Nalunaarut Inuit arnartaasa niviarsiarartaasalu pisinnaatitaaffiinik siuarsaasussaq, ullumi Naalakkersuisunut Inatsisartunullu tunniunneqassaaq. ICC nalunaarummik tunuliaqutaavoq, taannalu Inuit Women’s Summitimi Sisimiuni oktobarimi 2025-mi ilusilerneqarpoq:
- Arnat ulluanni Inuit Women’s Summitip Nalunaarutaanit oqariartuutit nukittuut pingaarutillillu tamanut saqqummiuppagut, ICC-p siulittaasua Sara Olsvig tusagassiuutinut nalunaarummi allappoq, imalu nangilluni:
- Nalunaarut Inuit arnartaasa niviarsiarartaasalu pisinnaatitaaffiisa siuarsarnissaannut sakkutut atorneqarumaartoq neriuutigaarput.
Pisinnaatitaaffiit akuerineqarnissaat siuarsarniaaraat
Inuit Women’s Summitimi peqataasut arnat niviarsiaqqallu pisnnaatitaaffiisa paasineqarlutik akuerineqarnissaannik siuarsaanissamut suliniutit, minnerunngitsumillu arnat nukittuffiisa inuiaqatigiinnilu pingaarutilimmik inissisimanerat tikkuaraat, Sara Olsvigip erseqqissaatigaa. ‘
- Arnat Ulluata tikilluaqqunissaa nalunaarutillu Naalakkersuisunut Inatsisartunullu pisortatigoortumik tunniunnissaat qilanaaraarput, Sara Olsvig oqarpoq.
Naalakkersuisoq Naaja H. Nathanielseen (IA) Katuami Pipaluk Olsen (D), Inatsisartut Ilaqutariinnermut Peqqissutsimullu Ataatsimiititaliaanni siulittaasoq peqatigalugu nalunaarummik tigusisuussapput.
Nathanielsen: Inuit arnartaasa nukik annertooq pigaat
Inuit arnartaasa nunasiaanermi nammagaq annertooq nammassimagaat, tamannalu timikkut tarnikkullu kinguneqartoq, Naaja H. Nathanielsen oqarpoq:
- Nammagaq kalluarneqartunit tigullugu inissisimaffianut inissinnissaa uagut suliassaraarput – piffissap ingerlanerani assigiinngitsunillu periuseqarlutik arnat toqqaasinnaanermut kiffaanngissuseqarnerannik toqqissisimanerannillu arsaarinnissimasunut.
- Suliassaq tamanna siunitsinniittoq ataatsimoorluta immitsinnut tapersersornitsigut oqinnerulissaaq, Nathanielsen oqarpoq.
Ilanngullugu isumattuinermik, arnallu kulturikkut piginnaasaasa inuiaqatigiinnut tunniussaannik suliaqassalluni oqarpoq:
- Isumattuineq ajornartorsiutaanngilaq. Anaanatut najuuttuunissaq ajornartorsiutaanngilaq. Ilaquttat inuiaqatilluunniit atugarissaarnerannik suliaqarnissaq ajornartorsiutaanngilaq. Akissussaaffiilli pingaarnertut arnanit tiguneqartarnerat ajornartorsiutaavoq, Naaja H. Nathanielsen oqarpoq.
