Qaanaami takornariaqarnerunissaa kissaataavoq – takornariarniaraluartulli tikinngitsoortarput

Qaanaami apriilimiit maajimut takornariaqarnerpaasarpoq, tamanna piniartut saniatigut isertitaqarnissaminnut periarfissaqarfigisarpaat. Angallannikkullu pitsanngorsaasoqarnissaa takornarialerisunit kissaatigineqarpoq.

Ileqqutoqqanik misigisaqarniarluni takornariartarneq, tuluttut ”authentic experience”-mik taaneqartartoq, nunarsuarmi soqutigineqaleraluttuinnartoq Qaanaami aamma malugineqarsinnaasoq, takornarialerinermik suliffeqarfiutilik oqarpoq.

- Ileqqutoqqanik misigisassarsiorniarluni takornariaqarneq (Authentic experience tourism, aaqq.) nuannarineqaleraluttuinnarpoq tamannalu takornarialerinermi siunissaavoq. Takornarissat amerlasuut allaanerusumik kulturimik misigisaqarnissartik soqutigisorujussuuaat, tamannalu Qaanaami misigineqarsinnaavoq, Saki Daorana takornarialerinermik suliffeqarfiutilik oqarpoq.

Qaanaami piniartut takornarianik qimussimik angallassinissamik misilittagaqarluarput.

- Piniartut tuluttut qallunaatulluunniit oqalussinnaanngikkaluarlutik pikkorissorujussuupput. Takornariap qimussimik angalaareerluni orninnikuuaanga oqaluttuullunga, aatsaat taama pitsaatigisumik nuannertigisumillu nunarsuarmi assissaqanngitsumik misigisaqarsimalluni, Saki Daorana oqaluttuarpoq.

Qimussimik angallassineq 

Qaanaamiit Siorapalummut Qeqertanullu, sermersuakkut itivinnertalerlugu qimussimik takornarissanik angallassisoqartarpoq.

- Qimussimik angalaaruttarpagut nunaqarfinnut marlunnut, Qeqertanut Siorapalummullu, arlaat takorusunneraat apeqqutaalluni. Kangerluarsukkut Iterlassuarmut sermikkut itivissullugit qimussiuttarpagut, takornarissat alutorinerpaasarpaat sermikkut itivinnertik, Adolf Simigaq piniartoq qimussimik angallassisartoq oqaluttuarpoq.

Takornariat nunanit assigiinngitsuneersut tikittarput.

- Assiliisut, filmiliortut ilisimatusartullu tikittarput, qimusseriartorlutik, imaluunniit sikup sinaani qilalugarniarnermik misigisaqarusullutik, Saki Daorana nassuiaavoq.

Takornariaqarneq piniartut aningaasanik isertitsinissaannut pingaaruteqarpoq

Qaanaami aalisartunut piniartunullu qaleralinnik mattannillu tunitsivimmut tunisineq annerusumik aningaasatigut isertitsissutaasarpoq.

- Aningaasarsiornissamut periarfissat ikittuararsuupput. Piniartut kulturikkut ingerlatsillutik saniatigut takornariaqarnikkut isertitaqarnissaanni suleqataanera tulluusimaarutigaara, Saki Daorana oqarpoq.

Piniartut takornarianik angallassinissaminnut pilernguttarput.

- Piniartut qimmeqartuusugut aningaasanik isertitsilaarnissarput pingaartittarparput, ilaanni qimussiusserusulluta piumaneqqusaattutut ittarpugut, Adolf Simigaq oqaluttuarpoq.

Angallannerup pitsaanerulernissaa kissaatigineqarpoq

Silarlutsillugu angalasoqarsinaannginnera takornarissat paasisinnaasarpaat, silagissisimatilluguli angallassisoqartannginnera paasiuminaatsinneqartarluni. 

- Takornariat paasisinnaasarpaat sila pissutigalugu kinguaattoornertik. Silagissisimatilluguli timmisartukkut angallassisoqartannginnera takornarianit paasiuminaatsinneqartarpoq, Saki Daorana oqarpoq.

Taamaattoqarneralu takornariat pakatsissutigisarpaat.

- Qaanaamut takornariarniaraluarluni tikinngitsoorsimasup oqarfiginikuuaanga, sooq nunarsuarmi akisunerpaamik billetsisilluni angalalluni taamatut misigisaqartinneqassanerluni, Saki Daorana oqaluttuarpoq.

Qaanaami kulturimik imaluunniit mongoliamiut kulturiannik misigisassarsiornissaq takornarianit toqqarneqartarpoq.

- Nunatsinni angallannerup akisunerujussua angallannermillu taamaatitsiinnartarneq pissutigalugu takornarissat Qaanaaliassanerlutik Mongoliamukassanerlutilluunniit aalajangertariaqartarput. Mongolialu toqqarneqartarpoq tikikkuminarnerummat, taamaalilluni aningaasat nunatsinnut isertitsissutaasussat annaaneqartarlutik, Saki Daorana oqarpoq.

Kingulliunneqartarnerminnik naammagiliisut

Sila pissutigalugu angallannikkut kinguaattoortoqarsimatillugu Qaanaamut angalasut kingulliunneqartarnerat aaqqiivigineqartariaqartoq takornarialerisup kissaatigaa.

- Immikkoortitsineruvoq. Nuummi silarluppat timmisartukkut angallassinissaq taamaatiinnarneqartarpoq, silagissippallu ingerlaannaq angalasussat angalatinneqartarlutik. Qaanaamiit Qaanaamullu angalasussat ullut marluk, pingasut, tallimat allaat sapaatip-akunnera utaqqitinneqartarput, isumaqarpungalu sumiiffiit assigiimmik atugassaqartinneqartariaqarput, Saki Daorana oqarpoq.

Piniartup Qaanaamut Tunumullu angallannerup kingulliunneqartarnera timmisartut amerlineqarnerisigut ajornartorsiut aaqqinneqarsinnaasoraa.

- Kitaani kinguaattoortoqarsimatillugu Qaanaamut timmisartoq angalasussaagaluartoq kitaani atorneqartarpoq, taamaalilluni Qaanaamut angalasussat kinguarujussuartarlutik. Timmisartut amerlineqarpata ajornartorsiut aaqqinneqarsinnaasoq eqqarsaatigisarpara, Adolf Simigaq oqarpoq.