„Inussutissarsiortut aaqqiissutissatut periarfissanik siunnersuuteqartariaqarput, unamminartut taamaallaat politikkikkut aaqqinneqarsinnaanngillat,“ raajaleriffik matuneqariaannaasoq pillugu Aalisarnermut Naalakkersuisoq Peter Borg tusagassiutitigut nalunaarummi oqarpoq.
Aasianni suliffiit annersaasa ilaasa matunissaa illoqarfimmi ernumassutigineqartorujussuuvoq, sulisummi 116-it suliffimminnik annaasaqarnissaat ilimanaateqarmat, tamannalu sumiiffimmut annertuumik kinguneqassaaq.
- Ingerlatseqatigiiffiit aaqqiissutissanik naassaarniarluta immikkut ataatsimullu suli oqaloqatigisarpakka. Polar Seafood Greenland A/S aaqqiissutissat periarfissat assigiinngitsut pillugit kingullermik ulloq 23. februar 2026 nassiussaqarpoq. Taamaammat taakku periarfissaasinnaasullu allat pillugit oqaloqatigiinnissamut piaartumik aggersaqqissallugit pilersaarutigaara. Aaqqiissutissat inuussutissarsiortunut oqaloqateqarnikkut nassaarineqassapput – tusagassiuutit aqqutiginagit, Peter Borg oqarpoq.
Annaanniarneqassanngitsoq
Taamaalilluni maannakkut Aasianni innuttaasunik eqqissisitsisumik Namminersorlutik Oqartussanit aningaasalersorneqartumik annaassiniarnermik pilersaaruteqarani ersersippaa.
Suliffeqarfik Royal Greenlandimik oqaloqateqarsimasoq, kisianni ataatsimoorluni aaqqiissutissamik piujuartitsisumik raajaleriffiup siunissaanik qulakkeerinnittussamik nassaartoqarsinnaasimanngitsoq Polar Seafoodip pisortaa piginneqataasorlu Bent Salling sapaatip-akunnerani kingullermi Sermitsiamut oqarpoq.
Isumakuluutaaqisoq
Pissutsit ernumassutigineqarluarput – minnerunngitsumik illoqarfimmi innuttaasuni, tassani borgmesteri immikkut ittumik kommunalbestyrelsimik ataatsimiititseqqullugu Siumup gruppiata piumasaraa, tamannalu Sermitsiamit sapaatip akunnerata naanerani allaaserineqarpoq.
Naleraq: Ataatsimiititaliaq iliuuseqartariaqartoq
Naleqqap Avannaata Kommuniani kommunalbestyrelsimut ilaasortaatitaata Inatsisartullu aalisarnermut ataatsimiititaliaanni ilaasortap Jens Napaattuup tamanna aamma ernummatigeqaa, Sermitsiaq taama paasisaqarpoq.
Jens NapãtôK’ aalisarnermut ataatsimiititaliamit iliuuseqartoqarnissaanik kissaateqarpoq.
- Suliaq suliffeqarfiit akornanni oqaloqatigiissutigiinnarnagu Inatsisartuni ataatsimiititaliatut paasissutissanik pissarsinissaq aaqqiissutissanillu pilersitseqataanissaq akisussaaffigaarput, Naleqqami politikeri ataatsimiititaliamut allallunilu suliassap ataatsimiititaliami suliarineqaqqinnissaa qinnutigaa.
Akisussaaffik
- Suliassaq politikkikkut akulerutsitsisoqanngippat oqaloqatigiissutigiinnarnagu ataatsimiititaliap akisussaaffimminik eqqortitsinnissaa pingaaruteqarpoq, Jens NapãtôK oqarpoq, taassumalu aalisarnermut ataatsimiititaliamit piaartumik akissuteqarfigineqarnissani naatsorsuutigiaa.
Raajat pisassiissutigineqartartut ukiualuit ingerlaneranni 35 procentimik ikilisinneqarsimammata, nunarpullu sisamanik raajaleriviuteqarmat, Polar Seafood Royal Greenlandilu tamarmik marlunnik raajaleriveqarmata, aaqqiissutissat oqitsuinnaanngillat.
Suliffeqarfiup namminersortup Namminersorlutillu Oqartussat suliffeqarfiutaata akiitsoqaleruttortup akornanni isumaqatigiinngittoqartillugu kikkut pissutsinut nutaanut naleqqussassanersut apeqqutaanerpaasarpoq.
