Nuup Bussii A/S-ip nittartagaa ullumikkut attaveerussinnaasoq Facebookimi quppernermini nalunaarutigaa, ilisimatitsissutigalugulu qarasaasiatigut saassussineq tamatumunnga pissutaasoq.
Kalaallit nittartagaasa qarasaasiatigut saassunneqarneri ukioq manna siullermiilinngilaq.
Kommuneqarfik Sermersooq DDoS-imik saassunneqarnikuuvoq, saassussinerup kingunerisaanik attaveqaatit februaarip naanerani artukkerneqaraluarlutik.
Danmarkimi Politiit isertortumik paasiniaasartuinit (PET), Illersornissaqarfiup paasiniaasartuinit (FE) aamma Inuiaqatigiinni isumannaallisaanermut aqutsisoqarfiup (SAMSIK) aarlerinartoqarneranik qaammatip matuma aallartinnerani nalilersuipput, tassanilu qineqqusaarnermi naalagaaffeqatigiinneq qarasaasiatigut saassunneqarnissamut immikkut ittumik navianartorsiortinneqarsinnaasoq suliarineqarluni.
Danmark russit sunniiniarnerinut pingaarnertut saassunneqartartoq aarlerinartoqarneranik naliliineq naapertorlugu ilimagineqarpoq, soorlu paasissutissanik eqqunngitsunik siaruarterinermut, tassa piaaralutik oqariartuutinik eqqunngitsunik imaluunniit mumingasunik siammarterinermut, nittartakkatigut saassussinissanut annikinnerusunut, soorlu atortunik artukkiinikkut ajoqusiinernik, kiisalu nittartakkatigut saassussinissamik ilungersunartumik sioorasaarinermi.
