Qeqertarsuarmi nutaamik meeqqeriviliornissamut pilersaarut unitsinneqarpoq. Tamanna Kommune Qeqertalimmi qinikkat, ileqquusumik apriilip 29-ani ataatsimiikkamik aalajangerpaat.
Qeqertarsuarmi nutaamik meeqqeriviliornissaq qinikkanit siornatigut siunnerfigineqarnikuugaluarpoq. Tamannali najukkami sanaartornermik suliaqartup allatut inassuteqareerneratigut piviusunngortussaajunnaarpoq.
- Nutaamik meeqqeriviliortoqarnissaanut Qeqertarsuarmi Sannassisoq aps nunamik piukkunneqartumi misissuineq ingerlannikuuaa. Misissuereernerup kingorna nalilerpaa nunaminertaq sanaartorfissatut piukkunneqartoq sanaartorfiunissamut tulluanngittoq.
- Piffiup sanaartorfissatut piukkunneqartup nunataata immap ulinnerani toqqavissaq angusassammagu, taamaalillunilu aamma suliarinissaa cement-lersornissaalu pisariussalluni, ataatsimiissutini taama allassimasoqarpoq.
Pioreersoq nutarsarneqassasoq
Meeqqerivik maanna pioreersoq nutaamik meeqqeriviliunngiinnartussanngornermi nutarsarneqassasoq aamma aalajangerneqarpoq.
- Sannassisoq innersuussivoq, massakkut meeqqeriviusup nutaanngittortaa ingutserlugu, nutaartaa atatiinnarlugu meeqqerivik alliliutigalugu nutarsarsinnaasoq. Nutaartaata qilaavata qutsissusaa ajunngilaq allilernissaanut. Kiisalu kloak-mut imermullu aqqutit pigineqareerlutik. Kiisalu cement-it piffimmiittut atoqqinneqarsinaallutik, kommunimi atorfilittat qinikkanut taama allapput.
Aningaasat nutaamik meeqqeriviliornissamut atorneqartussaagaluartut, 16.3 millionit koruunit, siunertap allanngortinneqarneranut atorneqassasut aamma aalajangerneqarpoq.
