Nipisat suaat pillugit Paamiuni unammilleqatigiinneq sakkortusoq

Paamiuni suliffeqarfik aalisarnermik ingerlataqartoq Ortooraq/Taatsiaq Møller P/R, erneriinnit Ortooraq Møllerimit aamma Taatsiaq Møllerimit pigineqarpoq. Taanna aalisakkerivimmik nutaamik, maannakkuugallartumut nipisat suaannik taamaallaat tunisassiorfiusumik siorna ammaavoq. 

Nipisat suaat nappartat 48-t siorna tunisassiarineqarput, taakkulu tamarmik Sverigimut tunineqarput. 

Taatsiaq Møller nipisat suaannut tunitsivimmik ingerlataqarnermi saniatigut, suliffeqarfinnik assigiinngitsunik, ilaatigut motorinik iluarsaasarfimmik akunnittarfimmillu aamma ingerlataqarpoq, taamaattumillu Paamiuni inuussutissarsiornerup iluani pingaarutilittut inissisimalluni. Kisiannili Kalaallit Nunaanni suliffeqarfiit annerpaartaat pisortanit pigineqartoq Royal Greenland A/S (RG), Paamiuni tunitsivimmut namminersortumut siorna aallartittumut sakkortuallaamik unammillertoq, Taatsiaq Møller isumaqarpoq. 

Unammilleqatigiinnermili periutsit naliginnaasut atorlugit Royal Greenland ingerlasoq suliffeqarfimmiit oqaatigineqarpoq.

Unammileqatigiinneq equngasoq

Naalakkersuisooqatigiit nutaat siorna 2025-mi pilersinneqartut suleqatigiinnissamut isumaqatigiissutaanni, namminersorlutik inuussutissarsiuteqartut immikkut taaneqarput. Taakku pitsaasumik atugassaqartinneqartinneqassasut aammalu amerliartornissaat siunertaasoq, isumaqatigiissummi ilaatigut allassimavoq. Paamiunili Royal Greenlandip, tunitsivimmut mikisumut aallarterlaamullu sakkortuumik unammillernera, unammilleqatigiinnermik equngasumik pilersitsisoq, Taatsiaq Møller isumaqarpoq.

Royal Greenlandip Paamiuni aalisakkanut suliffissuaataanut qalerallit, saarulliit, qeeqqat, suluppaakkat saattuallu tunisaapput. Suliffeqarfillu angisooq aningaasatigullu nukittuumik inissisimasoq, illoqarfimmi Paamiuni 1.200-t missaannik inoqartumi, unammilleruminaatsorujussuusoq, Taatsiaq Møller oqarpoq.

- Nipisat suaannik tunisinermi akigititarput inissikkutsigu, Paamiuni Royal Greenland ingerlaannaq akinik qaffaasarpoq, taannalu uagut aallarterlaatut unammisinnaanngilarput.

- Royal Greenland inuiaqatigiinni pingaarutilimmik akissussaaffeqartoq oqaatigineqartarpoq. Kisianni tunitsivimmik nutaamik ipisitsiniaasutut pissusilersortarnera, unammilleqatigiinnermik equngasumik pilersitsivoq, tamannalu soorunami akuersaaruminaappoq.

- Uagut tunitsivipput matugaluarpat, Royal Greenlandip akigititani ingerlaannaq appaqqissavai, taamaattoqartarneralu ajoraluartumik takornartaanngilaq, Taatsiaq Møller, aamma Paamiuni aalisartut piniartullu peqatigiiffianni siulittaasumut tulliusoq oqarpoq.

Namminersortunngorsaaneq politikkikkut tapersersorneqarpat, taava unammilleqatigiinnermi akit tamanit nammanneqarsinnaasut atorneqartariaqartut, taanna isumaqarpoq.

Paamiuni tunitsivik Ortooraq/Taatsiaq Møller P/R-imit pigineqartoq maannakkut sisamanik sulisoqarpoq, saarullinnillu tunisassiorneq aappaagu aallartinnissaa pilersaarutaavoq.

Unammilleqatigiinneq peqqinnartuusoq

Royal Greenlandip Paamiuni aalisakkanut suliffissuaataanut nipisat suaanik tunisinermi kiilumut 46 koruuni, taassumalu qaavatigut tapeq 1 koruuni akigitinneqarpoq. Nipisanniarnerup apriilip aallaqqaataani aallartinneraniit suaat 2 tonsit missaat taamaallaat tulaanneqarsimasut, aalisakkanik suliffissuup pisortaa Otto Petersen paasissutissiivoq.

- Tamanna silap unerisimannginneranik ilaatigut peqquteqarpoq, aammali tunitsivimmik nutaamik unammillerteqalernikuunerput peqqutaalaarpasippoq, taanna oqarpoq.

Unammilleqatigiinnermi akit qanoq inissisimanerat malillugu akinik qaffaasarlutik, taassuma erseqqissaatigaa.

- Unammilleqatigiinneq peqqinnartuusoq isumaqarpunga, niuernermilu unammilleqatigiinnermi akinut malinnaaginnarpugut. Unammillertigut tulaassueqqunaqaat, taamaattumik unammillertitsinnut ipisitsiniaasutut taaneqarsinnaanngilagut, Otto Petersen oqarpoq.

Siorna nipisat suaat 39 tonsit Paamiuni Royal Greenlandimut tulaanneqarput, ukiorlu manna 50 tonsit tulaanneqarnissaat Otto Petersenip neriuutigaa. Aalisakkanut suliffissuaq 60-it tungaanut sulisoqarpoq.

Namminersortut illersorneqartariaqartut

Royal Greenlandip tunitsivinnut mikisunut akitigut unammillertarnera apeqqusernartoqartoq, Inatsisartuni Aalisarnermut Piniarnermut Nunalerinermullu Ataasimiititaliami siulittaasoq, Bentiaraq Ottosen, Atassut, isumaqarpoq.

- Pisortat suliffeqarfiutaasa namminersortunut unammillertitut inissittarnerat kipiluttunarsinnaasarpoq. Kisiannili aamma unammilleqatigiinneq piuleraangat illoqarfimmut pitsaasumik kinguneqarsinnaasarpoq, taanna oqarpoq.

Unammilleqatigiinneq pillugu Inatsisartut inatsisaata allanngortinnissaa pillugu, Inatsisartut inatsisaanut siunnersuummut tusarniaaneq siorna ukioq naajartortoq naammassivoq. Pineqartorlu maanna Inatsisartuni oqaluuserineqarpoq.

Namminersortut pisortat suliffeqarfiutaanniit ipitinneqaratik ingerlaannarnissaat qulakkeerneqartariaqartoq aammalu unammilleqatigiinnermut inatsit namminersortut ineriartorsinnaanissaannut aqqutissiuussisariaqartoq, Bentiaraq Ottosen isumaqarpoq.