Eqalussuup akiorneqarnera

Inuussutissarsiutigalugu aalisartunit eqalussuaq uumasutut ajoqutaasutut isigineqarpoq, qassutini ningittakkanilu pisanik ilanngartuilluni nerisarnera pissutigalugu.

Aammattaaq sinerissap qanittuani aalisartut atortuminnik annaasaqartarnermikkut aningaasarpassuarnik annaasaqaatigisarpaat. Taamaattumik Avannaata Kommuniani kommunalbestyrelsimi amerlanerussuteqartut aningaasanik immikkoortitsipput, nunarsuarmi eqalussuarni anginerpaanut ilaasumut, 7 meterit angullugit takissuseqarsinnaasumut 1 tonsimillu oqimaassusilimmut, killilersuinissamut atorneqartussanik.

Avannaani Aalisarnermut Piniarnermullu Ataatsimiititaliami siulittaasoq Ole Møller, Naleraq, aamma aalisaartuusoq, eqalussuit pisat qanoq atorluarneqarsinnaanerannut misissuinissaq pissusissamisoortoq isumaqarpoq.

Lars Poulsen, Siumut, Inatsisartuni Aalisarnermut, Piniarnermut Nunalerinermullu Ataatsimiititaliami siulittaasoq pisuussutinik asiutitsinnginnissaq anguniarlugu eqalussuaq tamakkiisumik atorluarneqartariaqartoq isumaqarpoq. Taamaattumik eqalussuarnik qimminut nerukkaatissiatut inuillu nerisassaattut tunisassiornissamut periarfissat misissorneqassasut kissaatigaa.

Taamaattumik  Aalisarnermut, Piniarnermut Nunalerinermullu Ataatsimiititaliamut piffissami aggersumi saqqummiutissallugu neriorsuutigaa.

Kullorsuarmiit siunnersuut

Nunaqarfimmi Kullorsuarmi aalisarneq inuussutissarsiutitut pigaarnertut ingerlanneqarpoq. Nunaqarfiup eqqaata imartaani amerlavallaartunik eqalussuaqarnera pissutigalugu aalisarnermut akornutaasoq, Timotheus Petersenip, aalisartut piniartullu peqatigiiffianni siulittaasup nunaqarfiullu aqutsisuini ilaasortap, oqaatigaa.

- Imartatsinni eqalussuit ima amerlatigipput nalunaaquttap akunneri marlussuit sinnerlugit ningittakkavut uninngatissinnaanantigit. Pisavut nerisarpaat, ningittakkavullu kipisarlugit.

- Avannaani nunaqarfinni aalisariutinik nutaanik pissarsiniarneq ajornakusoortorujussuuvoq, taamaattumillu eqalussuaqarpallaarnera ajornartorsiutaangaatsiartarpoq, oqarpoq.

Tamannalu pissutigalugu aalisartut piniartullu peqatigiiffiat eqalussuit ikilisarnissaannut siunnersuuteqartariaqarsimasoq Timotheus Petersen oqarpoq.

Eqalussuup uummataa 300 koruunilerlugu

Kullorsuarmiit saaffiginninnerit tunngavigalugit kommunalbestyrelsip tamanna politikkikkut suliassanngortillugu qaqippaa.

Eqalussuit amerlassusaannik ikilisaanissaq, aalisarnermi atortut annaaneqartut taarserniarlugit aningaasaateqarfimmut qinnuteqartoqartoq, Kommunalbestyrelsip oqaluuserisassaani, februaarip 13-iani suliarineqartumi, allassimavoq.

Ataatsimiinnermit imaqarniliaq naapertorlugu kommuniusimasut imartaanni  eqalussuit annertuumik aalisarnermik inuussutissarsiuteqartunut ajoqutaanerat pissutigalugu eqaluissuit ukiut 20-t matuma siornatigut ikilisarneqarsimapput.

Taamanikkut eqalussuup niaqua uummataaluunniit 100 koruunilerlugu kommunimut tunineqartarpoq.

Avannaata Kommunianit immap naqqani saliinissamut qassutaarsuutinillu katersuinissamut 2026-mut 850.000 koruunit immikkoortinneqarput.

Eqalussuit 1.000-it uummataat 100 koruunilerlugit pisiarineqarsinnaanngorlugu 100.000 koruuninik aningaasanik taakkunannga immikkoortitsisoqarsinnaanera siunnersuutigineqarpoq. Eqalussuarnilli ikilisaanissaq uumasunik ajoqutaasunik pinaveersaartitsinermut kontomit Teknikkimut Aqutsisoqarfimmit ingerlanneqartumit aningaasalersorneqassasoq aalajangerneqarpoq, tassanilu eqalussuit uummataannut 1.000-inut 300 koruunilerlugit akiliinermut 300.000 koruunit immikkoortinneqartussanngorlutik.

Periuseq iluaqutaasaoq

Ole Møller Uummannap eqqaani inuussutissarsiutigalugu ukiorpassuarni aalisartuunermigut eqalussuarnik ajornartorsiuteqarneq pillugu ilisimasaqarluarpoq.

- Eqalussuit uummataat Uummannami eqqaanilu 200 koruunilerneqartarnikuupput. Tamanna iluaqutaasoq takuneqarsinnaavoq, eqalussuarnimmi ajornartorsiuteqarneq annertuumik appariarujussuarpoq.

