Ingerlatseqatigiiffik Nasdaq-imi børsimut nalunaarsugaatilik: Tunup avannaani qillerinerit ukioq manna aallartinniarlugit naatsorsuuteqartoq

Amerikamiut uuliasioqatigiiffiat Greenland Energy Company, Jameson Landimi uuliasiornermi tuluit suliffeqarfiutaannik 80 Mile-imik suleqateqartoq, marlunngornermi apriilip arfineq-aappaanni New Yorkimi Nasdaq-imi børsimi ammaanersiornermi siarngup sianertinnissaanut periarfissaqarpoq.

Periarfissaq pingaarutilik

Tamatuma nalaani pisortaaneq Robert Price suliffeqarfiup ukiaru qillerivimmut atortussanik nassiussinissaq, ukiorulu Jameson Landimi qillerinerup aallartinneqarnissaa naatsorsuutigalugu oqarpoq.

– Amerikamiut aningaasaataat sumiiffinnut nunarsuarmi pisuussutinik annertunerpaanik pilinnut politikkikkullu pingaaruteqarnerpaanut atassusernissaannut periarfissaqarluarpugut. Kalaallit Nunaata pisuussutaasa angingaartut atorluarnerisigut soqutigisaqaqatigiinnut tamanut, ilaatigut inuiaqatigiinnut kalaallinut piginneqataasunullu, naleqarlualersitsissaagut.

– Nukissiorneq, aningaasatigut isumannaatsuuneq politikkikkullu aalajaatsuuneq imminnut atalluinnarput. Greenland Energyp nunat killermiut nukissiornermik isumannaatsuunerannik ineriartortitsinikkut akisussaassuseqarlunilu avatangiisinik aqutsinikkut nukittorsaalluni periarfissaq immikkuullarissoq tamanna atorluarpaa. Suleqatigisagut misilittagartuut Jameson Landimi, nunarsuarmi sumiiffiit annertunerpaartaanni kisiartaalluni misissorneqanngitsumi, uuliamik nappartanik 13 milliardinik imaqarsinnaasumi. [...] siuariartortitsipput. Ujaasineq aallartippoq, atortut ingerlateqqinneqarput, ukiarulu atortut nunamut inissinnissaat aamma ukioru qillerinerit aallartinneqarnissaat suli ukkataraarput, Robert Price ilaatigut oqarpoq.

Ingerlatseqatigiiffiup Canadamiut qilleriviutaat Stampede Drilling Jameson Landimi suliassanut inuttassarsiuussinissamik qilleriviullu atornissaanik isumaqatigiissuteqarfigisimallugu tusagassiutitigut nalunaarutigereeraa tamanna børsimi nalunaarutigineqarpoq.  

Akuersissutinik pissarsisimanngitsut

ingerlatseqatigiiffik aatsitassanut naalakkersuisoqarfik naapertorlugu suli nunami atortunik inissiinissamut akuersissummik tunineqanngilaq. Taamaammat tammaarsimaartarfiliornissamut, talittarfeqarnissamut qillerinermillu aallartitsinissamut akuersissuteqanngilaq.

Ingerlatseqatigiiffik atortussanik nunamut niusinissamut taamaallaat akuersissuteqartoq ukioru qillerilerniarluni naatsorsuutigalugu Nasdaq-ip børsiani nalunaaruteqartoq paatsiveerunnarnersoq Sermitsiap Aalborg Universitetimi aningaasaqarnermut professori Per Nikolaj Bukh aperaa.

– Eqqarsarluaraanni ingerlatseqatigiiffik ”ukiaru atortunik nunamut ikkussuineq aamma ukioru qillerinerit aallartinnissaat suli pingaarnerpaatikkaat” oqarpoq. Tassa aallartinnissartik oqaatiginngilaat, kisiannili aallartinnissaq ukkataraat, suliffeqarfimmimi anguniagaqartoqarsinnaavoq. Suliniut manna ingerlatseqatigiiffiup New Yorkimi børsimi saqqummiunniarsarisaanit iluatsissinnaanersoq qularnannginnerungaartoq erseqqippoq. Tassa issittumi sumiiffimmi sunnertiasumi qanittukkut uuliasiortoqarnavianngilaq, Per Nikolaj Bukh oqarpoq.

navianartup avannaani avatangiisit 

taamatullu navianartup avannaani avatangiisit suliniutip piviusunngortinnissaanut aalajangiisuussinnaapput, tassami jameson land "pinngortitami immikkut ittuuvoq kalaallit akornanni nunap immikkoortuini itisuuni annertunerusuni." 

taama allassimavoq avatangiisinut nalilersuinerup pilersaarusiornerani, tassanilu allassimavoq, nunap immikkoortuani uumasut amerlasuut, soorlu umimmaat, nerlerit, timmissallu itisuut pingaarnerpaasut. 

Avatangiisinik illersuiniaqatigiiffiup NOAH-p oqaaseqartartua naapertorlugu Naalakkersuisut Issittumilu nunat siulliit ilaattut avatangiisit eqqarsaatigalugit 2021-mi uuliasiornissamut periusissiartik unitsillugu uuliasiornissaq inerteqqutigimmassuk aamma maluginiarnarpoq.

– Ingerlatseqatigiiffilli inerteqquteqarnerup atuutilersinneqarnissaa sioqqullugu uuliasiornissamut akuersissuteqalerami suliniuteqarnini ingerlatiinnarsinnaasimavaa, naak tamanna issittumi avatangiisinut ulorianartuugaluartoq. Inerteqqutip siusinnerusukkut atuutilersinneqarsimannginnera NOAH-mi ajuusaarutigaarput, kisianni aamma ingerlatseqatigiiffik maannamut naalakkersuisoqarfimmeersut nalunaarutigisimasaat naapertorlugit soorunami piumasaqaatinik tamanik maleruaassasoq neriulluarpugut. Tamannalu suliniutip piviusunngornaviannginneranik isumaqaannassaaq, Niels Henrik Hooge NOAH-meersoq oqarpoq.