Inuit marluk Nuup eqqaani qamuteralannik angalanerminni aputip sisoorneranit tupaallaatigisaminnik matoorunneqartut ataasinngornermi annaanneqarput. Annaassiniaaneq annertuvoq sumiiffimmilu Nedkørslen-imik taaneqartumi, illoqarfiup avannaata kangianiittumut minutsinik 15-inik qamuteralammik ingerlaarfiusumi, politiit ataasinngornermi ualikkut ilisimatitsipput.
Annaassiniartartut Qamutinnit ajunaartut marluk apummit qaqinneqarnerannut atatillugu pisimasut Facebookikkut ingerlateqqinneqarput.
SAR Qamutit tassaapput qamuteralannik peqatigiiffimmit Qamutimit pilersinneqartut, namminnerlu kajumissutsiminnik ikiuuttut oqartussaasunut ujaasinermi annaassiniarnermilu ikiuuttarput.
Sisoortoqarnerani ajaappissat apuunneqarsinnaanngitsut
SAR Qamutit nalunaarput innuttaasut ilaata ajutoornermik kalerrisaarimmat politiit attaveqarfigineqartut. SAR Qamutillu naapertorlugit ajunaartut marluk qujanartumik aputip sisoornerani kalerrisaarisartunik atortullit aputip ataani sumiinnersut paasineqarput:
- Sisoortoqarnerani 2,5 meterisut ititigisumik matoorunneqarsimammata inunnit itikinneqariaannaanngillat, taamaattumillu assaasoqartariaqarpoq, Facebookimi qupperneq allappoq.
SAR Qamuiti naapertorlugu inuk siulleq aputip ataani meterit pingasut missaanniittoq nassaarineqarpoq, tamatumalu kingorna aappaanik ujaasineq ingerlaqqippoq, taannalu aputip ataani meterit sisamat tallimat missaannik ititigisumi nassaarineqarpoq.
- Suleqatigiilluarneq ataqatigiissaarinerlu pissutigalugit uumavoq
Qamutimit annaassiniartartut naapertorlugit inuit 20-30-t assaassinermut peqataasimapput, annaassiniartullu tamarmik qujamasuffigineqarput.
- Inuit taakku marluk annaanneqarput peqataasut tamarmik ingerlaannaq, sunniuteqarluartumik ataqatigiissaarilluartumillu suleqatigiinnerisigut, annaassiniaasartut allapput, aamma ima eqqaasitsissuteqarput:
- Aamma eqqaasitsissutigissavarput nunap qaava suli sisoorsinnaammat. Sisoortoqartillugu kalerrisaarut, misissuisartoq, assallatserut sisoortoqartillugulu nassatassaq puiunngisaannakkit – kisimiitillutillu angalassanngilatit.
Annaassiniartartut oqaluttuarnerat tamaat Facebookimi qupperneranni atuarneqarsinnaavoq:
