Iperaatsiortartoq Innaarsunneersoq tunisaqarluartartoq

Kalaallit Nunaanni Avannaani Tunumilu piniarnermik inuussutissarsiuteqarnermut qimusserneq ukiorpassuarni pingaaruteqarluinnarsimavoq. 

Ukiut ingerlanerini qimussip atugaanera annikilliartorsimagaluartoq, taamaattoq ukiuni kingullerni annertusiartortumik atugaajartoqqilersimavoq. 

Qimussernermi iperaataq pinngitsoorneqarsinnaanngilaq, iperaatarlu pitsaasoq qimussip pitsaasumik ingerlanissaanut aalajangiisuulluinnartarpoq. 

Hans Mathias Kristensen Innaarsunni piniartuullunilu aalisartuuvoq, taamatullu inuussutissarsiuteqarnermini qimusseq pinngitsoorsinnaanngilaa. Taanna qangaaniilli periutsit atorlugit naqqaniik nammineq tamaat suliaralugu iperaatsiortarpoq. Taakkulu piumaneqarluartut taassuma oqaatigaa.

Piorsarsimassutsimut ilaasoq

Iperaataq qimussernermut pingaaruteqaannarani aammali Kalaallit Nunaanni piorsarsimassutsimut ilaalluinnartoq Hans Mathias Kristensen isumaqarpoq.

- Qangaaniilli periutsit atorlugit iperaatsiortarneq atugaajunnaariartortoq malunnarpoq. Avannaani piniartut qimussertartut namminneerlutik iperaatsiortarput taakkuli saqqumilaarpallaanngillat.

- Allunaassineq aamma atugaajunnaariartorpoq. Inuusunninni allunaassinermut akkaarma siunnertarsimavaanga, tamannalu maannakkumut iluaqutigilluarsimavara, taanna oqarpoq.

Allunassinermi ussuit amii naliginnaasumik atorneqartarput, iparassarlu natsiup amianik sananeqartarluni.

Iperaatsiorneq pisariusoq

Hans Mathias Kristensenip oqarnera naapertorlugu, ukioq manna Aappilattup eqqaa kingusissukkut sikuniarpoq. Tamannalu piniarnermut aalisarnermullu killiliivoq. Taamaattumik piffissami kingullermi iperaatsiornissaminut taanna periarfissarissaarnerusimavoq.

Iperaataq kusanartumik naammassineqassappat, piffissaq sivisooq atorlugu atortussai piareersarneqartartut, Hans Mathias Kristensen erseqqissaavoq.

- Ussuk pisarigaangakku ulu atorlugu nammineq orsortaajartarpara. Amia meqqoqartillugu illutta kælderiani qaammatit marluk missaat panersertarpara kingornalu meqquiartarlugu.

- Taamaaleriarlugu aleq kilillugu iperaatassatut suliarisarpara. Natsiup amia suloqqiarissallugu pitsaanerusarpoq. Taanna imermut kinillugu orsuiaqqaariarlugu panertittarpara amitsunnguanngorlugulu kilittarlugu.

- Iperaataq kusanartumik sanassagaanni tiiarummut atanera perlarneqartussaavoq, taanna oqarpoq.

Hans Mathias Kristensen illumik kælderiani sannavimmi iperaatsiortarpoq.

- Iperaattap naqqaniik tamaat suliarinera sivisulaarsinnaasarpoq. Kisianni allunaaq, sulorassaa, tiiarutissaalu piareeqqagaangata, iperaattat ullormut marluk pingasulluunniit naammassisinnaasarpakka.

Assigiinngitsunut atorneqartartoq

Taassuma oqarnera naapertorlugu sumiiffimmiit sumiiffimmut iperaattat sananeqarneri assigiinngitsuupput. Aammali siunertanut assigiinngitsunut atorneqartartut erseqqissaatigaa.

- Assersuutigalugu iperaattat saqitsaatit sikumi atorneqartartut takinerusarput. Qimmit ilai iperaattamik attorneqartariaqartarput, iperaattallu taakku silinnerullutillu oqimaannerusarput, taanna oqarpoq.

Hans Mathias Kristensenip iperaattat tunisassatut sanasartagai isikkumikkut assigiiaartuupput. Immikkulli kissaateqartoqaraangat kissaatigineqartoq malillugu sanasarpai.

Piumaneqarluartut

Iperaattat inersimasunoortut meeqqanoortullu tamarmik piumaneqarluartut, taassuma oqaatigaa.

- Siorna iperaattat 50-ingajaat naammassivakka. Iperaataq inersimasunoortoq 4-5 meterit missaaniittarpoq, kisianni 4 meteri sinneqalaartoq piumaneqarnerusarpoq, taannalu 700 kronilersittarpara.

- Qanittumi Tunumiit piniarfigitippunga, kisianni Ilulissaniit pisisartut amerlanerupput. Iperaatarsisartut qimussertartuinnaanngillat aammali qimusserneq ajortut assiliassaminnik pisisarput, iperaatsiortartoq Innaarsunneersoq oqarpoq.

Ukiut siuliinut naleqqiullugu qimussip atugaanera annikinnerusimagaluartoq, ukiuni kingullerni annertusiartoqqilersimasoq Hans Mathias Kristensen naggasiilluni oqarpoq.