Elias Nordahl, Sasja Joelsen Henriksen, Marika Magnussen aamma Qunnaaq Jensen ujakkaartartut piukkunnartut Norgemi Lillehammerimi inuusuttut nunarsuarmi pissartanngorniunneranni marsip aappaani peqataassapput. Kalaallit inuusuttut sisamat taakku sprintimut, 10 kilometerimut, 20 kilometerimut kiisalu arnat angutillu iligiillutik stafet-erneranni unammissapput, tassanilu nunarsuarmi ujakkaartartut nukittunerpaat unammissavaat.
Nunanut allanut unammisartut Danmarkimi sisorartartut kattuffiata ataani peqataagaluarlutik pissartanngorniunnermi kalaallit erfalasuannik atisaqartussaapput. Unammisartut atisat taakkua tulluusimaarutigingaarpaat, kalaallillu isiginnaariat arlallit Lillehammerimut tapersersuiartorniarlutik angalanissamut piareersimallutik nalunaareersimapput.
Nunanut allanut unammisartunut sungiusaasup Martin Møllerip ineriartorneq tamanna tulluusimaarutigeqalugu oqarpoq.
- Ukiuni kingullerni qanoq siuariartortigisimanerat takullugu tupinnaqaaq. Pimoorussipput, sungiusartuarsimallutik piumassuseqarnertillu takutissimallugu. Ineriartornerat tulluusimaarutigaara, Martin Møller oqarpoq.
Peqataaneq tamanna kalaallit sisoraatinik oqilaniunnerannut nutaamik aallartiffiusinnaasoq aamma erseqqissarpaa.
-Tamanna kalaallit sisoraatinik oqilaniuttartut nunani tamalaani unammisartunut qaffasinnerpaanut ilannguteqqinneqarsinnaalernerannik nutaamik aallartiffiusinnaasoq isumaqarpunga. Kalaallit Nunaata avataani unammisalerniaraanni sapiissuseqarnissaq ilungersorluni sulissutigisariaqarpoq, taamaaliortarpullu. Neriuppunga tamanna nunatsinni inuusuttunut ujakkaartartunut amerlanerusunut isumassarsisitsissasoq, nunanut allanut sungiusaasoq oqarpoq.
Inuusuttunut VM timersortartut inuusuttut sisamat taakkua nunani tamalaani unammiuaarnermi piginnaanimik misilinnissaannut pingaarutilinnillu misilittagaqalernissamut periarfissatut isigaat. Maanna Lillehammerimi unammillernissartik aallartikkunillu sapinngisaminnik tamakkiinissartik qilanaaraat.
