Kommuneqarfik Sermersuumi kommunalbestyrelsi ulloq 23. marts 2026 Nuummi najugaqatigiiffinnik marlunnik nutaanik pilersitsisoqarnissaanut akuersivoq. Suliniut inunnut innarluutilinnut najugaqarnikkut neqeroorutinik nukittorsaallunilu utaqqisutut allattorsimaffinnik annikillisaassaaq.
Taama kommuni nittartakkakkut quppernermini allappoq.
Najugaqatigiiffiit nutaat marluk Aqqusinersuaq 13-mi blok 9-milu inissiarsuarni pilersinneqarput, taakkulu ataatsimut arfineq pingasunut, najugaqatigiiffinni tamani sisamanut inissaqartitsissapput. Neqeroorutit inersimasunut timinnut tarnikkulluunniit ajuutilinnut, ulluunerani ikorfartorneqarnissamik pisariaqartitsisunut siunnerfiligaapput. Tamanna najugaqatigiiffimmik naleqquttumik, ataasiakkaat pisariaqartitaannik naammassinnittumik, kommunip inunnut innarluutilinnut politikianut naapertuuppoq.
- Maanna Nuummi najugaqaqatigiiffinnik marlunnik pilersitsisinnaanerput nuannaarutigaara. Tamanna innuttaasut innarluutillit pisariaqartitaminnut naleqquttunik neqeroorfigineqarnissaannik qulakkeerinninnermut sapinngisamillu nammineerlutik inuuneqarnissamut ikorfartornissaannut qulakkeerinnissapput, Isumaginninnermut Inunnullu innarluutilinnut Ataatsimiititaliami siulittaasoq Justus Hansen (D) oqarpoq.
Inissat innuttaasunut utaqqisutut allatsissimasunut, innuttaasunut ataatsimoorluni najugaqarfinnit najugaqaqatigiiffinnut innersuunneqaqqittunut kiisalu innuttaasunut ulloq unnuarlu angerlarsimaffinnit angerlartinneqartunut agguaanneqassapput. Taamaammat pilersitsineq ataatsimoorluni najugaqarfinnut najugaqaqatigiiffinnullu utaqqisutut allatsissimasut ikileriarnerannik malitseqassasoq naatsorsuutigineqarpoq.
Najugaqaqatigiiffiit marluk taakku 2026-mi pilersinneqassapput. Illuutit iluarsartuuneqareerput iserterfigineqarnissaminnullu piareereerlutik, tamatumalu neqeroorutit akuersinerup kingorna pilertortumik pilersinneqarsinnaanerat kinguneraa.
