Meeraalluni palasiusaartanikuulluni maanna naalagiartitsisarpoq

Hans Egedep oqaluffiani palasit qulingiluat qernertorsuarmik annoraarsuallit nikorfapput. 

Arnaq seeqqumiartoq qaqortumik takisuumik annoraarsualik unnguteqqavaat. Tamarmillu assamminnik talerperlermik niaquatigut pateqqallugu.

Seeqqummeqqasoq palasinit unngunneqarluni qinnunneqartoq tassaavoq Sanja Kristiansen, 35-nik ukiulik, marlunnut anaanaq.

- Misigisimanarpoq uagutsinnit annerusumit (Guutimit, aaqq.) najorneqarluta, Sanja kingusinnerusukkut misigisalikkersaarpoq.

Inuunerup imaannaanngissinnaassusaa

Sanja Kristiansenip inunngunngitsiarneraniilli inuunerup nalunartoqarsinnaassusaa aallartippoq. Anaanaa naartusoq, nakorsap ikkarlinnermi kingorna apornerata kingunerisaanik imaassinnaasoq erninermi nalaani toqussasoq ilisimatissimavaa. Immaqaluunniit naalungiarsuk inunngornermini toqussasoq. 

Sanjammi anaanaa Qaqortumiit Nanortalimmut erniartornerani angallat "Sapangaq" ilaaffigisaa ikkarlippoq, Sanjallu anaanaa nerrivimmut naamigut aporsimalluni. Qujanartumilli meeraq arnaalu ulloq manna tikillugu ajunngillat.

- Inuunerup sakkortusinnaanera nalunartoqarsinnaaneralu tassani aallartereerput, Sanja attortisimalluni oqaluttuarpoq.

Kuummiuni meeraaneq

Sumiiffinni assigiinngitsuni soorlu Maniitsumi, Paamiuni kiisalu Kuummiuni Sanjap meeraanera aallartippoq. Sanja Kristiansen meeqqat atuarfianni atualeqqammersoq Kuummiunut nuupput. Kitaaniillu kangianut nunaqarfiarannguamut tikikkamik silarsuaq nutaaq iserfigaa.

- Kuummiormiuaqqat allamiuaqqat tikissimasut alutoralugit unnguttarpaatigut. Ujamminik iveruteeqqanillu tuniorartissuaarluta. Ingerlaannavik kammattaarluta nuannisarsuaarluta. Tunumiusut oqaluttut paasineq ajorakkit nuannarinagu illartut anaanannut qiasarlunga. Illaatigineqartutut misigisarlunga, sunaaffali nuannarigaannga, Sanja Kristiansen eqqaamasalikkersaarpoq.

Sanja kingusinnerusukkut tunumiusut ilikkarpoq, aninilu angajoqqaami paasisinnaanngisaanik angerlarsimaffimminni tunumiusut oqaluuttarlerlutik. Angajoqqaavilu kingorna tunumiusut aamma ilikkarput paasisinnaalerlutillu.

Ilaqutariit tunumiinnerminni pingasunik qimmitaarput. Sanjallu qimmia Milak toqummat, Sanjap aninilu qimmit marluk kangerlummut qimussiutigisarpaat – ilaanni ungasissumut.

- Anigalu marluinnaalluta qimussertarpugut, tupinnaqaaq angajoqqaatta tatiginnissusaat sakkortusimaqimmat. Qinngumut kangerlummi ungasissumut anigalu marluinnaalluta marlunnik qimmilerluta qimussertarnikuuvugut, Sanja Kristiansen oqarpoq.

Oqaatsit, maqaasineq aamma avissaarneq

Ilaqutariit kingusinnerusukkut Nanortalimmut uterput, tassanilu Sanjap angajoqqaavi katipput. Nanortalimmi meeqqat atuarfiannut atuariartorami klasseqatini qallunaatoorsinnaasut paasivaa, namminerlu qallunaatoorsinnaanani.

- Angerlarama anaana oqarfigaara "Anaana qallunaatut oqaluffigisarniarsinga, oqaloqatigiittalerta", Sanja oqarpoq.

Atuaqatinilu Roskildemut aallarlutik atuariartorput, qallunaatullu ilinniarfigilluakkaminik qallunaanik ilaqutarsiaqarluni.

