Kuummiuni qimmit qimuttut napparsimallutik toqusimapput imaluunniit toqunneqarsimapput.
Kalaallit Nunaanni Uumasunut Nakorsaqarfik (UNIO) tusagassiuutitigut taama nalunaaruteqarpoq.
UNIO Kuummiuni qimmit qimuttut tuniluuttumik nappaateqarnerup kingunerisaanik toqusartut pillugit nalunaarummik apriilip 24-ani tigusaqarpoq. Qimmit katillugit 16-it nappaammik taassumannga toqussuteqarput, taakku saniatigut qimmit tallimat nappaatip ilisarnaataanik takussutillit toqunneqarsimapput.
Nappaatip ilisarnaataasa oqaluttuarineqarneri naapertorlugit parvovirusimit tunillatsissimanermut uppernarsaataasinnaapput, pingaartumik piaqqat qimmiaqqallu sunnerneqarsinnaallutik. Qimmit inersimasut akiuussutissamik kapitissimanngitsut aamma nappaateqalersinnaasut, oqartussat paasissutissiipput.
Apriilimi siusinnerusukkut pasitsaanneqartut
Tasiilami Kuummiunilu qimmilerisoq oqartussat suleqatigalugit akiuussutissamik kapitinnissamut paasititsiniaaneq aamma tunillaassuutitsinaveersaarluni sulineq aallartinneqartut UNIO aamma paasissutissiivoq.
- UNIO-p Kuummiut avataanni nappaatip siaruarnissaanik aarleqquteqarnissaq tunngavissaqanngitsutut isigaa, nalunaarummi allaqqavoq.
Kuummiuni qimmit piaraat pingasut parvovirusimik tunillatsissimanermik takussutissaqartut UNIO apriilip qaammataani siusinnerusukkut paasissutissiissutigaa. Kalaallit Nunaanni Uumasunut Nakorsaqarfiup tuniluuttoqarsinnaanera taamani ernummatiginngilaa.
Parvovirusip ilisarnaatai ilaatigut tassaapput qasoqqaneq, kissarneqarneq, nererusussuseqannginneq imerusussuseqannginneq, meriarneq aattalimmillu anartarneq, oqilinerlu.
Qimmit nappaammik akuttunngitsumik toqussuteqartarput, nappaalli inunnut tuniluussinnaanngitsoq, UNIO allappoq. Qimmiaqqat akiuussuserneqanngitsut angalaannartut qimminut allanut tunillaassuisarnerat peqqutaakkajuttarluni.
