Kalaallit ilinniartut erfalasorput nittarsaakkaat

Danmarkimi inuussutissarsiornermik ilinniarfiit sapaatip akunnerani matumani Hjørringimi fagini assassorlutik unammineranni DM i Skills-imik taaneqartartumi, Nunatsinnit siullermeerluni peqataasoqarpoq. 

DM i Skills inuussutissarsiornermik ilinniagaqartunut inuusuttunut unammisitsineruvoq. Tamatumani ilinniartut 300-t missaanniittut Danmarkimi ilinniakkaminni – assersuutigalugu sanasutut, qarmaasutut, igasutut aamma innaallagisserisutut – Danmarkimi pikkorinnerpaanngorniullutik unammisinneqarput. 

Nunatsinni inuussutissarsiornermik ilinniarfiit unammisitsinermi peqataanngillat, ilinniartulli ilaat Hjørringimi nittarsaassiveqarlutik peqataapput, Issittumi assassukkat, kulturi, ulluinnarnilu inuuneq takuniaasunit qanimut takuneqarsinnaallutik.

Unammisitsisarneq siunissaasoq 

- Ukioq manna unammisitsinernut peqataanngilagut, peqataasalissaagulli, John Plambek Sisimiuni KTI-mi ilinniartitaanermut aqutsisoq oqarpoq. 

- Pikkorissunik ilinniartorpassuaqarpugut, imminnut takutissinnaasunik, aallaqqaammulli inuussutissarsiornermut ilinniarfiit sammissavavut, tamatumani takutinniarlugu piginnaasatigut unammillersinnaalluta. Taamatut unammiuaarnerni peqataassagaanni siunnerfeqarluni iliuuseqartoqartariaqarpoq – DM i Skills-imilu pulaarnitsinni piginnaasat pillugit unammisitsinermi piginnaasanik takutitsinissamut periarfissatsialattut atorniarparput, tamannami piginnaasat takutinnissaannut periarfissaammat. 

- Arctic Skills-imi peqataanissarput aamma pilersaarutigaarput, tassa Savalimmiuni, Islandimi Norgellu Avannaani ilinniartunut unammisitsinermi tamatumunnga assingusumi.

- Hjørringimi tikeraarnerput aamma erfalasup nittarsaannissaanut atorniarparput. Kalaallit Nunaanni assassorluni sulisartuunissaq immikkut ittunik piumasaqaateqarpoq, ilaatigut silap pissusia pissutigalugu unammillernartoqarluni, tamatumami malitsigisaanik pilersaarusiullaqqissuusariaqarmat – soorluttaaq Nunatsinni ilinniarfiit ilaat nunani allani nassaassaanngitsut, John Plambek oqarpoq.

Qaanniortartoq kalaallisuuliortartorlu

Hjørringimi Kalaallit saqqummersitsivianni Qallunaat takuniaasut ilaatigut qaanniortartumik, qamuteralannut mekanikerimik, umimmaap tuttullu neqaannik ussiinerit aamma assassoriaatsit soorlu ammerineq sapangaaqqerinerlu misigisinnaavaat. 

Tamakku tamarmik Nunatsinni Danmarkimilu ilinniartuunerup assigiinngissusaannik takussutissiissapput. Assersuutigalugu kalaallip qamuteralalerinermik ilinniartup motoorimik, 40 gradinik issittumi unittoorsimasumik suliaqarnermi unammilligassat, biilit iluarsaasarfianni kialaartumi motoorimik uninngasumik suliaqarnissamut naleqqiullugu qanoq unammillernartoqartiginersoq takutinneqassalluni. 

Saqqummersitsivimmi aamma takuneqarsinnaassallutik oqaluttuat sakkortuut Issittumi sanaartornermut tunngasut, aniguiniarneq niuernerlu - kiisalu piviusunik takutitsinerit soorlu naggueqatigiit Inuit timersuutaannik qimminillu qimuttunik naapitsinerit.

Kalaallit peqataatitaat 25-upput, taakkualu ilagaat ilinniarfinni pisortat, ilinniartitsisut, ilinniartut aamma inuussutissarsiortut.

 

Brian kajumilluni peqataasoq

Nittarsaassinermi peqataasut ilagaat sanasutut ilinniartoq Brian Tony Kaspersen Schultz, immikkorluinnaq inissisimasoq.

Brianip sanasutut ilinniarnini John Plambekimi Sisimiuni aallartippaa, tunngaviusumilli ilinniakkani naammassigamiuk Hjørringimi sanasutut ilinniarfimmut nuulluni. Kalaaleq sanasutut ilinniartoq unammiuaarnernut peqataasinnaasutut imminut naliliiffigaaq.

- Timersortartuuvunga — unamminerlu nuannaraara. Taamaattumik unammineq ajornartorsiutiginngilara - nuannarigakkumi, Brian Tony Kaspersen Schultz nassuiaavoq.

- Tunngaviusumik ilinniarnera siulleq naammassigakku timersortarnera pissutigalugu Danmarkimut Hirtshalsimut nuuppunga. Tassami nerrivimmi arsaarartartut nunanut allanut unammisartuini peqataagama. Hirtshalsimi sungiusarnissannut periarfissaqarneruvunga, illoqarfimmi 2. divisionimi unammisartuni unammeqataasarlunga. Unammisarneq uannut pingaaruteqarluinnarpoq, taamaattumik ullut ilaanni pikkorinneruleruma soorunami skillsimi DM-imut anngunniuteqataassaanga.

DM i Skills-imi Inuussutissarsiornermik ilinniarfiit Nunatsinneersut Hjørringimi peqataanissaat peqatigiiffik Uagut suleqatigalugu aaqqissuunneqarpoq.

- Kalaallit kulturiannik inuussutissarsiutitigullu piginnaasatsinnik DM i Skillsimi takutitsinissarput qilanaareqaarput. Inuussutissarsiornermut ilinniakkavut Danmarkimi inuussutissarsiornermut ilinniarfiit allat assigalugit amerlasuutigut assigiilluinnarput, kisiannili aamma suut tamarmik allaanerulluinnarlutik, tassa piareersaatitut ingerlatseriaatsit pinngortitarlu pissutigalugit. Kalaallit inuusuttut kulturimik pinngortitamillu ataqqinnilluinnarlutik ilinniagaqartarput siunissamilu unammilligassanut piareersimallutik. Tamanna takutikkusupparput Hjørringimilu DM i Skillsimi peqataasunut tamanut avitseqatigiissutiginiarlugu, Lisa Bundgaard Jensen oqarpoq, taanna peqatigiiffimmi Uagut-mi suliniutinut aqutsisuuvoq.