- Angajoqqaarsiama qallunaatut ilinniartittarpaatigut, allattarfissuaqaramilluunniit, taava uiguutit qallunaatut ilikkapallappakka, qallunaatuinnarmi aamma oqaluuttaratta, Sanja Kristiansen oqarpoq.

Inuusuttuaranngornermi misileraaffiup nalaani Sanjap angajoqqaavi avipput, tamannalu Sanjamut oqitsuinnaasimanngilaq.

- Sakkortusimaqaaq. Ataataga Nanortalimminngaanniit Qaqortumut uterluni aallarmat misigivunga kinaassutsima ilaa katattoq. Misigisimavunga tassani paatsiveerullunga, Sanja oqarpoq.

Sanjami ataataqarsuaarpoq. Anini ataatanilu sapaatikkut umiatsiamik piniartarsimapput, arnaat naalagiartoq. Pingasuullutillu piffissami sivisuumi peqatigiittarnerat allanngoriataarpoq.

- Angajoqqaakka avimmata ataata Qaqortumut angerlarami, uangalu ani anaanalu Nanortalimmiiginnarluta. Tassani kinaassutsima ilaa annertooq katappoq, qannartara ilanngarluni, Sanja attortisimalluni oqaluttuarpoq.

Massakkulli angajoqqaami avissimanerat paasisinnaalersimavaa akuerinerulersimallugu.

- Massakkut inersimasunngorama angajoqqaamma avissimanerat akuerisinnaavara. Taamanikkut pisut sakkortusimaqaat, paasisinnaanikuunnginnakkumi ataatama sooq taamani aallarnera, massakkut pikkoreqaat. Ernutaqalernikuullutillu pigamik ilaannikkut paarseqatigiittarput.

Meeqqat atuarfiat naammassigamiuk qallunaat nunaannut efterskoleriarpoq, nammineernissanilu ilinnialerlugu.

- Pastaliorniarsarigama erloqinikooqaanga, igasutta ikiorpaanga allaat pastaliulerama, Sanja Kristiansen illarluni eqqaamasalikkersaarpoq.

Sanjap inuusuttutut misileraaffiup nalaani sunngorniassanerluni nalornissutigisimavaa. Ilinniarnertuunngorniaraluarpoq kingornatigullu kigutileriffimmi ikiortitut ilinniarluni aallartissimagaluarluni, naammassinngisaminik.

Panimminillu naartulerami inuunera allanngorluinnarpoq.

- Tarnima nalunngeqatiginnissusia malillugu inuunererusutama akerlinganik inuuneqarnera naammagilersimavara. Paniga inunngormat imminut tusarnaarlunga aallartippunga, ilerasuuteqakatanneralu naammatsissutigalugu, Sanja Kristiansen aalajangersimarpalulluni oqarpoq.

Sanja Kristiansen panittareerami Nuummi ilinniarnertuunngorniarnini aallarteqqissallugu aalajangerpoq.

Meeraallunili takorluugaa

Nanortalimmi anaanami angajoqqaavi ningiua ittualu nunaqarput, ittualu Nanortallip oqaliffiani pedeliulluni. Sanja Qaqortumiikkaangami ataatami angajoqqaavi naalagiaqatigisarnikuuai.

- Qaqortumi ittukkut ningiukkut pulaaraangaakkit pinnguarlunga palasitut naalagiartittuusaartarnikuuakka, Sanja Kristiansen qungujulluni oqaluttuarpoq.

Palasinngornissamut aqqutaa takivoq

Ilinniarnertuunngorniarfik naammassigamiuk upperisalerinermik (teologi) ilisimatusalerpoq. Oqitsuinnaasimanngilarlu.

- Sakkortuvoq, taamaakkaluartorli ilinniakkamik uannut tulluaqqissaartumik ilinniagaqarlunga misigisimavunga, Sanja Kristiansen oqaluttuarpoq.

Upperisalerinermik bachelorinngorniarneq ukiut pingasut ingerlanneqartarpoq, ernertaarninilu pissutigalugu ilinniakkani ukiut tallimat ingerlassimallugu.

Ilinniakkanilu naammassigamiuk ingerlaannaq palasinngorniarnani aalajangersimavoq.

