Maniitsumi napparsimmavimmi nakorsaatinik tillinniarneq pillugu Kalaallit Nunaanni Politiit marlunngornermi ullup qiteqqunnerani nalunaaqutaq 12.30 kalerrinneqarput.
Politiit pasineqartup najugaanut orniguttut, pigaartut pisortaat Aputsiaq Hansen oqarpoq.
Politiit tassani uppernarsaatinik ujaasipput, nakorsaatillu tillineqartut ilaat tassani nassaarineqarput.
Pasineqartoq, arnaavoq inersimasoq. Unnerluutigineqarpoq kingusinnerusukkullu iperagaaalluni.
- Suliaq suliarineqassaaq misissuiffigineqarsinnaaneralu periarfissaalluni, Aputsiaq Hansen oqarpoq.
Politii malersorneqartoq
Politiip sulinngiffimmini malersorneqarlunilu nilliaffigineqarlunilu filmiliarineqarnera pillugu, marlunngormat kingusinnerusukkut nalunaaqutaq 18.43 politiit nalunaarfigineqarput.
Angut tigusarineqarpoq killisiorneqareerneratalu kingorna iperagaasoq, Aputsiaq Hansen oqaluttuarpoq.
Politiip atorfini pissutigalugu angummit malersorneqarnera ilimagineqarpoq, pisorlu maanna misissuiffigineqarpoq
Imigassamik atornerluineq
Politiit ullormi kingullermi makkuninnga nalunaarutinik arlalinnik tigusaqarsimallutik, Aputsiaq Hansen oqaluttuarpoq:
Nakuusernerit, tillinniarnerit, imminut toqunnissamik sioorasaarinerit, anisitsinerit, angerlarsimaffimmi eqqissiviilliornerit, aalakoornerit aserorterinerillu.
- Suliassat amerlanersaat imigassamut attuumassuteqarput, Aputsiaq Hansen oqarpoq.
Suliassat taama ittut politiit sulineranni annertuumik sunniuteqartut taassuma oqaatigaa. Suliassanut taama ittunut 200-nik amerlanerusunik politiit sapaatip-akunnerata naanerani suliaqarput.
