Jakobsen unammigamiuk aallartinnermit ajugaaniutivinneq siuttuuffigaa.
- Ajunngilanga. Suli pissangalaarpunga, Uiloq Dahl kingorna Sermitsiamut oqarpoq.
Sisamanngornermi arnat angutillu iligiiaarneranni unammissagami ajugaanissani neriuutigaa.
Sungiusaasullu Jan Bergerip unammisartut neriuuteqarfigai, oqajaarnianngilarli.
- Ullumi ajugaagatta isumaqassanngilagut aqagu suut tamaasa ajugaaffigissallugit, ilunguersussaagulli, taanna oqarpoq.
Tallimanngorpat arnat angutillu iligiiaarlutik unammineranni ajugaanniutivittoqassaaq.