- Attortiasuararsuugama. Palasiussagaannilu inunnik sullissineq nukittuffigisariaqarpoq. Kisianni qamuuna nukittorsarnissara imminullu ilinniarnissara, meeqqat allilaarnissaat eqqarsaatigalugu, naalungiarsuuteqarlunga palasiunissara takorloorsinnaannginnakku ingerlaannaq palasinngunngilanga, Sanja Kristiansen nassuiaavoq.

Taamaasilluni katsorsaasutut ilinniaatigaluni katsorsaasutut Allorfimmi siullermik sulilerpoq. Taassuma kingorna Kofoedsskolemi ”Naput” inuusuttunut ikorfartortitut sulilluni.

Upperisaqarneq inuunermi toqqammavittut

Upperisarli inuunerani pingaaruteqartuaannarsimavoq.

- Unnuit tamaasa Ataatarpoorlunga qinusarpunga, anaanama qinunermik ilinniartinnikuummanga. Innalernerit tamaasa ataatarpoortitaasarpugut, taamanikkut taamaattussaannartut isigivara, taava kisianni massakkut eqqarsaatigigaangakku taakkua isumanni guldiupput, Sanja Kristiansen oqarpoq.

Tamannalu meeqqaminut ingerlateqqippaa. Ernerata tallimanik ukioqarluni Ataatarpooq alanngaarsinnaalereerpaa.

- Meeraanitsinni eqqaamasagut, soorlu aqqalup massakkut ataatarpooqatigisarpaanga aamma panimma. Tamassuma missaani ukioqarluni ilikkakkat inuunermi aallunneqaannaavittuusarput, eqqaamasat siulliit inuunermut nalituujupput, Sanja Kristiansen oqarpoq.

Neriugisaqarnissaq upperisaqarnermi pingaaruteqarput.

- Upperisara aqqutigalugu tuppallersarneqartarpunga, Sanja Kristiansen oqarpoq.

Palasinngortitaanermi misigisaq immikkuullarissoq

Maniitsumi ilagiinnit qaaqquneqarluni palasinngornissani paasigamiuk nukissaqarumalluni attortiasoorusunnanilu qinusarpoq.

- Palasinngortinngortinneqarnissara qanilliartortillugu sinippiarneq ajorama, immaqa pissangallunga, kisianni nukissaqarsuaarlunga. Ulloq taanna palasinngortitaasussaallunga ullaakkut sinippiarnikuunanga iterpunga. Allaanavianngilaq nukissaqaqqullunga qinnutigisartakkakka tunniunneqartarneratigut nukissaqarluarlunga, Sanja eqqissisimarpalulluni oqarpoq.

Meeraallunili palasinngornissaminik takorluugaa piviusunngorpoq. Meeraalluni ningiukkumi ittukkumi saavanni naalagiartitsisuusaartarsimalluni massakkut oqaluffimmi ilagiinnut naalagiartitsisalerpoq.

- Soorunami tussiut qinernikuusara ittuga ilisaammat atornikuusarput appimmat killitsippunga, qullilivunga, aamma seqqumiarnerma nalaaniikkami, Sanja attortisimalluni oqaluttuarpoq.

- Misigisaq immikkuullareqaaq palasit unngullunga qinnummannga, malugisinnaavara nukimmik annertuumik torrattumik tunineqarlunga, kiisalu nukiup annertuup najoraatigut misinnarluni, tupinnaqaaq. Inuuninni aatsaat taanna malugivara, Sanja Kristiansen oqarpoq.

Maniitsumi palasinngussaaq

Sanja Kristiansen meeqqanilu ukiut aqqanillit Nuummioreerlutik Maniitsumut  nuuttussanngorput, Sanja Maniitsumi palasitut sulilertussaammat.

- Nuummiit aallalernerput meeqqannut aamma pikkunarpoq. Ulluni makkunani meeqqama kammalaatai inuulluaqqullattaarpagut. Neriuppunga meeqqakka Maniitsumi kammattaapallassasut. Maniitsumut tikinnissatsinnut qilanaarpunga aamma erinisuppunga, Sanja Kristiansen attortisimarpasilluni qilanaarpasillunilu oqarpoq.

Palasinngortut illoqarfigisartik qimallugu palasitut atorfeqaqqaartarnerat inuttut ilinniarfiusaqisoq eqqaamasassaqarnartaqisorlu palasit Sanja oqaluttuarfigisarsimavaat.

- Aamma unganarsisarporooq, qanormi taamak, Sanja Kristiansen illarluni naggasiivoq.