Isumaginninnermut Aqutsisoqarfik ukioq manna juunip aallaqqaataaniilli oqartussaaffimmut allamut nuunneqassasoq inatsisissatut siunnersuummi Naalakkersuisunit tusarniaassutigineqartumi allassimavoq.
- Suliniutit ataqatigiinneri nukittorsarniarlugit isumalluutinillu sunniutilimmik atorluaanissaq qulakkeerniarlugu Naalakkersuisut Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik aamma Isumaginninnermut Aqutsisoqarfik aaqqissuussaanikkut ataatsimoortilerniarpaat, inatsisissatut siunnersuummi oqaaseqaatini allassimavoq.
Nassuiaat
Allannguutissami siunertatut ”suliassat akornanni suleqatigiinneq nukittorsarniarlugu innuttaasullu pisariaqartitaannik takussutissiisunik inatsisitigut ersarinnerusumik atuutilersitsinissaq pillugit Naalakkersuisut siunnersuuteqartut” paasissutissiissutigineqarpoq.
- Ilutigitillugu pisortani suliffeqarfiit ikilisinneqassapput, tamannalu isumaginninnermi meeqqanut, inuusuttunut ilaqutariinnullu eqaannerusumik sunniuteqarnerusumillu sulinissamut periarfissiissalluni.
Suliassat
Isumaginninnermut aqutsisoqarfik ingerlatsinermi ineriartortitsinermilu assigiinngitsorpassuarnik ullumikkut suliassaqarpoq:
Allannguuteqarnerup kingunerisaanik meeqqanut inuusuttunullu isumaginninnermi allaffissornikkut ingerlatsineq annikinnerulerumaartoq inatsisissatut siunnersuummi nutaami oqaaseqaatini erseqqissarneqarpoq.
Aningaasat sipaakkat killeqartut
- Pisortani ingerlatsiviit ilanngarneqassammata siunnersuutip pisortani allaffissornikkut pitsaasumik sunniuteqarnissaa naatsorsuutigineqarpoq. Suliassap isumagineqarnerani aaqqissuussaanikkut pisariinnerusumik ingerlatsinissamut tunngavissaqalernissaa naatsorsuutigineqarpoq, allassimavoq.
Siunnersuut Namminersorlutik Oqartussanut annikitsuinnarmik sipaarutaassasoq oqaatigineqarportaaq.
