Qinerseqqaartut qinersinerup kingorna: – Inuit marluk politikikkut assigiinngilluinnartut

- Inuiaqatigiittut assigiinngitsorpassuarnik qinersisartugut, qinersinerup ersersippaa.

Fina Winbergip ikinngutini aamma atuaqatini Malu Kajangmat Ilinniarnertuunngorniarfimmi ualikkut soraaramik isumasioqatiginiarlugu naapippaa.

Folketingimut ippassaq qinersinermi marluullutik siullermeerlutik qinersipput, taamaattumillu qinersinerup inernera ullaaq paasisartik — suliartortinnatik sungiusariartortinnatillu — oqaloqatigiissutigaat. 

- Qinersisinnaalerluni maanna nuanneqaaq. Nuannisarluarpugut, Fina Winberg oqarpoq. 

Fina Winberg qinersinerup unnukkuani aallaqqaammut malinnaalluaraluarpoq. Unnuarorpallaalermalli innaannarluni. Qinersinerit kingulliit unnuap qeqqareersoq kisinneqarput akuersissutigineqarlutillu.

- Qarsoq Høegh-Dam illoqarfinni mikinerni aamma illoqarfiit angisuut ilaanni qinigaalluarsimasoq maluginiarpara, oqarpoq.

Malu Kajangmat aamma malinnaalaarsimavoq. Annerusumilli malinnaasimanani oqaatigalugu. Aammami qinersineq aqaguani ilinniarfianni sammineqarpallaanngitsoq, ilinniarnertuunngorniat taakku marluk oqaatigaat.

- Qinersinerup ilimagisatsitut inerneqannginnera ullaaq manna oqaloqatigiissutigilaarparput, Fina Winberg oqaluttuarpoq.

Taassuma Malu Kajangmat peqatigalugu qinersinerup inernera tupaallaatigilaarpaa.

- Demokraatinit qinigaasoqarnissaa naatsorsuutigisimagaluarpara, Fina Winberg oqarpoq.

- Uangattaaq naatsorsuutigisimagaluarpara, Malu Kajangmat ima oqarpoq.

Taamali pisoqanngilaq. Taakkumi allat tamaasa peqatigalugit ullaaq iteramik tusarpaat, IA-meersoq Naaja Nathanielsen aamma Naleqqameersoq Qarsoq Høegh-Dam Folketingimut ilaasortanngortut.

Alla qinigaavoq allalu qinigaanngitsoorluni

Marlunngormat qinersinermi Fina Winbergip Anna Wangenheim Demokraatineersoq qinerniarlugu aalajangiuppaa. Ilaatigut isumaqatiginninniarnermi eqqissisimasinnaasutut nillianavianngitsutullu isikkoqarmat.

Anna Wangenheim qinerneqartut amerlanerpaat tulliattut inissippoq, Naleqqameersoq Qarsoq Høegh-Dam tulleralugu. Inuit Ataqatigiilli Demokraatinit amerlanerusunik qinerneqarmata Naaja Nathanielsen Folketingimut qinigaavoq.

- Tamanna uggornarpoq, Fina Winberg oqarpoq.

- Allat uannit allaanerusumik isumaqarnerat ataqqigaluarlugu, qinigaanissaa ilimagilluinnarsimagaluarpara.

Aammali Naaja Nathanielsenip angusaqarluarsinnaanera upperaa.

Malu Kajangmaap IA-meersoq maanna naalakkersuisunut ilaasortaasimasoq Naaja Nathanielsen qinerpaa.

- Naligiissitaanissaq pingaartitarigamiuk, tamannalu nuannaraara, Malu Kajangmat marlunngornermi qinersivimmit anillakkami taama oqarpoq.

- Naaja Nathanielsenip qinigaanera ajunngilaq, oqarpoq.

- Aammami tusarpara inuit amerlasuut, assersuutigalugu ukioqatigisama ilarpassuisa qinersimagaat, Malu Kajangmat oqarpoq.

Suleqatigiinnissaq ajornakusuussaaq, ajornarnaviaranili

Naleraq qinersinermi qinigaalluarmat, Fina Winberg isumaqarpoq tamanna pissusissamisoortoq. Naak nammineq partii taanna qinerniarlugu eqqarsaatigisimanngisaannaraluarlugu.

- Illoqarfiit mikinerusut illoqarfiiilu annerusut assigiinngissuteqartorujussuupput. Tamannami aamma qinigassanngortittut akornanni takusinnaavarput, oqarpoq.

Naaja Nathanielsenip Qarsoq Høegh-Damillu ukiuni tulliuttuni sisamani Danmarkimi politikerinik suleqateqarnissaat, Qallunaallu politikeriisa Nunatsinnik salliutitsinerulernissaannik sunnerniartussanngormatigik, ajortutut isiginngilaa.

- Folketingimi nunatut siamasissumik ilaasortaatitaqassasugut oqartoqarsinnaavoq, politikikkummi inuit marluk assigiinngilluinnartuummata, Fina Winberg oqarpoq.

- Siamasissuunerat pitsaasuusinnaavoq. Suleqatigiissinnaanissaat neriuutigiinnarpara.

Isumaqarpit suleqatigiissinnaassasut?

- Naluarput. Tamanna eqqarsaatersuutigereerparput oqaloqatigiissutigalugulu, Fina Winberg oqarpoq.

- Nunamilli ataatsimik aggerfeqarput. Taamaattumik suleqatigiissinnaassapput. Aammali isumaqarpunga tamanna ajornakusoorsinnaassasoq.