KNQK-p siulittaasua Mikkel Jeremiassen Mathias Petersenimut marlunngormat sianerpoq.
KNR-TV-p sulisui Avannaata Qimussersuanut aallakaatitsiartortussaagaluit, Folketingimut qinersinissaq peqqutigalugu Qasigissiarsinnaajunnaartut paaseqqammerpaa.
Aallakaatitsinissalli piviusunngornissaanut suli periarfissaqartoq paasitinneqarsimagami ikiortissarsiorpoq. Piviusunngussappat 70.000 koruunit pisariaqartinneqarput.
Aningaasat taama amerlatigisut piffissap sivikitsuinnaap iluani katersornissaat inuppassuarnut imaaliallaannagassaagunanngilaq.
Tassaniluuna TikTokertartoq Mathias Petersen, aamma ikiortarialinnut aningaasanik katersuiniussisareersoq, Mikkel Jeremiassenip eqqarsaataanut puttuttoq. Mathias Petersen sianerfigineqarami aalaniapallappoq.
- Marlunngormat ullukkut sianerpoq. Pissutsit eqqaammagit ingerlaannaq iliuuseqarusullunga aallartippunga. Ingerlaannaavik liverlunga (toqqaannarluni aaqq.) aallartikkama malinnaasunut suna siunertarinerlugu paasitippara, Mathias Petersen oqaluttuarpoq.
Aningaasaleerusuttut imaaginnavipput
TikTokikkut toqqaannartumik aallakaatitsilluni katersuiniarnerup saniatigut Mathias Petersen allanik ikiorteqarluni suliffeqarfinnut aningaasaliisussarsiorluni mailimik nassiussuivoq. Inuit ataasiakkaat suliffeqarfiillu tapersersuinerat ersarippoq.
Marlunngornermi katersuiniarneq aallartimmat pisariaqartinneqartut 70.000 koruut sinniinnarlugit 76.558 koruunit katersorneqartut sisamanngornermi paasinarsivoq.
Mathias Petersenip katersat anguneqartut paasilerlugit killitsilluni qullilisoq TikTokikkut videomi takuneqarsinnaavoq.
- Uummateqarfigivara, aamma ikiuunnissamut pisussaannartut misigisimavunga ikiuuttariaqarlunga. Kalaallit kulturiannut atalluinnarmat pingaartitseqataasunut ilaagama, Mathias Petersen oqaluttuarpoq.
Namminersortoq aallakaatitsissaaq
Mathias Petersen TikTokeqatigisartakkanilu aningaasanik katersuiniussisareerput. Nammineq oqaluttuarnera malillugu 600.000 koruunit missaanni katersuiniarnerminni katersornikuuaat.
Siuliatigut katersuiniuttagai tassaapput inuit ataasiakkaat ikiorasuarneqarnissamik pisariaqartitsisut. Assersuutigalu peruluttut, ikuallattoorsimasut, qanigisaminnik toqusoorsimasut assigisaanilluunniit ikiortariallit.
Sooruna ikiuukkusuttarpit?
- Qanoq oqaasertalissanerlugu naluara. Kisianni akisussaaffittut pisussaaffittullu isigiinnartarpara. Inuiaqatigiinnut ikiortarialinnut iliuuseqaannartarpunga.
Maannali katersai Avannaata Qimussersuata marsip 28-ani aallakaatinneqarnissaanut atorneqartussanngorput. Filmiliortartoq namminersortoq Anders Berthelsen Qasigiannguanut aallakaatitsiartussaaq. KNQK-p siulittaasua Mikkel Jeremiassen sukkaniuuttut aallakaatinneqartussanngormat katersuiniartumut qujamasuppoq.
- Nuannaartorujussuuvunga. Aamma toqqissiallannarpoq. Torrak iluatsittussanngortoq, Mikkel Jeremiassen oqarpoq.
KNR: - Ikiuussinnaaffitsinni ikiuuppugut
Folketingimut marlunngorpat marsip 24-ani qinersissaagut, Avannaata Qimussersuaaraa marsip 25-ani pissaaq Avannaatalu Qimussersua marsip 28-ani pissalluni.
Pisut imminnut qaninnerat peqqutigalugu sulisut atortullu kingusippallaamik Qasigiannguanut tikissammata KNR-ip sulisui aallakaatitsiartorsinnaanngitsut KNR-TV-p pisortaa Mathias Davidsen nassuiaavoq. Qinersinermi malinnaatitsinissaq pingaarnersiuinermi siulliunneqartariaqarsimasoq taassuma aamma oqaluttuaraa.
Toqqaannarnissamulli nassitsissut KNR-TV-p pigisaa atorlugu Avannaata Qimussersua aallakaatinneqassaaq. Aammali misilittakkatik piareersaatimillu killiffii pillugit aallakaatitsisussamut ingerlateqqissavaat.
- Ikiuussinnaaffitsinni ikiuuppugut, Mathias Davidsen oqarpoq.
Namminnerli pisinnaajunnaaramik KNQK-p aallakaatitsisussallu akunnerminni isumaqatigiinneratigut, minnerunngitsumillu katersuiniartoqarnera qujamasuutigaat.
- Kusanartorujussuuvoq, aamma takutiinnarpaa Avannaata Qimussersuanut soqutiginnittorpassuaqartoq, Mathias Davidsen oqarpoq.
Mathias Petersen allallu Avannaata Qimussersuanik soqutiginnittut taamaalillutik malinnaasinnaalerput. Katersuiniarluni qulakkeerinneqataasoq malinnaanissaminut qilanaaqaaq.
- Pingaarutilerujussuartut inissisimajuaannarpoq, aamma ulloq taanna pissangassutigiuaannarpara, Mathias Petersen oqarpoq.
