Pigaartut pisortaata Malik Olesenip ulloq unnuarlu kingulleq Kalaallit Nunaanni Politiinut pisoqarfiusimaqisoq, sapaammi ullaakkut nalunaarpoq.
Ilaatigut persutaanermik suliat qulingiluat, nunarput tamakkerlugu siaruarsimasut aallartinneqartut taassuma oqaatigaa.
Suliaq ataaseq immikkut ilungersunarpoq, tassanimi savilersortoqarnera pineqarpoq. Pisoq Sisimiuni pivoq, tassani politiit nal. 01.30 inuup savimmik kapitissimaneranik nalunaarfigineqarput.
Pinerliivigineqartoq angutaavoq 30-t missaannik ukiulik, taannalu talimigut savimmik kapineqarsimavoq.
- Pinerliivigineqartoq inuunerminik navianartorsiunngilaq, pigaartut pisortaat oqaluttuarpoq.
Politiit misissuinerat arnamik 20-t sinnilaarlugit ukiulimmik tigusarinninnermik kinguneqarpoq, taannalu apersorneqarnermi kingorna iperagaavoq. Arnaq suliami suli unnersuussaavoq.
