Atuartut nunanit allaneersut tapersersorneqarnissartik amigaatigaat

Meeqqat inuusuttullu nunanit allaneersut Kalaallit Nunaannut nuuttartut amerlingaluttuinnartillugit meeqqat atuarfianni pissutsinik nutaanik pilersitsivoq.

Oqaatsit akimmiffiulerpit - atuartut ilinniartitsisulluunniit pisariaqartitsineq aallaavigalugu taperserneqarneq ajorlutik.

Ilinniartitaanermut naalakkersuisup Nivi Olsenip (D) unammilligassaanera nassuerutigaa.

- Meeqqat atuarfiat kalaallisut qallunaatullu oqaaseqanngitsunik tikeqqammersunik atuartuuteqalernissaminnik akuliutsitsinissaminnullu naammattunik piginnaasaqanngitsoq isumaqarpunga, Ilinniartitaanermut naalakkersuisoq Demokraatineeroq AG-mut allakkatigut akissuteqarluni oqarpoq.

Nivi Olsen tikeqqammersut amerlanertigut naammattumik ikiorneqaratik klassinut nalinginnaasunut inissinneqartarnerat ajornartorsiutaanerpaasoq oqarpoq.

- Atuartut tikerlaat amerlasuut oqaatsit pisariaqartinneqartut atorlugit ikiorneqaratik toqqaannartumik klassinut inissinneqartartut nalunngilara, Demokraatit sinnerlugit ilinniartitaanermut naalakkersuisoq oqarpoq.

Tamanna atuartut atuartitsissutit nutaat kisiisa pinnagit oqaatsinik allanik aamma ilinniartariaqarnerannik kinguneqarpoq. Atuarnerminni ineriartornerannut atugarissaarnerannullu sunniuteqarsinnaasumik.

Aamma oqaatsit inuiaqatigiinni peqataanissamut matuersaataasut erseqqissarpaa.

- Meeqqanut inuusuttunullu tikeqqammersunut oqaatsivut ilinniarnissaat pingaaruteqarpoq, atuarnerminni ingerlaqqissinnaaniassammata kingusinnerusukkullu ilinniagaqarsinnaaniassammata, allappoq.

Aaqqissuussaaneq atuarfitsinni atuartut nunanit allaneersut atuartut nutaanut atuartitsiveqanngitsoq

Meeqqat atuarfiini atuartunut tikerlaanut kalaallisut aalajangersimasumik ilinniartitsisoqassaarnikuuvoq. Tikerlaat utaqqiisaasumik kalaallisut atuartinneqartarput, aalajangersimasunillu sinaakkuteqaratillu qanoq sivisutigisumik atuartinneqartarnissaat aalajangersarneqarnikuunani.

- Meeqqat atuarfianni qanoq sivisutigisumik ilassutitut ilinniartitsisoqartarnissa sinaakkusersorneqarneq ajorpoq, Nivi Olsen oqarpoq.

Tassa atuarfimmiit atuarfimmut assigiinngitsuupput — atuartut ilaat anguniagartinneqarlutik tapersersorneqartarput - allalli annikinnerusumik ikorfartorneqartarlutik. Aaqqissuussaanerup assigiinngitsuuneranik inerneqarpoq, akisussaaffillu atuarfinniittarluni.

Tamanna atuarfinni malugineqarsinnaavoq.

- Ilinniartitsisut unammilligassaqalersarput, akisussaaffillu ilinniartitsisunut ataasiakkaanut inissinneqarsinnaanani, oqarpoq.

Aamma oqaatsit assigiinngitsut arlallit atorlugit atuartitsisoqartarnissaa aqqutissaannginnerarpaa.

- Tamanna piviusorsiornerunngilaq, perorsaanermik suliaqarnermi ilinniartitsinermiluunniit atorsinnaanngilaq.

Atuartut allamiut ataatsimut isigalugit aaqqissuussaasumik atuartinneqarsinnaanerat amigaataasoq oqarpoq - atuarfiit suliassamik qanoq naammassinninnissaannik ataatsimoorussamik tunngavissaqarani.

- Ilinniartitsisut aaqqissuussaanikkut unamminartut kisimiillutik nammassanngilaat.

Ajornartorsiut ukiorpassuarni ilisimaneqarpoq

Ajornartorsiut ilinniartitsisut kattuffiannit IMAK-imit ukiorpassuarni isornartorsiorneqartarpoq, Nivi Olsenillu iliuuserineqartut ineriartornermut malinnaasimannginnerat isertuutinngilaa.

- Iliuuseqarnerput ineriartornermut naleqqussarneqarsimanngitsoq isumaqarpunga. Pissutsit taama ingerlatiinnarsinnaanngilagut, oqarpoq, politikkikkullu iliuuseqartoqartariaqarnerarlugulu assigiinngitsutigut tamanna pisariaqartoq oqaatigalugu.

Siullertut ilinniartitsisut piginnaanngorsaneqassapput. Ima oqarpoq:

- Ilinniaqqinnerit oqaatsillu allat atorlugit perorsaanermut tunngasuni piginnaanngorsaanerit aaqqissuussaanerusumillu ilinniartitaanissaat pisariaqartinneqarpoq.

Aammattaaq atuartut allamiusut oqaasillit pillugit tunngaviusumik ilisimasaqartoqanngilaq, soorlu meeqqat atuarfiini ataasiakkaani qanoq amerlatiginerat pillugu.

Kiisalu, atuarfeqarfiit aaqqissuulluagaanerulernissaat tapersersorneqarluarnerunissaallu pisariaqartinneqartut aamma oqaatigaa.

Iliuuseqarneq sivisuumik pisartoq

Nivi Olsenip iliuuseqarnissaq siunertariagaluarlugu allannguineq ullormiit ullormut pisinnaanngitsoq naqissuserpaa:

- Iliuuseqarneruneq sivisuumik pissaaq. Unammilligassat imaaliallaannaq aaqqinneqarsinnaanngillat, paasissutissat amerlanerusut, piginnaasanik ineriartortitsineq aaqqissuussaanerlu nutaaq pisariaqarput – tamaammallu pitsanngorsaanerit ingerlaannaq sunniuteqarsinnaajunnaratik.

Meeqqat atuarfiat pillugu akisussaaffik kommuniniittoq aamma erseqqissaatigaa.

- Taamaattumik aaqqiissutissat kommuninik qanimut oqaloqateqarnikkut nassaarineqartariaqarput.

Aaqqissuussaanikkut unammilligassaqaraluartoq Nivi Olsenip anguniakkani ersarissoq aalajangiusimavaa: Atuartut tamarmik angusarissaartarnissaat.

- Atuartut tamarmik, oqaatsit apeqqutaatinnagit, killiffii aallaavigalugit atuartinneqassapput - inuttut, piginnaasatigut oqaatsitigullu.

Atuartitsinermi qanoq iliuuseqartoqassanersoq erseqqissumik suli paasineqanngilaq.

Atuartunut atuartitsiffiusuni oqaatsinik paasinnissinnaanngitsunutt, ilinniartitsisunullu atuartitsinermik ataqatigiissaariniarsarisunut apeqqut suli taannaavoq:

Oqaatsit qaqugu timitalerneqassappat?