Suaat akii qaffarujussuartut: Kiilumut 52 koruuneqalersut

Kitaani sinerissap qanittuani nipisat suaat ukioq manna 1.327,3 tonsit pisassiissutigineqarput, taakkulu aqutsiveqarfinnut arfineq-marlunnut agguaanneqarput. 

Aqutsiveqarfinni tamani nipisanniarneq aallartereerpoq. Kisiannili sinerissami aalisartut piniartullu peqatigiiffii tunitsiviillu Sermitsiamiit oqaloqatigineqartut paasissutissiinerat naapertorlugu, ukioq manna piffissap taamaalinerani silap nillernera unerisimannginneralu peqqutaalluni aalisarneq tunisassiornerlu suli tamakkiisumik aallartinngilaq.

Taamaakkaluartoq nipisat suaat ukiut siuliinut naleqqiullugu maanna aatsaat taama qaffasitsigisut aamma oqaatigineqarpoq. Tamannalu nunarsuarmi niuerfinni assigiinngitsuni nipisat suaasa piumaneqarluarnerannik aammalu suaat piujuaannartitsinissaq aallaavigalugu MSC-mik (Marine Stewardship Council) meqqeqarnerannik, minnerunngitsumillu Nuummi tunitsiviit sakkortuumik unammilleqatigiinneranik peqquteqartoq, Nuummi aalisakkanik tunisassiortuniit oqaatigineqarpoq.

Akit qaffakkiartortut

Nuummi suliffeqarfiit aalisakkanik nipisallu suaannik tunisassiortut ukioq manna sisamaapput, taassaasut Royal Greenland A/S, Nuuk Fisk (Polar Raajat A/S-imut ilaasoq), Unik Seafood Greenland A/S aamma suliffeqarfik nutaaq Arctic Roe ApS.

Nipisat suaannik tunisinermi akigitinneqartussap minnerpaaffissaa 35 koruuniussasoq, Arctic Roe ApS-ip aamma KNAPK-p akunnerminni martsi naasoq atsioqatigiillutik isumaqatigiissutigaat. Tamannalu ilaatigut peqqutaaqataalluni aalisakkanik tunisassiorfiit nipisat suaasa akii pillugit unammilleqatigiinnerat sakkortooq aallartippoq.

Maannakkut Nuummi Royal Greenlandimi Nuuk Fiskimilu nipisat suaannik tunisinermi kilomut 50 koruuni, qaavatigullu tapeq 1 koruuni akigitinneqarpoq. Unik Seafood Greenlandimi kiilumut 50 koruuni, ataavartumillu tunioraasunut 2 koruuni tapigitinneqarpoq. Arctic Roe akigitinneqartut pillugit oqaaseqarusunngilaq.

Akit iluarisimaarneqartut

Nuummi aalisartut piniartullu peqatigiiffiisa marluusut aappaani Neqitani Karl Kristian Kruse siulittaasuuvoq. Peqatigiiffimmi ilaasortat amerlanerpaartaat maanna nipisanniarput, tamannalu suaat akigissaarnerannik ilaatigut peqquteqartoq, taassuma oqaatigaa.

- Nipisat suaat MSC-mik meqqilerneqarmata akitsorumaartut oqaatigineqarnikuuvoq, kisiannili ukiut arlallit akit appasittorujussuunikuupput.

- Ukioq manna nipisanniarneq silamik peqquteqartumik suli iluamik aallartinngilaq. Ukiulli siuliinut naleqqiullugu akit maannakkut qaffasinnerungaatsiarnerat aalisartuniit iluarisimaarneqarpoq, Karl Kristian Kruse, siornatigut aalisarnermut piniarnermut nunalerinermullu naalakkersuisuunikuuvoq oqarpoq.

Aalisartulerngusaanneq ajunngitsorsiassallu

Nuummi aalisakkanik suliffissuit nipisat suaannik tunioraasussanik qulakkeerinninniarlutik aalisartunik ataatsimeeqateqartarsimasut, Karl Kristian Krusep oqaatigaa.

- Tunisisartussanik qulakkeerinninniarnerit maanna ingerlanneqarput. Aammalu tunitsivimmut aalajangersimasumut tunisisaraanni ajunngitsorsiassat assigiinngitsut, allaat ilaatigut tunitsivimmut piginneqataalersinnaanermut tunngasut, neqeroorutigineqartartut tusarparput.

- Pissutsit taamak ittut nutaajupput, tamannalu nipisat suaasa aappaagu aamma qaffasissumik akeqarnissaannut sunniuteqarumaartoq neriuutigaarput, Karl Kristian Kruse oqarpoq.

Taanna maannakkut qaleralinniarpoq. Nuummi tunitsivimmut sumut tunisineq apeqqutaalluni, qaleralinnik tunisinermi kiilumut 33 koruuni tikillugu akigitinneqarpoq.

Suaat piumaneqarluartut

Unik Seafood Greenlandip pisortaata Mark Kristiansenip oqarnera naapertorlugu, piffissami matumani silap nillernera unerisimannginneralu peqqutaalluni, nipisat suaannik tunisineq suli tamakkiisumik aallartinngilaq. Ukiorli manna akit qaffasinnerat assigiinngitsunik peqquteqartoq, taassuma erseqqissaatigaa.

- Kiilumut akigitinneqartoq 50 koruuni siornatigut angungajannikuuaa. Maannakkulli nunani allani Islandimilu nipisat suaat uninngasuutigineqartut amerlajunnaarsimapput, tamannalu suaat maanna piumaneqarluarnerannik akillu qaffasinnerunerannik ilaatigut kinguneqarpoq.

- Pissutsit taamaannerat atorluarneqartariaqarpoq, naluarpummi aappaagu aamma taamaassanersoq, taanna oqarpoq.

Tunisat amerlassappata tunitsiviup aalisartullu akornanni pitsaasumik tatigeqatigiiffiusumillu suleqatigiinnissaq pingaaruteqartoq, pisortap ilanngullugu erseqqissaatigaa.

Nunatsinni tuniniarneqartut

Nipisat suaat Unik Seafood Greenlandimut tunineqartut Europami nunanut assigiinngitsunut tunineqartarput aammali suaat poortoreerlugit nunatsinni Brugsenimut tunineqartarput.

- Nipisat suaannik piariikkanik nunatsinni tuniniarneqartussanik tunisassiortuuvugut, tamannalu pingaartilluinnarparput, Mark Kristiansen oqarpoq.

Unik Seafood Greenlandip Nuummi aalisakkanut suliffissuaataanut 14-inik sulisoqartumut, nipisat suaat 20 tonsit missaat siorna tulaanneqarput. Taassuma saniatigut saarulliit, qalerallit, suluppaakkat tupissutillu tunisassiarineqartarput.