Akerliussutsimik takutitsisut: Polar Raajat Aasianni suliffissuata matuneqarnissaa akerlerineqarpoq

Polar Raajat Aasianni raajaleriffiata ukiaru matuneqarsinaaneranik nalunaarut inuussutissarsiortunit sakkortuumik qisuariarfigineqarpoq.

- Aasianni inuussutissarsiortut amerlasuut siunissarput ernummatigaarput, politikkerinillu tusaaniarneqarusuttarluta, minnerunngitsumik Naalakkersuisunit.

Bolethe (Bula) Marie Hendriksen, Aasianni aqagu akerliussutsimik takutitsinermi aaqqissuussisoq, oqarpoq.

Aasianni inuussutissarsiutinik ingerlatsisut arlallit peqatigalugit Polarip aalisakkanik raajanillu tunisassiorfiata matuneqarnissaa akerleralugu ataatsimoorlutik suliniuteqarput.

- Polar Raajani sulisunut, immikkoortortaqarfinnut umiatsiaararsortunullu tapersersuinerput takutinniarlugu aamma akerliussutsimik takutitsissaagut, oqarpoq.

Bolethe Marie Hendriksenip inuit 70-it akerliussutsimik takutitsinermi illoqarfik tamakkerlugu ingerlaaqatigiinnermi fabrikkip annaanneqarnissaanut ilungersornerminnik peqataassasut naatsorsuutigaa

Polar Raajat, Polar Seafood Greenlandimit aamma Polar Seafood Denmarkimit pigineqartoq, Aasianni 116-inik sulisoqapoq. Politikkikkut aaqqiissutissarsineqarsimanngippat matusariaqartoq piginnittunit oqariartuutigineqarpoq.

Suliffiit amigaataalernissaat annilaanngatigaat

Polar Raajat illoqarfimmi suliffiit annersaraat. Bolethe Marie Hendriksen, nujalerisup namminersortup, Aasianni inuussutissarsiortut Polarip fabrikkiani 116-inik sulisoqartup saniatigut illoqarfimmi aamma Kommune Qeqertalimmi illoqarfinni nunaqarfinnilu allani suliffippassuit malitsigisaanik matuneqarumaartut aarleqqutigigaat oqaatigaa.

- Tamatuma kingunerisaanik kommunimi suliffissat aalajangersimasut amerlasuut amigaatigineqassapput, oqarpoq.

Aalisarnermut, Piniarnermut, Nunalerinermut Imminut Pilersornermut Naalakkersuisoq Peter Borg, Demokraatit, Polar Raajat tunisassiorfiata matunnginnissaanut aaqqiissutissamik nassaarnissaminik neriuuteqartuarsinnarpoq.

Naalakkersuisulli Polar Seafood Royal Greenlandilu aaqqiissutissanik sulissuteqartariaqartut arlaleriarluni erseqqissarpaat.

Aasiaat soqutigineqarnerusariaqartoq

Bolethe Marie Hendriksen Aasiaat politikerinit soqutigineqarnerusariaqartoq, illoqarfimmi napparsimmaveqarmat, mittarfittaarmat imarpiullu itivillugu talittarfimmik peqarmat isumaqarpoq.

- Tamanna Polarip suliffeqarfiata ammatiinnarneqarnissaanik anguniakkatsinnik sorsunnitsinnillu nakussatsitsissaaq, oqarpoq.

- Kommunini allani aningaasaliisoqartarnera takusinnaavarput, Qeqertalimmili sumiginnarneqarpugut.

- Ukiuni qulini kingullerni iffiorfiup, ernisarfiup Tusassillu pisiniarfianik matusinerit kingutilerisumillu aalajangersimasumik peqarunnaarnerput misigisimavarput.

- Kommunimi illoqarfiit pingaarnersaattut tapersersornerusariaqarluta isumaqarpugut, kommuunip sinnerani ineriartornermik tapersersuisinnaajumalluta, oqarpoq.

Tunisassiorfik attanneqaannartariaqarpoq

Polar Raajat naapertorlugu 2025-mi Aasianni niuertarfinni suliffeqarfinnilu kiffartuussinerit 28,5 millionit koruuninik akeqartut pisiarineqarput. Taamatullu tunisassiorfimmiit sulisunit kommuunimut 7,8 millionit koruuninik akileraaruteqarluni.

Taamaattumik tunisassiorfiup attatiinnarneqarnissaa pingaaruteqartoq, Bolethe Marie Hendriksen isumaqarpoq.

- Sulisut suliffeqarfiillu toqqaannartumik toqqaannanngitsumilluunniit tunisassiorfimmut kiffartuussisut, aamma umiatsiaararsorlutik aalisartut aningaasaqarnitsinnut annertuumik isumalluutaapput.

- Aasiaat Ilulissat nunat tamalaat mittarfissaannit 90 kilometerisut ungasitsigaaq, kommunimilu aningaasaqarnerput ingerlalluarpat takornariartitsinermik siuarsaaqataasinnaavugut taamaalillutalu nunap assingani ilanngulluta.

Akerliussutsimik takutitsinermi peqataasut timersortarfimmit aallarlutik Kommune Qeqertallip allaffissuata silataata tungaanut ingerlaaqatigiinnermik, tallimanngorpat nalunaaqutaq 11:30, akerliussutsimik takutitsissapput.