Nutarterneqarpoq: Nets ingerlatsinermi akunnerpassuarni ajutooqqareersorlu sisamanngornermi ualilersoq "nalinginnaasumik ingerlatsineq" iluarsiartulersoq, akiliisitsisarnermut suliffeqarfik tusagassiorfinnut nalunaaruteqarluni allappoq.
Pisiniarfimmi kortit akiliutiginiarukku iluatinngitsoorsinnaavoq.
Nets kiffartuussinermi maanna ajornartorsiuteqarpoq, taamaammallu pisiniarfimmi kortimik akiliiniartut iluatsinngitsoortarsinnaanerat GrønlandsBankenimiit nalunaarutigineqarpoq.
- Dankort aamma Akiliut aningaasanik tigusisarfinni pisiniarfiillu ilaanni suli atorneqarsinnaapput. Mobilbank aamma Netbank nalinginnaasumik ajoquteqaratik ingerlaannarput, aningaaserivimmiit allapput.
Mastercardimik kortillit pisiniarfinni akiliiniarnerat ajornakusoorneruvoq. Mastercardimik kortillit ajornartorsiutip aaqqinnissaata tungaanut GrønlandsBankenimi akeqanngitsumik aningaasanik tigusisinnaasut, aningaaseriviup paasissutissiissutigaa.
Mobilepayimi nuussiniarneq aamma ajoquteqarsinnaasoq nalunaarutigineqarpoq.