- Eqalussuarniarnerli eqalussuup uummataanut akigitinneqartoq 50 koruunininngortinneqarmat soqutigineqarunnaarpoq.

- Sumiiffiit ilaanni akunnialuit ingerlaneranni ningittakkat eqalussuarnik kipineqartarput. Taamaattumik kommunalbestyrelsip maannakkut aalajangernera iluaqutaassasoq neriuutigaara, oqarpoq.

Eqqartorneqartoq kommunalbestyrelsimi oqaluuserisassanngorteqqissallugu,  eqalussuarnillu pisaqartarneq tamakkiisumik atorluarneqartariaqartoq, Ole Møller oqarpoq.

- Eqalussuup ataatsip nerpia 200 kiilut missaannik oqimaassuseqarpoq, qimminullu nerukkaatissatut qullukkatut ikaani panertinneqartarpoq.

- Taamaattumik eqalussuaq tamakkiisumik qanoq atorluarneqarsinnaanera misissussallugu inissaminiiginnarpoq, imaanut igiinnaqinagu, oqarpoq.

Tamanna piffissami aggersumi kommunalbestyrelsimi oqaluuserisassanngortissavaa.

Imminut pilersorsinnaanermut periusissiaq

Lars Poulsen Kuummiuninngaanneerpoq tassanilu piniartuunikuulluni. Eqalussuarnik qimminut nerukkaatissiortarpoq, Tunumiulli aamma mikiarsiatut nerissallugu mamarilluinnaraat oqaatigaa.

Naalakkersuisut Kalaallit Nunaanni Imminut Pilersornermut Periusissiaq 2025-2030 siullerpaaq 2024-p naalernerani saqqummiuppaat.

Inuussutissarsiortut namminneq pilersuinermik ineriartortitsinissaannut sinaakkutissaat pilersinneqassasut, taamaalilluni imminut pilersornermut pilersaarut aningaasaliiffigineqarsinnaanissaa orniginarnerussammat, taamanikkut Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund Inuit Ataqatigiinneersoq oqarpoq. Tamannalu aallaavigalugu Avannaata Kommuniani suliniutigineqartoq tapersersorneqartariaqartoq Lars Poulsen isumaqarpoq.

- Eqalussuaq kuultisut naleqarpoq. Qimminut nerukkaatissiarissallugu tulluarluinnarpoq, aammali mikiarsiatut nerineqarsinnaalluni. Nerpia ukiuunerani apummut matooruttarparput piareerpallu sassaalliutigisarlugu, ilaatigut iipilinik vindruuanillu illulerlugu nerisarlutigu.

- Taamaattumik Aalisarnermut, Piniarnermut Nunalerinermullu Ataatsimiititami piffissami qaninnermi oqaluuserisassanngortissavara, oqarpoq.

Kalaallit Nunaanni Imminut Pilersornermut Periusissiaq 2025-2030 naapertorlugu tunisassiortut nunap pissarititaanik tunisassiorsinnaaneq misissoqqissaartariaqarpaat, taamaasillutik piujuartitsineq eqqarsaatigalungu siunissami pilersuisinnaalissallutik.

Aaqqissuulluakkamik misissuisoqanngilaq

Pinngortitaleriffimmi aalisakkanik qalerualinnillu immikkoortortaqarfimmi pisortaq Søren L. Post Kalaallit Nunaanni eqalussuit aalisarnermi qanoq ajornartorsiortitsitigisarneranik paasiniaanerit aaqqissuussaasumik amerlassusilimmillu ingerlanneqarsimanngitsoq oqarpoq.

- Aalisartunit, ingammik qassutinik ningittakkanillu qaleralinnianit, eqalussuaq ajornartorsiutaasinnaasoq nalunaarutigineqakkajuttarpoq.

- Eqalussuit qassutini ningittakkanilu pisanik akkersaniittunik nerisarput, nermussinnaasarlutillu, taamaasillunilu aalisarnermi atortut ajoquserneqarsinnaallutik. Aalisartunut ataasiakkaanut pisanik annaasaqarnermik sulinerulernermik, aningaartuuteqarnerulernermillu kinguneqarsinnaasarpoq, immikkoortortaqarfimmi pisortaq oqarpoq.

Taama pisoqartarnera qanoq annertutiginersoq qanorlu akulikitsigisoq pinngortitaleriffik paasissutissaateqanngitsoq Søren L. Post ilisimatitsivoq.

Aamma Pinngortitaleriffik Kalaallit Nunaata imartaani eqalussuit qanoq amerlatiginersut pillugu naammattumik paasissutissaateqanngitsoq erseqqissarpaa.

Siornatigut aalisakkat taakkua niuernikkut aalisarneqartarsimasut, ullumikkulli taamaaliortoqarneq ajortoq oqaatigaa.

Eqalussuaq arriitsumik inerikkiartortartoq aatsaallu utoqqaligaangami kinguaassiorsinnaanngortartoq Pinngortitaleriffiup paasissutissaataaniippoq. Taamaattumillu nalinginnaasumik ulorianartorsiortutut isigineqartarpoq. Nunarsuaq tamakkerlugu eqalussuaq ulorianartorsiortutut International Union for Conservation of Nature-p aappalaartumik allattorsimaffiani allassimavoq.

Naliliineq tamanna nunarsuaq tamakkerlugu naliliineruvoq, Kalaallit Nunaanniinnaanngitsoq, Søren L. Post erseqqissaavoq.