Israelip Iranimi ikaartarfiit qimuttuitsunillu aqqutit "mumisitsinermik sakkutuunit atorneqartut“ marlunngornermi saassukkaat, Israelip ministeriunerata Benjamin Netanyahup oqaatigaa.
Nutaarsiassaqartitsivik AFP naapertorlugu videoliami Netanyahup allattoqarfianit saqqummiunneqartumi tamanna oqaatigaa.
- Iranimi peqqarniisaarniat sakkortunerusumik, sakkortusiartuinnartumillu saassuppagut, videoliami Netanjahu oqarpoq.
- Ippassaq timmisartortartutta timmisartut assartuutit qulimiguulillu arlallit Iranimi sakkutooqarfimmi aserorpaat. Qimuttuitsut aqqutaat kiisalu ikaartarfiit mumisitsinianit atorneqartartut ullumi qaartinneqarput, AFP naapertorlugu taama oqarpoq.
Tamanna sioqqullugu Israelimi isumannaallisaanermut tunngasunik ilisimasallit kinaassutsiminnik isertuussisut aviisimut Times of Israelimut oqarput Israelip sakkutuui Iranimi ikaartarfiit qimuttuitsunillu aqqutit qulit missaaniittut pingaarutillit qaartartumeerniarneqartut.
Tamanna Iranimi mumisitsinermik illersuisut sakkussiaannik atortussanillu allanik nunami ingerlatitseqqinnginnissaanut atatillugu pisimasoq, paasissutissanik pissarsisut oqarput.
USA-p præsidentiata Donald Trumpip piffissaliussaata qaangiunnissaanut ullup affaa suli qaangiutinngitsoq, Israelip saassussinera pivoq.
Hormuzip kangerliumarnata ammaqqinnissaanut Iran pingasunngornermi nalunaaqutaq 02.00-mut Trumpimit periarfissineqarpoq. Ammaanneqanngippat USA-p ikaartarfiit nukissiorfiillu saassukkumaarai, Trump oqarpoq.
Inuit attaveqatigiittarfianni, Truth Social-imi, "inuiaat tamarmik unnugu toqussasut uteqqinngisaannarumaarlutillu“, præsident marlunngornermi allappoq.
USA suli "sakkussiaateqarmat qanoq atorneqarnissaannik suli aaliagiiffigineqanngitsunik“, USA-p vicepræsidentiata J.D. Vancep oqaatigalugu mianersoqqussutigaa.
„USA-p præsidentia sakkussiat taakku atorneqarnissaannut aaliangersinnaavoq, taamaaliorumaarporlu Iranikkut pissusilersoriaatsiminnik allannguinngippata,“ Vance marlunngornermi Ungarnimi tikeraarnermini Times of Israel naapertorlugu oqarpoq.
/ritzau/
